Memleket basshysy Qasym-Jomart Toqaev: «Kitaphana – memlekettiń, ulttyń negizgi jady. Elimiz úshin qundy tarıhı derekter men materıaldardyń deni kitaphanada saqtalady. Sondyqtan kitaphana isin damytýǵa beıjaı qaraýǵa bolmaıdy», dep atap ótkendeı, «Folıant» baspasy da kitap oqıtyn ult qalyptastyrý jolynda kóptegen is-sharalar uıymdastyryp, osy salada belsendi eńbek etip kele jatqanyn oqyrman qaýym jaqsy biledi. Atalǵan is-shara barysynda Ispanııa Koroldiginiń Qazaqstandaǵy elshisi Lýıs Fransısko Martınes «Folıant» baspasynyń dırektory Nurlan Sársenbiuly Isabekovke Ispanııa Koroldiginiń katolıktik Izabella ordenin tabys etti. Katolıktik Izabella ordeni – ǵylym, mádenıet jáne bilim salasyndaǵy halyqaralyq deńgeıde eleýli jetistikterge qol jetkizgen tulǵalarǵa beriletin joǵary marapattyń biri. Bul marapat – Nurlan Isabekovtiń baspa salasyna sińirgen eńbeginiń halyqaralyq deńgeıde baǵalanýy jáne Qazaqstan men Ispanııa arasyndaǵy mádenı jáne ádebı baılanystardy nyǵaıtýǵa qosqan úlesiniń nátıjesi. Is-sharany jazýshy, Qazaqstannyń eńbek sińirgen qaıratkeri, kórnekti jazýshy Álibek Asqarov júrgizdi. Memlekettik syılyqtyń laýreaty, jazýshy Tólen Ábdik: «Osyǵan deıin «Folıant» baspasy sheteldik klassıkalyq shyǵarmalardy aýdaryp, baspadan shyǵaryp, oqyrmanyn tánti etti. Endi bul baspa qazaq ádebıetiniń keremet shyǵarmalaryn shetelge tanystyrsa degen oıdamyz» degen tilegin bildirdi.
30 jylǵa jýyq tarıhy bar «Folıant» – elimizdegi kópsalaly jetekshi baspalardyń biri. Baspanyń negizgi maqsaty – qazaq oqyrmandaryn álemdik deńgeıdegi ádebıetpen jáne otandyq úzdik shyǵarmalarmen tanystyrý. Al negizgi baǵyttary aıqyn atalǵan baspa qazaq jáne orys tilderinde balalar ádebıeti men kórkem shyǵarmalar shyǵarý; álem ádebıetiniń úzdik týyndylaryn qazaq tiline aýdarý; oqý oryndaryna arnalǵan oqýlyqtardy basyp shyǵarý; álemdik klassıka, zamanaýı proza, tarıhı romandar jáne non-fıkshn janryndaǵy kitaptardy usyný boıynsha ónimdi jumys istep keledi. Sonymen birge jyl saıynǵy «Astana Eurasian Book Fair» eýrazııalyq halyqaralyq kitap kórme-jármeńkesiniń uıymdastyrýshysy. Bul – kitap oqý mádenıetin damytý men baspa ındýstrııasyn qoldaýǵa baǵyttalǵan elimizdegi eń aýqymdy kitap jármeńkesi.
