Sýrette: «Aınalaıynǵa» aq jol.
Elimizde tuńǵysh ret jaryq kórgen mundaı kitaptar ınklıýzıvtik qoǵam qurýda Prezıdent Qasym-Jomart Toqaevtyń bastamasyna ún qosýdyń jarqyn kórinisi. Kórý múmkindigi shekteýli balalarǵa arnalǵan qazaq tilindegi bul kitapty úlken tırajben jáne júıeli túrde basý jobasy kópshilik tarapynan qoldaýǵa ıe bolyp, oqyrmandarynyń ystyq yqylasyna bólendi. Jınaqqa 22 avtordyń áńgimeleri men óleńderi endi. 1000 danamen shyqqan jınaq elimizdiń barlyq óńirindegi zaǵıp balalar oqıtyn mektep-ınternattarǵa túgeldeı taratylatyn bolady.
Kitaptyń tanystyrylymynda Senat depýtaty Amangeldi Tolamısov Qazaqstan Respýblıkasy Senatynyń tóraǵasy Máýlen Áshimbaevtyń ystyq yqylasyn jetkizdi.
«Adamdy adam etken – kitap, adamzat etken – kitaphana», dep jazýshy Ábish Kekilbaev aıtyp ketkendeı, kitap – jansaraıdy baıytar jalǵyz qazyna. Sondyqtan bul kóp kitaptyń biri emes, zaǵıp jandardyń rýhanı dúnıesin baıytýǵa, oı-órisin keńeıtýge arnalǵan jaryq sáýle, bilim men shyǵarmashalyqtyń qaqpasyn ashatyn kilt», dedi Almaty oblystyq máslıhatynyń hatshysy Qýat Baıǵodjaev.
Saltanatty sharada Májilis depýtaty Maksım Rojın braıl qarpindegi tuńǵysh qazaq tilindegi kitaptyń jaryqqa shyǵýymen quttyqtaı kele, bul jumystyń jalǵasyn tabaryna senim bildirdi. Al Jazýshylar Odaǵynyń múshesi, aqyn Almas Ahmetbekuly bul kitapty qalamgerler qýana quptap, Qazaqstan jazýshylarynyń kitap shyǵarýdyń taǵy bir salasyna jasaǵan alǵashqy qadamy ekenin atady. Sondaı-aq zaǵıp jandarǵa arnalǵan respýblıkalyq kitaphana dırektory Ashat Qusaıynuly, jazýshy Dildár Mamyrbaeva zaǵıp balalarǵa arnalǵan qazaq tilindegi tuńǵysh ádebı kitaptyń qundylyǵyn joǵary baǵalady.
«Oqyrmanǵa jol tartqan «Aınalaıyn» kitaby kóz janarynan erte aıyrylǵan balalarǵa arnalyp otyr. Olardyń da kúni erteń juldyzy jarqyrap el azamaty bolary sózsiz. Kitap ár balanyń mańdaıynan ıiskep, júregine tereń boılaıtyn syrlas dosy bolatynyna senemiz. Jobamyzǵa qoldaý kórsetken Almaty oblysynyń ákimdigine erekshe iltıpatymyzdy bildiremiz. Bul bizdiń jumysymyzdyń basy ǵana. Izgilikti is jalǵasady. Zaǵıp kóretin til – meıirim. Álemdegi barlyq bala baqytty bolýǵa jaralǵan. Al, baqyt siz ben bizdiń birge qol ustasyp, úlken álemge qadam basýymyz», dedi «Bilte Qory» qoǵamdyq qorynyń prezıdenti, aqyn Maqpal Mysa.
Erekshe balalardy kórkem sóıleýge mashyqtandyryp, adamı-tulǵalyq qasıetterin qalyptastyrýǵa septesetin jınaqtyń tusaýkeseriniń sońynda estrada juldyzdary men oblystyq Súıinbaı atyndaǵy fılarmonııanyń ártisteri óner kórsetti.
Almaty oblysy.
