Jıyn barysynda qazaqtyń tuńǵysh farabıtanýshysy Aqjan ál-Mashanıge arnalǵan murajaı saltanatty túrde ashyldy. Oǵan Parlament depýtattary, Halyq qaharmany Toqtar Áýbákirov, Iran Islam Respýblıkasynyń elimizdegi elshiliginiń mádenı isteri jónindegi keńesshisi Álı Ákbar Talebı Matın arnaıy shaqyrylyp, ǵulama ǵalymnyń ómir arnasynan syr shertetin taǵylymǵa toly ǵumyryn nasıhattap, qundy estelikterin bólisti.
– Aqjan ál-Mashanıdiń eńbekterin áli de nasıhattaýymyz qajet. Aldaǵy jyly ǵalymnyń 120 jyldyq mereıtoıy atalyp ótedi. Ony keń aýqymda uıymdastyryp, jas ǵalymdardy tárbıeleýge yqpal etýimiz tıis, – dedi Qoljazbalar jáne sırek kitaptar ulttyq ortalyǵynyń dırektory Jandos Bekdildauly.
Eki bólimnen turatyn jıynǵa Aqjan Jaqsybekulynyń urpaqtary da qatysty. Konferensııa barysynda «Mashanıtaný» oqýlaryn jyl saıyn ótkizýdi rásimge aınaldyrý, ǵalymnyń qalamynan týǵan 23 qoljazbany jańa teorııalyq-metodologııalyq turǵyda zerttep, ǵylymı eńbekter daıyndaý, Aqjan ál-Mashanı atyndaǵy №92 mektep-lıseıiniń úzdik oqýshylaryna «Tuńǵysh farabıtanýshy-ǵalym» atyndaǵy shákirtaqyny taǵaıyndaý, mektep baǵdarlamasyna 5-11 synyptarǵa arnalǵan «Mashanıtaný» atty tańdaý pánin engizý sııaqty usynystar aıtyldy.
