Sýret: zhaikpress.kz
Búginde memleket tarapynan óskeleń urpaqty, ásirese aýyl jastaryn qoldaýǵa baǵyttalǵan túrli baǵdarlama az emes. Biraq ol jóninde kóptegen jastar anyq bile bermeıdi. «Oblystyń búkil aýdanyn aralap, jastarmen kezdesýdi maqsat tutqan kerýenniń kózdegeni – osy kemshilikti joıý», deıdi joba jetekshisi Aıbolat Qurymbaev.
Aıbolat Shamuratulynyń aıtýynsha, osy joba aıasynda Qazaqstan Prezıdentiniń jyl saıynǵy Joldaýy men «Táýelsizdik bárinen qymbat» atty maqalasy, «Biz ozyq oıly ult retinde tek qana alǵa qaraýymyz kerek» degen taqyryppen jaryq kórgen suhbaty jastar arasynda tereń talqylanady. Jastar áleýetin damytatyn baǵdarlamalar týraly aqparat beriledi. Sondaı-aq memlekettik baǵdarlamalardy jetildirý boıynsha aýyl jastarynan, tipti oqýshylardan da usynys-pikir jınalady.
Osyndaı jobalardyń arqasynda jastar arasyndaǵy jumyssyzdyq deńgeıi jyldan-jylǵa tómendep, kásipkerlikke boı urǵan jastar kóbeıip keledi. Resmı statıstıka da osyny rastap otyr. Memlekettiń jastarǵa degen qoldaýynyń nátıjesinde oń ózgeris baıqalady.
«Jastar kerýeniniń» alǵashqy sapary Syrym jáne Qaratóbe aýdandarynan bastaldy. Qaratóbede aýdan jastarymen kezdesý barysynda «Otbasy hrestomatııasy» qoǵamdyq qorynyń Batys Qazaqstan boıynsha ókili Svetlana Dúısenbaeva otbasy qundylyqtary týrasynda, Álisher Ǵumarov vıdeografııa salasy boıynsha, «Batys Oil» trenıng ortalyǵynyń nusqaýshysy Svetlana Tenısheva «Alǵashqy kómek kórsetý daǵdylaryn oqytý» taqyrybynda, al joba jetekshisi Aıbolat Qurymbaev «Volonterlik qyzmet» taqyrybynda trenıng ótkizdi.
Kezdesý konserttik baǵdarlamamen aıaqtalyp, jastarǵa jaǵymdy áser syılady. Jastardyń ózekti máseleleri men pikirleri ártúrli bolǵanymen, jobanyń maqsaty – olarǵa qoldaý kórsetý jáne bolashaqqa senimdilikpen qaraýǵa baǵyttaý. Bul maqsat oryndalǵan sııaqty.
«Jastar kerýeni» 11-27 qarasha aralyǵynda Syrym, Qaratóbe, Bórli, Shyńǵyrlaý, Terekti, Tasqala, Báıterek, Aqjaıyq, Qaztalov, Bókeı ordasy, Jánibek, Jańaqala aýdandarynda barlyǵy 1300-ge jýyq jaspen kezdesý ótkizýdi josparlap otyr. Kezdesý barysynda jastardyń ózekti máseleleri tyńdalyp, olarǵa memlekettik baǵdarlamalar, ulttyq qundylyq, kásipkerlik, otbasy tárbıesi jáne t.b. taqyryptarda aqparat beriledi. Trenerler jastarmen pikir almasyp, olardyń suraqtaryna jaýap beredi. Sporttyń túrli salalarynan jetistikke jetken jas sportshylar bos ýaqytty tıimdi ótkizýdiń joldaryn úıretedi. Ár aýdannyń ózekti máselelerine nazar aýdarylady.
Batys Qazaqstan oblysy
