Foto: Májilistiń baspasóz qyzmeti
Aıta ketsek, Nartaı Sársenǵalıev Palatanyń osy másele boıynsha jumys tobyna jetekshilik etedi.
Depýtat atalǵan zań jobasynyń naqty jańashyldyqtaryn atady.
Onyń aıtýynsha, joǵary jetistikter sportyna kiretin sport túrleriniń tizimi belgilendi. Onyń ishinde «basym sport túrleri» degen uǵym da bar. Taǵy bir jańashyldyq - ulttyq sport túrlerin bıýdjetten qarjylandyrý. Depýtat osylaısha sport ınfraqurylymyn damytý, memlekettik sport uıymdarynyń jumysyn qarjylandyrý jáne buqaralyq sportty damytý baǵyttaryna aıryqsha nazar aýdarylatynyn tilge tıek etti.
Sondaı-aq Nartaı Aralbaıuly elimizde óner kórsetetin sheteldik sportshylarǵa qatysty mańyzdy norma bar ekenin eske saldy. Dálirek aıtqanda, Qazaqstannyń azamattyǵy joq sportshylarǵa bıýdjet esebinen qarajat berýge tolyqtaı tyıym salynady.
Áńgime barysynda Májilis depýtaty «Samuryq-Qazyna» arqyly, óńirlik áleýmettik korporasııalar arqyly aýdarylatyn qarajatty legıoner ustaýǵa jumsaý máselesi qalaı sheshiletinin túsindirdi.
«Kvazımemlekettik sektordyń qarajaty esebinen de Qazaqstan azamattyǵy joq sportshylarǵa qarjy bólýge tyıym salynady. Bul norma Úkimettiń tıisti qorytyndysyn aldy. Biz osy zań sheńberinde múmkindigi shekteýli azamattarǵa jaǵdaı jasaýdy qarastyrdyq. О́ıtkeni keıingi Olımpıadalar men halyqaralyq jarystarda bizdiń paralımpıadashylar óte jaqsy jetistikterge jetip júrgeni málim. Májilistegi áriptesterimizben birge birinshi toptaǵy múgedekterge arnalǵan norma usyndyq. Mysaly, qazir birinshi toptaǵy múgedektigi bar 10 sportshy jarysqa barsa, eń kóp degende olardyń janynda 3 adam júredi. Al erekshe azamattarǵa 24 saǵat boıy kómekshi kerek. Sol úshin biz «sportshyny alyp júretin adam» degen uǵymdy engizdik», dep naqtylady ol.
Suhbat barysynda balalar sporty tóńireginde áńgime órbidi. Depýtat buǵan deıin sporttyq saıystarǵa, sport túrlerine qabyldaýda eshqandaı jas shekteýi bolmaǵanyn aıtty. Saldarynan jarys barysynda balalardyń kóz jumý faktileri tirkeldi. Sondyqtan, budan bylaı sport saıystaryna qatysatyn balalardyń jasy esepke alynady.
Depýtattyń aıtýynsha, bir-birine uqsas birneshe sport túrin bir federasııaǵa biriktirý tájirıbesi qolǵa alynady. Zańda federasııalarǵa naqty talap qoıylady. Osy zań kúshine engennen keıin bir federasııanyń bir ǵana sport túrine ıelik etetin múmkindigi bolady.
Nartaı Sársenǵalıev zań jobasynda sporttaǵy legıoner uǵymyna qandaı túsinikteme beriletinin de aıtty.
«Jańa zań qabyldansa, legıonerlerge bıýdjet qarajaty berilmeıdi. Desek te Qazaqstan azamattyǵyn rásimdep alǵan azamattarǵa ondaı tyıym joq. Bul máseleni Memleket basshysy da olımpıadaǵa qatysqan sportshylarmen kezdeskende aıtty. Sondyqtan sportshylar Qazaqstan azamattyǵyn jalpyǵa birdeı tártippen alý kerek», dedi spıker.
Jańa zań jobasy qabyldanyp jatsa, sport salasyna bólinetin qarajat únemdele me? Depýtat bul suraqqa da jaýap berdi.
«Bıýdjetti mınıstrliktiń ózi jasaqtaıdy. Sodan keıin bizge kirgizedi. Memleket esebinen qarjylandyrylatyn sport túrleriniń azaıýynan únemdelgen qarajat bolsa, balalar sportyna, buqaralyq sportqa baǵyttaýy kerek. Májilistiń Áleýmettik-mádenı damý komıteti mınıstrliktiń aldyna bul máseleni qoıdy.
Jalpy Zań jobasynda 60-tan astam normany Úkimet qorytyndysyna jiberdik. Sonyń 80-90 paıyzyna oń qorytyndy aldyq. Bul zań shyǵarý isinde jaqsy kórsetkish bolyp sanalady», dep sózin qorytyndylady depýtat.
