foto: polisia.kz
«Basty qaǵıdat – zań men tártip. IIM ózindik qaýipsizdik departamenti jedel basqarý ortalyqtary men patrýldik qyzmettiń jumysyn belsendi qadaǵalap jatyr. Jedel basqarý ortalyqtary patrýldik polıseılerdiń jumysyn táýlik boıy baqylaýda ustaıdy. Qyzmetkerler ózdigimen sóndire almaıtyn «smartjetondarmen» jabdyqtalǵan. Bul qurylǵylar belgilengen talaptardan aýytqýǵa múmkindik bermeıdi, barlyq áreket únemi jazylyp otyrady», dedi departament bastyǵy Shyńǵys Alekeshov.
Budan basqa, jasandy ıntellekt qosylǵan beınebaqylaý kameralarynan alynǵan derekterdi taldaıtyn júıe qoldanylady.
«Bul kez kelgen quqyq buzýshylyqty anyqtaýǵa jáne ony jedel áshkereleýge múmkindik beredi. Polısııanyń jumysy árbir zań buzýshyny onyń mártebesi men laýazymyna qaramastan tıisti jaýapkershilikke tartýǵa baǵyttalǵan. Eshkimge eshqandaı artyqshylyq berilmeıdi. Patrýldik polıseıler zań talaptaryn qatań túrde saqtaıtynyn atap ótkim keledi. Olardyń tarapynan kez kelgen zańsyz áreketter úshin sáıkesinshe jaýapkershilik kózdelgen. Biz azamattardy zańdy saqtaýǵa, polıseılerdiń zańdy talaptaryn oryndaýǵa, laýazymdy tulǵalarǵa para usyný áreketterine barmaýǵa shaqyramyz», dedi Sh.Alekeshov.
Sondaı-aq IIM resmı ókili Sybaılas jemqorlyqqa qarsy qyzmet arasynda tıisti memorandýmǵa qol qoıylǵanyn eske saldy.
«Onyń aıasynda jemqorlyqpen kúres odan ári nyǵaıa túspek. Eger siz qyzmetkerlerdiń ádepsiz is-áreketteriniń kýási bolsańyz, dereý IIM ózindik qaýipsizdik departamentine nemese 1402 senim telefonyna habarlasyńyz. Tek birlese jumys isteı otyryp, biz qoǵamda qaýipsizdikti, quqyqtyq tártipti jáne ádilettikti qamtamasyz ete alamyz», dedi departament bastyǵy – IIM resmı ókili Shyńǵys Alekeshov.
