«Jer ana» fılminiń qoıýshy-operatory Ismael Blanko Ispanııanyń bos qalyp, qurdymǵa ketken aýyldary týraly sóz qozǵady. О́mir boıy aýylynyń shańyn jutyp, dala tósinde emin-erkin júrgen turǵyndardyń kúnkórisi qıyndap ketken. Bul jerlerde ómir úshin kúresýge týra keledi. Fılmde shól dala men megapolıstiń tynys-tirshiligi, artta qalǵan kúnder men jaılylyqqa toly bolashaq sýrettelip, qarama-qaıshylyqtar beınelengen.
«Bul aýyldardyń turǵyndary kəsibı akterler emes. Olardyń bet-əlpeti men sóıleý məneri tarıhtan syr shertedi. Ony oıdan shyǵarý múmkin emes», deıdi ol.
Qyrǵyz rejısseri Dastan Japar Ryskeldı shynaıy oqıǵa negizinde túsirilgen «Shekaradaǵy məmile» fılmin usyndy. Onyń týyndysy Ortalyq Azııa jəne túrki elderi baıqaýyna qatysýda.
«Meniń aǵam quldyqta boldy. Bul 2000 jyldary bolǵan jaǵdaı, biraq osyǵan uqsas oqıǵalar əli de qaıtalanyp keledi. Biz ózderin qorǵaı almaıtyn adamdar úshin osy týraly ún qatýymyz kerek», deıdi rejısser.
Osy fılm arqyly Dastan Japar Ryskeldı búkil Ortalyq Azııa elderinde ózektiligin joǵaltpaǵan quldyq məselesine qatysty janaıqaıyn jetkizbek.
Tatar rejısseri Salavat Iýzeevtiń «Ǵashyqtar taýy» fılmi adam janynyń asyl qasıeti mahabbat pen əsemdigin joǵaltpaıtyn tabıǵattyń kıeli ekenin beıneleıdi. Fılm keıipkeri mahabbat sertimen baılanysy bar taýdy barynsha qorǵaýǵa tyrysady.
«Bul taý tek tabıǵattyń kórkem syıy emes. Bul keıipkerdiń adaldyǵy men rýhanı kúshiniń sımvoly», dedi Salavat.
Kınofestıvalde erekshe əser qaldyrǵan fılmderdiń biri – Arýan Anartaıdyń «Joqtaý» kartınasy. Atalmysh týyndy Ortalyq Azııa jəne túrki elderi baıqaýynda baq synasýda. Otandyq rejısserdiń fılmin tamashalaý úshin kórermender kezekke turyp, zaldyń ishinde ıne shanshar oryn tabylmady.
«Ssenarıı jazý barysynda men əli de qaıǵydan qan jutyp otyrdym. Joqtaý ıgi adamdardyń dúnıeden ótkenine ókinip, olardy eske túsirý úshin aıtylatyn sóz ǵana emes. Bul bizdiń mədenıetimiz, məńgi mekenge ketkendermen syrlasýdyń joly», dedi rejısser.
«Joqtaý» fılmi jeke qaıǵy men dala dəstúriniń ulylyǵyn úılestire otyryp, kórermenderdi tereń tebirentti.
