Foto: Ashyq derekkóz
«Memlekettiń barlyq áleýmettik mindettemeleri tolyq kólemde oryndalyp jatyr jáne odan ári qaraı da oryndala beredi. Bul – Úkimet jumysynyń basym baǵyttarynyń biri», dedi Nurlan Baıbazarov.
Atap aıtqanda, bıyl qańtardan bastap barlyq zeınetaqy men járdemaqylar jyl saıyn ınflıasııa deńgeıin eskere otyryp ındekstelip jatyr. 2025 jyldyń 1 qańtarynan bastap yntymaqty zeınetaqy 8,5%-ǵa, áleýmettik járdemaqylar men bazalyq zeınetaqy 6,5%-ǵa ındeksteledi.
Sonymen qatar Memleket basshysynyń tapsyrmasy boıynsha bazalyq zeınetaqynyń mólsherin kezeń-kezeńimen arttyrý jalǵasyp jatyr. 2025 jylǵa arnalǵan respýblıkalyq bıýdjette 42 túrli áleýmettik tólemder boıynsha 6 trln teńgeden astam qarajat qarastyrylǵan, bul 2024 jylmen salystyrǵanda 12,5%-ǵa kóp.
Respýblıkalyq bıýdjetten jáne Memlekettik áleýmettik saqtandyrý qorynan 2 mln-ǵa jýyq otbasy járdemaqylar men áleýmettik tólemder alady.
«2025 jyldyń basynan bastap balaly otbasylarǵa tólenetin barlyq memlekettik járdemaqy mólsheri 6,5%-ǵa ındeksteledi. Balaly otbasylarǵa arnalǵan járdemaqylardy tóleýge 2025 jylǵa arnalǵan respýblıkalyq bıýdjette 875,1 mlrd teńge qarastyrylǵan. Az qamtylǵan azamattardy áleýmettik qoldaý ataýly áleýmettik kómek kórsetý arqyly jalǵasady. 2023 jyldyń 1 qarashasyndaǵy jaǵdaı boıynsha 76 myń otbasy nemese 403 myń adam AÁK aldy. AÁK kórsetýdiń jańa tásilderin azamattardyń shyǵystaryn eskere otyryp qaıta qaraý sheńberinde bul kómek Sıfrlyq otbasy kartasy jáne memlekettik ári memlekettik emes uıymdardyń júıelerimen ıntegrasııalaý arqyly transformasııalanady», Nurlan Baıbazarov.
Esterińizge sala keteıik, budan bólek, 2024 jyldyń 1 qyrkúıeginen bastap Qazaqstanda stıpendııa kólemi: bakalavrıat boıynsha 20%-ǵa, magıstranttar men doktoranttarǵa 15%-ǵa ósti. Ǵylymı uıymdar qyzmetkerleriniń jalaqysy 18%-ǵa artty, 2025 jyldan bastap 17%-ǵa kóbeıedi.
