Fotolar: Úkimettiń baspasóz qyzmeti
Eki el úkimetteri basshylarynyń kezdesýinde saýda-ekonomıkalyq jáne mádenı-gýmanıtarlyq yntymaqtastyqty damytý boıynsha eki memleket basshylary deńgeıinde qol jetkizilgen ýaǵdalastyqtardy júzege asyrý barysy talqylanyp, bıdaıdy tereń óńdeý, qurylys ındýstrııasy, kólik, IT salasy, týrızm jobalaryna ekpin bere otyryp, ónerkásip kooperasııasy men aýyl sharýashylyǵyna basa nazar aýdaryldy.
Qazaqstan-Belarýs arasynda ózara saýda kólemi bıyl 8 aıda $600 mln-dy quraǵan. Qazaqstannyń (eksporttaǵy úlesi 10,2%) un jáne basqa da ónimderi Belarýs naryǵynda suranysqa ıe. Sondaı-aq bıyl 9 aıda avtomobıl tasymaly kólemi 19%-ǵa artyp, 450,6 myń tonnaǵa jetken, salada oń dınamıka baıqalady.
Qazaqstan men Belarýs úkimetteri ónerkásip kooperasııasyn damytý boıynsha birlesip jumys istep otyr. Jalpy pýlǵa 1,8 myń jumys ornyn ashýǵa múmkindik beretin, quny $277,5 mln-dy quraıtyn 14 joba kiredi. Onyń ishinde Qazaqstan óńirlerinde $200 mln-nan astam somaǵa 11 birlesken kásiporyn iske qosylyp, 1,6 myń jumys orny ashyldy. Zaýyttarda traktorlardy, astyq jáne jemshóp jınaıtyn kombaındardy, tirkelmeli aýylsharýashylyq tehnıkalaryn qurastyrady. Taǵy 3 joba iske asyrý satysynda tur.
Temir jol ónimderin shyǵaratyn jáne Belarýs eline relsterge bekitilgen shpaldar, fıtıngtik platformalar, temir jol dóńgelekteri, toraptar jáne agregattar jetkizýdi uıymdastyrý múmkindigi bar Qazaqstan kompanııalarynyń eksporttyq áleýetine erekshe nazar aýdaryldy.
Kelissózder nátıjesinde ekijaqty birqatar qujatqa, atap aıtqanda, Qazaqstan men Belarýs úkimetteri arasyndaǵy birlesken jobalar pýlyn tolyqtyrýǵa jáne isker toptar arasynda tyǵyz baılanys ornatýǵa baǵyttalǵan 2025-2029 jyldarǵa arnalǵan saýda-ekonomıkalyq yntymaqtastyqty damytý jónindegi jol kartasy; «Kazakh Tourism» UK» AQ men Belarýs Respýblıkanyń Ulttyq týrızm agenttigi arasyndaǵy ekologııalyq, medısınalyq, taý shańǵysy, aýyl týrızmi jáne balalar men jasóspirimder týrızmi salasynda tájirıbe almasýdy kózdeıtin yntymaqtastyq týraly kelisim; Mádenı-gýmanıtarlyq yntymaqtastyq salasyndaǵy ózara is-qımyl jónindegi 2025-2026 jyldarǵa arnalǵan is-sharalar josparyna qol qoıyldy.
Sondaı-aq Mınsk qalasyndaǵy Joǵary tehnologııalar parkine barǵan sátte Oljas Bektenovke «bultty» tehnologııalarda, kıberqaýipsizdik, qarjy sektory jáne basqa da salalarda júzege asyrylatyn sıfrly jobalar usynyldy.
