Omega-3 toq ishek, asqazan, ókpe isikteriniń, al omega-6 mı qaterli isigi men melanomanyń aldyn alady. Mamandar maı qyshqyldaryn tabıǵı ónimderden alý úshin balyq, jańǵaq, ósimdik, záıtún maılaryn tutynýǵa keńes beredi. Ásirese omega-3 pen omega-6 tepe-teńdigin 1:1 deńgeıinde ustaý júrek-qantamyr aýrýlary men onkologııanyń aldyn alýǵa kómektesedi.
Jasandy ıntellektiniń jadynda qalasyz
Gemini chat-botyna qoldanýshynyń jeke qalaýlary men qyzyǵýshylyqtaryn este saqtaý múmkindigi engizildi.
Endi Gemini chat-boty qoldanýshyǵa qatysty aqparattar men onyń qalaýlaryn este saqtap, jaýaptaryn sol málimetterge beıimdeı alady. Mysaly, júıe qoldanýshysynyń vegetarıandyq taǵamdardy jaqsy kóretinin nemese býhgalter bolyp jumys isteıtinin este saqtaı alady. Qoldanýshylar derekterdi ózderi basqara alady. Olardy óńdeýge, óshirýge múmkindik bar. Alaıda bul qyzmet ázirge tek aǵylshyn tilinde jumys isteıdi ári «Google One AI Premium» jazylymynda ǵana qoljetimdi.
«Bugatti»-diń álemdik rekordy
«Bugatti» kompanııasy ashyq tóbeli W16 Mistral kabrıoletimen 453,91 km/saǵ jyldamdyqqa jetip, beıresmı álemdik rekord ornatty.
Bul kórsetkish «Koenigsegg» kompanııasy 2017 jyly ornatqan rekordtan 6,72 km/saǵ-qa jyldam. 1825 at kúshine teń W16 qozǵaltqyshy kabrıoletke adam sengisiz jyldamdyqqa jetýge múmkindik bergen. «Bugatti» basshysy Mate Rımak endigi maqsat 500 km/saǵ mejesin baǵyndyrý ekenin aıtty. Alaıda bir baǵytta qozǵalý erejelerge saı kelmeıtindikten, bul rekord resmı túrde moıyndalmaýy múmkin.
