Ejelden qońsy elderdiń keıingi býynyn jaqsylyq pen jarqyn keleshek jolyna jumyldyrýdy kózdeıtin slettiń ashylýyna Qazaqstannyń Mádenıet jáne aqparat mınıstri Aıda Balaeva, Reseı Federasııasy Prezıdenti ákimshiliginiń Sheteldermen óńiraralyq jáne mádenı baılanystar jónindegi basqarmasy basshysynyń orynbasary Anton Rybakov, eki eldiń volonterlik qozǵalys ókilderi qatysty.
A.Balaeva jınalǵandardy aldaǵy Halyqaralyq volonter kúnimen quttyqtaı kele, memleket pen volonterlik qaýymdastyq arasyndaǵy seriktestiktiń mańyzyna toqtaldy.
«Qazaqstan Prezıdenti Qasym-Jomart Toqaev volonterler qyzmetine úlken kóńil bólip keledi. Ásirese osy saladaǵy halyqaralyq yntymaqtastyqty damytýǵa basa nazar aýdaryp otyr. Búgin biz Qazaqstan men Reseıdegi volonterler qozǵalysy qýatty shyǵarmashylyq kúshke aınalyp, meıirimdi azamattardyń judyryqtaı jumylýynyń jarqyn úlgisine, halyqtar arasyndaǵy baılanystardy nyǵaıtatyn, mańyzdy áleýmettik máselelerdi sheshýge yqpal etetin qozǵalysqa aınaldy dep senimmen aıta alamyz», dedi mınıstr.
Sondaı-aq A.Balaeva Memleket basshysynyń bastamasymen 2020 jyldyń elimizde «Volonter jyly» dep jarııalanǵanyn, bul eriktiler qozǵalysyna qýatty serpin bergenin aıtyp, Qazaqstandaǵy volonterlikti memlekettik qoldaý sharalaryna toqtaldy.
Memlekettik organdar jyl saıyn volonterler qaýymdastyǵymen birlesip 50-den asa jobany, bastamalardy iske asyrý úshin 240 shaǵyn grant beredi. Búginde elimizde 240 myńnan asa belsendi volonter bar, 740-tan asa volonterlik uıym jumys istep otyr, myńnan asa bastamashyl toptardyń da áreketi tabyssyz emes.
Sondaı-aq jıyn barysynda mınıstr 2025 jyly tabıǵatty qorǵaýǵa baǵyttalǵan is-sharalardy ózekti etý maqsatynda birlesken ekologııalyq aksııalar, kórmeler, semınarlar men konferensııalar ótkizýdi usyndy.
Volonterler sletinde sóz alǵan Reseı Federasııasy Prezıdenti ákimshiliginiń Sheteldermen óńiraralyq jáne mádenı baılanystar basqarmasy basshysynyń orynbasary Anton Rybakov Qazaqstan tarapyna osy jıynǵa uıytqy bolǵany úshin alǵysyn bildirdi.
«Birlesken jobalardy sapalyq turǵyda jańa deńgeıge kóterýdegi negizgi bastamashylardyń biri – Qazaqstan Prezıdenti Qasym-Jomart Toqaev. Bul biz úshin óte mańyzdy. Qazaqstan volonterlermen jumys isteýde úlken tájirıbege ıe. Biz bul baǵytty tolyq qoldaımyz jáne búgingi kezdesýdiń mańyzdylyǵy keler jyly, biz josparlaǵandaı, Reseı men Qazaqstan volonterleriniń «Tatý kórshilik» atty tolyqqandy forýmy ótetininde dep bilemiz. Bul bizdiń elderimiz arasyndaǵy birlesken jobalar portfelin baıyta túsedi dep senemin. Volonterlik ıdeıany nasıhattaý men volonterlik qozǵalysqa kóbirek adam tartý qoǵamdy biriktirip, dástúrli moraldyq jáne rýhanı qundylyqtardy nyǵaıtýǵa yqpal etedi», dedi ol.
Slet aıasynda volonterlerge tanymdyq dárister, semınar-trenıngter uıymdastyryldy. Sondaı-aq reseılik qonaqtarǵa Almaty qalasyndaǵy komıýnıtı ortalyqtarynyń jumysy tanystyryldy.
ALMATY
