Sýretti túsirgen – Erlan OMAR, «EQ»
Bul jóninde Batys Qazaqstan oblystyq sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev habarlady. Onyń aıtýynsha, 1 qazannan beri óńirde JRVI-diń 21 089 jaǵdaıy tirkelgen.
– Aýyrǵandardyń basym bóligi, ıaǵnı 14 713 naýqas – 14 jasqa deıingi balalar, sonyń ishinde 173 sábı – 1 jasqa da tolmaǵan. Júktiligine baılanysty esepte turǵandardyń arasynda 31 áıel aýyrǵan. Sondaı-aq oblysta osy dıagnozben tirkelgenderdiń 714-i – oqýshylar, – deıdi Nurlybek Ermekuly.
Elimizde Densaýlyq saqtaý mınıstriniń 2021 jyly jarııalaǵan buıryǵy bar: eger tárbıe jáne bilim uıymdarynda vırýstyq ınfeksııalarmen aýyrǵan oqýshy sany 30%-dan artsa, oqý úderisi ýaqytsha toqtatylady. Mundaı aýrýlardyń qataryna jiti respıratorlyq, tumaý jáne olardyń asqynýlary, menıngokokk ınfeksııasy, COVID-19 koronavırýstyq ınfeksııasy, jelsheshek, skarlatına sekildi qaýipti juqpalar engizilgen. Bir táýiri, bıylǵy epıdemııalyq kezeńniń basynan beri mundaı jaǵdaı tirkelgen joq.
«Aýyryp em izdegenshe, aýyrmaıtyn jol izde» deıdi halyq naqyly. Tumaýǵa qarsy egý óńirde 1 qazannan beri ambýlatorlyq-emhanalyq kómek kórsetetin barlyq medısınalyq mekemede júrgizildi. Táýekel tobyna jatatyn adamdar, eń aldymen, medısına qyzmetkerleri, medısınalyq mekemelerde esepte turǵan balalar, jıi aýyratyn balalar, balalar úıiniń, qarttar úıiniń tárbıelenýshileri, sozylmaly aýrýlary bar eresekter, sondaı-aq epıdemııalyq kórsetkishter boıynsha júktiliktiń ekinshi jáne úshinshi trımestrindegi júkti áıelder, jalpy bilim beretin mektepterdiń oqýshylary, joǵary jáne orta oqý oryndarynyń stýdentteri men qyzmetkerleri vaksınasııalanýdan ótken.
Búgingi tańda oblysta 68 myń adam tumaýǵa qarsy ekpe alǵan. Onyń 3 087-si – sozylmaly aýrýlary bar balalar, 21 067-si – eresek adam, 7 947-si – medısına qyzmetkeri, 1 038-i – júkti áıel, 455-i – oqýshy.
Budan bólek, mamandar oblysta qyzylsha men kókjótelge qatysty epıdemııalyq jaǵdaı turaqty dep sendirip otyr. Bul barysta syrqattanýshylyq deńgeıi tómendep keledi.
«2024 jyldyń 11 qarashasyna deıin óńirde qyzylsha dıagnozy 1 265 márte tirkeldi, zerthanalyq, klınıkalyq tekserý nátıjesinde 41 ret kókjótel dıagnozy rastaldy», deıdi N.Mustaev.
Qaýipti dert tirkelgen árbir oshaqta epıdemııaǵa qarsy is-sharalar kesheni ótkiziledi: syrqattarmen qarym-qatynas jasaǵan aýmaqta 21 kún boıy medısınalyq baqylaý ornatylady.
Batys Qazaqstan oblysy
