Sýret: informburo.kz
Jobada jasalǵan jumystyń nátıjesi elordada ótken forým aıasynda aıtyldy. Is-sharany Mádenıet jáne aqparat mınıstrligi jáne Qarjylyq monıtorıng agenttiginiń qoldaýymen «Medısına jastary» RQB uıymdastyrdy. Forýmǵa quqyq qorǵaý organdary, bank sektory, qoǵamdyq uıymdar ókilderi men «Alayaq.net» qozǵalysy eriktilerin qosa bas aıaǵy 20 myń adam qatysty. Eldegi joǵary oqý oryndarynyń stýdentteri, Armenııa, Ázerbaıjan, Belarýs, Qyrǵyzstan, О́zbekstannan salyqtyq (qarjylyq) tergeý organdarynyń ókilderi onlaın rejimde qosyldy.
– Memleket basshysy Qasym-Jomart Toqaev óziniń bıylǵy Joldaýynda Úkimetke ınternet alaıaqtyqqa qarsy is-qımyl sharalaryn kúsheıtýdi tapsyrdy. «Alayaq.net» jobasy osy mindettiń oryndalýyn qamtamasyz etýdiń jarqyn úlgisi boldy. Bul bastama ınternet-alaıaqtyqpen, qarjy pıramıdalarymen, dropperlermen kúresýdiń ózekti máselelerin talqylaýǵa, anyqtaýǵa, sondaı-aq jastar arasynda qarjylyq saýatty arttyrýǵa baǵyttaldy, – dedi Mádenıet jáne aqparat vıse-mınıstri Evgenıı Kochetov.
Jıynda qatysýshylar joba nátıjelerin talqylap, tájirıbe almasty. Kıberalaıaqtyqtan qorǵanýdyń jańa ádis-tásilderin de meńgerdi.
«Alayaq.net» jobasynyń negizin qalaýshy Abylaıhan Ábdirashtyń aıtýynsha, qozǵalys belsendileri óńirlerde 125 myńnan asa adamdy qamtıtyn qarjylyq saýat jónindegi marafondardy ótkizgen. Qarjylyq monıtorıng agenttigi, polısııa jáne basqa da vedomstvolardyń qoldaýymen joba 28 memlekettik jáne qoǵamdyq uıymdarmen yntymaqtastyq ornatqan.
– Mádenıet jáne aqparat mınıstrligi, Azamattyq bastamalardy qoldaý ortalyǵy, sondaı-aq jastardyń nıet bildirýimen arnaıy grant bólindi. Joba 2022 jyly bastaldy. Osy ýaqytqa deıin 17 oblys pen 3 qalanyń barlyǵyn tolyq qamtydyq, – dedi A.Ábdirash.
Al joba jetekshisi Nursultan Orynbekov 10 myńnan asa adamǵa tegin qarjylyq onlaın kýrs ótkizilgenin aıtty. Kýrs barysynda bazalyq ekonomıkalyq qarjylyq bilimi qalyptastyrýǵa kóp kóńil bólingen. Qazirgi tańda áleýmettik jelilerdegi aqparattyq jumystar 150 mln-nan asa qaralym jınady. Eki jyl ishinde neshe túrli alaıaqtyq shema áshkerelendi. Onyń logıkalyq tizbegi qandaı bolady, áleýmettik-psıhologııalyq turǵydan qandaı adamdar jıi aldanady degen sekildi túrli keıs zertteldi. Joba aıasynda «Alayaq.net» saıty da iske qosyldy. Onyń kómegimen paıdalanýshylar alaıaqtyq oqıǵalary týraly habarlap, qarjylyq saýatyn arttyra alady. Forým sońynda «Alayaq.net» jobasynyń úzdik eriktileri marapattaldy.
