«Uzakrota Travel Summit» – týrıstik ındýstrııadaǵy mańyzdy sharalardyń biri. Onyń barysynda týrızm salasyndaǵy jyl ishindegi nátıjelerge sáıkes 40 atalym úzdikteri anyqtalady. «Kazakh Tourism» kompanııasymen qatar Saýd Arabııasy, BAÁ, Serbııa, Ońtústik Koreıa, Ońtústik Afrıka, Taıland, Irlandııa memleketteriniń túrli týrıstik uıymdary da óz elderiniń halyqaralyq týrıstik arenadaǵy bedelin arttyrýǵa qosqan úlesi úshin úzdik bolyp tanyldy. Jeńimpazdar bedeldi sarapshylar men keń kólemdi aýdıtorııanyń pikiri negizinde anyqtaldy. Elimiz «Uzakrota Travel Awards» syılyǵymen alǵash ret marapattalyp otyr.
«Kazakh Tourism» ulttyq kompanııasy» Úkimettiń 2017 jylǵy 14 shildedegi № 428 qaýlysymen Jarǵylyq kapıtalyna memleket júz paıyz qatysatyn aksıonerlik qoǵam retinde qurylǵan. Kompanııa qyzmetiniń negizgi baǵyty – halyqaralyq kórmeler uıymdastyrý, ótkizý, balalar men jasóspirimder týrızmin, medısınalyq týrızmdi damytý, kelý týrızminiń aǵysyn kóbeıtý, jármeńkeler, aýksıondar, el ımıdjin ilgeriletýge baǵyttalǵan iskerlik, oıyn-saýyq is-sharalaryn uıymdastyrý.
Sammıtke álemniń 110 elinen 15 myń delegat qatysty. «Kazakh Tourism» qatysýshylarǵa elimizdiń týrıstik áleýeti men ınvestısııalyq múmkindikterin tanystyrdy. 2025 jyly elimiz halyqaralyq EMITT týrıstik kórmesine qatysady. Onyń arqasynda Túrkııamen, basqa eldermen týrıstik baılanystardy nyǵaıtý kózdelip otyr.
Túrkııa – TMD elderin esepke almaǵanda, elimizge keletin týrıster sany jóninen ekinshi orynda. 30 kúnge deıingi vızasyz rejim, qos memleket arasyndaǵy turaqty tikeleı reıster kelýshiler qatarynyń artýyna yqpal etedi. Bıylǵy jyldyń úsh toqsanynda elimizge kelgen túrik týrısteriniń sany 2023 jyldyń sáıkes kezeńimen salystyrǵanda 12%-ǵa artty.
Bıyl halyqaralyq «Lonely Planet» baspasy «Best in Travel» reıtınginde elimizdi 2025 jyly saıahattaýǵa bolatyn eń úzdik elderdiń biri retinde belgilegenin atap ótken jón.
