Týrnırdiń ashylý saltanatynda KazChess pen Astana IT University arasynda yntymaqtastyq týraly memorandýmǵa qol qoıyldy. Memorandým nátıjesinde shahmatty damytýǵa jáne keńinen taratýǵa baǵyttalǵan birlesken is-sharalar júzege asyrylmaq.
Bıylǵy jarysqa 12 óńirden kelgen 35 komanda, onyń ishinde Astana qalasynan 19 komanda, barlyǵy 174 oıynshy qatysty. Týrnırdiń júlde qory - 3 mıllıon teńge, saıys shveısarııalyq júıe boıynsha 7 týr kezeńimen ótti.
Osy olımpıadada ár komanda – 4 mektep oqýshysy jáne 1 muǵalimnen jasaqtaldy. Jas sanaty eskerilip 17-ge, 14-ke, 12-ge deıingiler boıynsha taqtalarǵa bólindi, al 4-shi taqtada qyzdar oınady. Sondaı-aq muǵalimder 5-shi taqtada, reıtıng boıynsha saıysty.
7 týrdyń qorytyndysynda Pavlodar qalasyndaǵy №29 mekteptiń komandasy chempıon atandy. 2-oryndy respýblıkalyq fızıka-matematıka mektebiniń komandasy oljalady. 3-oryn Astanadaǵy Nazarbaev zııatkerlik mektebiniń quramasyna buıyrdy. 4-oryndy Almatydaǵy Súleımen Demırel atyndaǵy mektep-ınternat-kolledjiniń shahmatshylary, 5-oryndy Almaty oblysyna qarasty Talǵar qalasyndaǵy A.Baıtursynuly atyndaǵy №7 mektep-lıseıden kelgen komanda ıelendi. Júlde alǵan komandalar qomaqty aqshalaı syıaqy aldy.
Bıyl ekinshi márte uıymdastyrylǵan «Chess Class» Olımpıadasy – elimizdiń bilim berý júıesinde shahmatty keńinen taratýdyń aýqymdy baǵdarlamasynyń biri. Búginde federasııa beıindik vedomstvolarmen jáne seriktestermen yntymaqtasa otyryp, 550 mekteptiń 1-synyptaryna arnap «Shahmat negizderi» baǵdarlamasyn engizdi, 42 mektepte baǵdarlamany 2-synyptarǵa engizý qolǵa alyndy.
Aıta ketsek, arnaıy ázirlengen baǵdarlama boıynsha tegin oqyǵan 700-den astam muǵalimderge onlaın kýrstar jáne biliktilikti arttyrý kýrstary uıymdastyrylǵan.
Joǵary oqý oryndarymen birge «Shahmat pedagogy» minor baǵdarlamasy ázirlenip, 2025-2026 oqý jylynda iske qosylatyny josparlanyp jatyr.
Byltyr el Úkimeti shahmatty damytýdyń 2023-2027 jyldarǵa arnalǵan keshendi josparyn bekitken edi. Soǵan sáıkes KazChess mektepterde shahmat kabınetteri jelisin keńeıtýdi, stýdentterdiń jáne mektep oqýshylarynyń shahmat lıgalaryn damytýdy, sondaı-aq muǵalimderge arnalǵan onlaın týrnır ótkizbek.
