Bas prokýratýranyń málimetinshe, 75 esirtki zerthanasynyń qyzmeti toqtatyldy, 87 adam, onyń ishinde jaqyn jáne alys shetel azamattary (Moldova, Latvııa, Úndistan jáne t.b.) ustaldy. 1,3 tonnadan astam sıntetıkalyq esirtki zattary tárkilendi.
Esirtki satýmen aınalysatyn 13 qylmystyq toptyń, onyń ishinde 2 transulttyq qylmystyq toptyń áreketi áshkerelendi.
«Bas qadaǵalaýshy organ esirtkige qarsy «Nashakorlyqqa jol joq» is-sharasyn turaqty túrde ótkizip keledi. Nátıjesinde esirtkini nasıhattaǵany úshin 17 adam ustalyp, 10 myńnan astam narko jazbalar (graffıtı) joıyldy», delingen habarlamada.
Zamanaýı tehnologııanyń damýy esirtki satýmen aınalysatyn adamdardyń ınternet-platformalardy paıdalanyp, uzaq ýaqyt tasada qalýyna jáne barlyq prosesti qashyqtan basqaryp otyrýlaryna yqpal etti.
«Qazirgi tańda esirtki dúkenderiniń «kýratorlary» jáne esirtki bıznesiniń basqa da uıymdastyrýshylary, sonyń ishinde esirtki saýdasynan túsken zańsyz tabysqa jaýapty adamdar ustaldy», dep habarlady Bas prokýratýra.
Tártip saqshylary esirtki bıznesiniń árbir býynyn, ıaǵnı esirtki jarnamalaýshydan bastap esirtki saýdasyn uıymdastyrýshylarǵa deıin anyqtaýǵa bel baılaǵan.
