«Bıylǵy jyldyń 1 aqpanynan bastap qazirgi ýaqytqa deıin Otbasy bankinde 57 267 bilim berý shoty ashylǵan. Semeı qalasynyń jas fýtbolshysy bank depozıtiniń 50 myńynshy salymshysy atandy. 9 jastaǵy jetkinshektiń jetistikteri jeterlik – ol mekteptegi úzdik oqýshylardyń biri. Fýtbol oınaǵandy jany qalaıtyn talantty balanyń armany keleshekte tanymal fýtbolshy bolý. Onyń bul banktegi jınaǵy bolashaqta armanyna jetýge jáne sapaly bilim alýyna kómektesedi», deıdi mamandar.
Bıylǵy jyly Otbasy bank memlekettik bilim berý jınaqtaý júıesiniń qatysýshysy bolyp, aýqymdy baǵdarlamalardy júzege asyryp keledi. Sonyń biri mektep bitirgen azamattarǵa oqý aqysyn tóleýge qol ushyn beretin «AQYL» depozıti. Bank usynǵan derekterge sensek eń únemshil ári balalaryna barynsha jaǵdaı jasaýǵa yntyq ata-analar Shymkent, Astana, Almaty, Mańǵystaý jáne Atyraý oblystarynda turady. Dál osy aımaqtarda bilim berý depozıtteri jıi ashylady eken. Búgingi kúni osy óńirlerdiń salymshylarynyń shotynda 795,8 mln teńge jınalǵan.
«Qazir memlekettik bilim berý jınaqtaý júıesine alty qazaqstandyq bank pen bes saqtandyrý kompanııasy kiredi. Bıylǵy jyly «Qarjy ortalyǵy» AQ ashylǵan depozıtter boıynsha mereıtoılyq kórsetkishti atap ótti. Búgingi tańda 70 000 qazaqstandyq «AQYL» bilim berý salymdaryna aqsha jınap júr, olar bul qarajatty keıinnen elimizde de, shetelde de bilim berý aqysyn tóleýge paıdalana alady. «AQYL» depozıtin asha otyryp, klıentter bankten syıaqy alýdan bólek, salymshynyń áleýmettik sanatyna baılanysty jyl saıyn 5% nemese 7% memlekettik syılyqaqy alady», deıdi «Qarjy ortalyǵy» AQ Basqarma tóraǵasy Asqar Ibraımov.
«AQYL» depozıti 3 nemese 5 jyl merzimge ashylady. Eger depozıt keminde úsh jyl merzimge ashylatyn bolsa, onda mólsherleme jyldyq 12%-ǵa teń. Al, salymdy keminde 5 jylǵa josparlasa, onda depozıt boıynsha mólsherleme 9,5%-ǵa teń bolady eken. Eń mańyzdysy, bank qosqan syıaqy aı saıyn kapıtaldandyrylyp otyrady. Bul bank paıyzy depozıt somasyna qosylatyndyǵyn jáne kelesi aıda osy aqshaǵa jańadan syıaqy eseptelip, esepshottaǵy qarjy eselenip otyrady. Merzimi, paıyzdyq mólsherlemesi jáne kapıtaldandyrylýy jıyntyq retinde salymdy tıimdi túrde kóbeıtýge kómektesedi.
«Bıylǵy jyldan bastap Otbasy bank qazaqstandyqtarǵa turǵyn úıge ǵana emes, bilim alýǵa da aqsha jınaýǵa kómektesedi. О́ıtkeni, bizdiń balalarymyzdyń aldynda úlken múmkindikter esigin ashatyn dúnıe bul – sapaly bilim. Bilimniń kúshimen siz barlyq arman men tilekterińizdi júzege asyra alasyz, meıli ol úı satyp alý, saıahattaý, jeke táýelsizdik nemese tabysqa jetý bolsyn. Ony bizdiń «AQYL» depozıtimiz iske asyrýǵa kómektesedi. 1 aqpannan bastap qazirgi ýaqytqa deıin Otbasy bankinde 57 267 bilim berý shoty ashyldy», dedi Otbasy bankiniń Basqarma tóraǵasy Lázzat Ibragımova.
Balalardyń bilimine qarajat jınaqtaý kezinde memleket tarapynan jyl saıyn 5% kóleminde syılyqaqy qosylady. Sonymen qatar memlekettik qarjy esebinen jyl saıyn áleýmettik osal otbasylardyń balalaryna ashylǵan depozıtterge 7% mólsherinde syılyqaqy usynylady. Basty sharty memlekettik syılyqaqyǵa ıe bolý úshin salym bir jyl boıy jınaqtalýy tıis.
Otbasy bank qyzmetkerleriniń sózinshe «AQYL» depozıtin Ulttyq qordan alynǵan jınaqtarmen tolyqtyrýǵa bolady eken. Bıyl 18 jasqa tolǵan qazaqstandyqtar osy tólemderge ıelik ete alady. Ony «Ulttyq qor – balalarǵa» jobasy aıasynda enpf-otbasy.kz platformasynda iske asyrýǵa bolady.
Semeı
