Eske salsaq, byltyr «Abaı» baspasynan shyqqan 35 kitaptyń tusaýkeseri ótken kezde baspa ujymy «Aldaǵy jyly qazaqtyń kórkem ádebıet týyndylaryn 100 tomdyqqa jetkizemiz» degen ýáde bergen edi. Bıyl baspa sol ýádesin artyǵymen oryndap, júz elýden astam kitap jaryq kórip, oqyrmanǵa jol tartty.
Kórkem ádebıetten bólek, baspanyń qorjyny bıyl qundy dinı-rýhanı baǵyttaǵy, tarıh salasy boıynsha qyzyqty kitaptar men aýyz ádebıetiniń jaýharlarymen de tolyqty. Atap aıtsaq, «Uly tarıh jáne uly áýlıeler», «Uly dala aqıqaty», «Taraz – órkenıetter órimderiniń kýágeri», «Qarahan baba men Aısha bıbi», Altybarmaq babamyzdyń «Muhammedtiń paıǵambarlyq dálelderi», «Turmys-salt jyrlary», «Batyrlyq jyr-dastandar», «Lıro-epostyq jyrlar», «Turmys-salt ertegileri», «Ańyz-áńgimeler», «Qııal-ǵajaıyp ertegiler», «Aýyz ádebıetiniń shaǵyn túrleri», «Haıýanattar týraly ertegiler», taǵy basqalar.
«Abaı» baspasynan jaryq kórgen kórkem ádebıet kitaptarynyń kóshin Dýlat Babataıuly, Hakim Abaı, Shákárim, Máshhúr Júsip Kópeıuly bastap, Muhtar Áýezov, Alashorda qaıratkerleriniń shyǵarmalary men keńes odaǵy zamanynyń áıgili qalamgerleri jalǵastyrady. Sonymen qatar atalǵan baspa oqyrmannyń sóresin táýelsiz Qazaqstannyń kórnekti jazýshylary men belgili jas avtorlardyń shyǵarmalarymen tolyqtyryp otyr.
Jańa kitaptar álemdik suranysqa saı, zamanaýı úlgide, boıaýy baı, biregeı dızaında jasaqtalyp, ózine tán tartymdylyǵymen erekshelenedi. Budan bólek bıylǵy tusaýkeserde «Abaı» baspasy qazaq avtorlary men otandyq baspalar úshin taǵy bir tosyn syı jasady. Ol – elektrondyq jáne aýdıokitaptar jarııalanatyn biregeı ınternet platforma. «Bookstagram» dep atalatyn mobıldik qosymsha arqyly baspa endi qalyń oqyrmanǵa qazaq kitaptaryn qoljetimdi etip bergisi keledi. Bul mobıldik qosymshany damytyp, eldiń súıikti onlaın kitaphanasyna aınaldyrý arqyly qazirgi tańda avtorlyq quqyqtardy óreskel buzyp, qazaq kitaptaryn túrli áleýmettik jeli arqyly jónsiz taratyp jatqan pırattyq qosymshalarǵa tosqaýyl qoımaq.
Baspa ujymy elektrondy kitaptar platformasyn azııalyq «Amazon» deńgeıine kóteremiz dep maqsat qoıyp otyr. Iаǵnı eń aldymen platformada qazaq kitaptaryn jarııalap, testileýden ótkizip, aldaǵy jyldary «Túrkistan aımaǵy» dep atalatyn halyqaralyq óńirdiń naryǵyna shyǵýdy kózdeıdi. Atalǵan platforma arqyly kúlli túrkitildes avtorlardyń basyn biriktirip, bolashaqta ınternet keńistikte túrkitildes ádebı, ǵylymı kitaptardyń ortaq álemin qalyptastyrmaq.
«Súmbile juldyzy týǵanda» degen kitabym shyqty. Munda burynǵy óleńderimmen qatar jańa jazylǵan «Jasyl tún» degen poemam kirip otyr. Árıne, sózsiz qýanyshtymyn. Mundaı ıgi bastama men úshin ǵana emes, barsha qalamger úshin úlken bir jaqsylyq dep oılaımyn», deıdi aqyn Murat Shaımaran.
«Uly aǵartýshylardan bastap búkil qazaqtyń aýyz ádebıeti, folklory bar – sonyń bárin qosqan kezde qyryq paıyzyn quraıdy. Al qalǵan qyryq paıyzy – keńes ókimeti men táýelsiz zamandaǵy ómir súrgen bizdiń klassık aqyn-jazýshylarymyz. Qalǵan bóligi jas avtorlarmen tolyqtyrylyp otyr», deıdi «Abaı» baspasynyń dırektory Aqberen Elgezek.
Aıta keteıik, «Abaı» baspasy barlyq kitapty óz qarjysyna shyǵaryp, satyp, avtorlarǵa qomaqty qalamaqy tóleıtin jaǵdaıǵa da jetti. Bıyldyń ózinde 50-den astam avtor men qaıtys bolǵan avtorlardyń muragerleri «Abaı» baspasynan túrli somadaǵy qalamaqy aldy. Al aldaǵy jyly kitap assortımentin kóbeıtip, qoǵamdy kitap oqýǵa shaqyratyn birqatar qyzyqty joba usynbaq.
