foto Aqorda
Ekonomıkany ártaraptandyrý – ol Úkimettiń aldynda turǵan eń mańyzdy mindetterdiń biri dep aıtýǵa bolady. Memleket basshysy da osy máselege únemi nazar aýdarady. Sondyqtan Úkimet jáne quzyrly organdar osy baǵytta belsendi jumys jasap jatyr. Premer-mınıstrdiń aıtýynsha óńdeý ónerkásibiniń úlesi 47%-dy qurasa, shıkizat sektorynyń úlesi 45%-dy quraǵan.
«Osy baǵytta ári qaraı da belsendi jumys atqarý kerek. Qabyldanǵan sheshimderdiń arqasynda, ózderińiz biletindeı, biz qazir birinshi kezekte shıkizatty eksportqa emes, ishki naryqqa jiberip jatyrmyz. Osy sharalardyń nátıjesinde biz qazir alıýmınıı men mys boıynsha óńdeý kórsetkishterin eki esege ulǵaıttyq. Bul – durys nátıje.
Jalpy ekonomıkany ártaraptandyrý baǵytynda óte mańyzdy másele – ol otandyq óndirýshilerdi qoldaý. Mysaly, memlekettik satyp alý sheńberinde. Osy baǵytta da tıisti sharalar qabyldanyp jatyr. Biz qazir tek qazaqstandyq taýar óndirýshilerden satyp alynatyn taýarlardyń tizbesin 1,5 myńnan 4,5 myńǵa deıin taýarlyq pozısııaǵa jetkizdik. Ol degen úlken qoldaý. Iаǵnı, kez kelgen memlekettik organ nemese kvazımemlekettik kompanııa osy tórt jarym myń taýarlyq pozısııa boıynsha eshqandaı ımporttyq taýarlardy satyp ala almaıdy, tek Qazaqstanda jasalǵan taýarlardy satyp ala alady.
Osy sharanyń nátıjesinde bıyldyń ózinde qazaqstandyq taýar óndirýshilermen jasalǵan kelisimsharttardyń sany 55%-ǵa ósti, ıaǵnı osy kelisimsharttardyń jalpy somasy 350 mlrd teńgege deıin jetti», dedi Oljas Bektenov.
Úkimet basshysy taǵy bir mańyzdy qadam – ol otandyq óndirýshilermen ofteık-kelisimsharttardy jasaý ekenin atap ótti.
«Osy baǵytta da qazir Úkimet jáne Samuryq-qazyna qory belsendi jumys jasap jatyr. Bıyl ofteık-kelisimsharttardyń jalpy somasy 134 mlrd teńgege deıin jetti. Bul kórsetkish ótken jyldyń sáıkes kezeńimen salystyrǵanda 14 esege joǵary.
Sonymen qatar elimizdiń barlyq óńirlerinde iri-iri óndiristik jobalar iske asyrylyp jatyr. Mysaly Atyraý oblysynda polıpropılen shyǵaratyn zaýyt ashyldy. Onyń jyldyq óndiristik qýattylyǵy 1 mln tonna polıpropılen. Salystyratyn bolsaq, Ortalyq Azııa jáne Ońtústik Kavkazdaǵy barlyq munaı-gaz hımııa zaýyttaryn alatyn bolsaq, bizdiń Atyraýdaǵy zaýyttyń qýattylyǵyna jetpeıdi. О́te iri jáne zamanaýı óndiris.
Qostanaı qalasynda Kia kompanııasy qazir ózderiniń tolyqqandy sıkl boıynsha avtomobıl shyǵaratyn zaýytyn salyp jatyr. Kelesi jyly iske qosylatyn bolady. Almatyda mýltıbrend avtomobıl shyǵaratyn zaýyt ashylady.
Saran qalasynda avtomobıl shınalaryn shyǵaratyn zaýyt ashyldy. О́te iri, zamanaýı óndiris. Osyny jalǵastyrýǵa bolady. Men aıtyp ótkendeı, árbir óńirde osyndaı iri jobalar bar.
Qabyldanyp jatqan sharalardyń nátıjesinde óńdelgen ónim eksporty 6,4%-ǵa ósip jatyr, kerisinshe daıyn ónim ımporty 7,2%-ǵa tómendedi. Biraq, árıne biz Úkimet, quzyrly organdar osy baǵytta ári qaraı da belsendi jumys atqarýdy jalǵastyramyz», dedi Premer mınıstr.
