Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń bas ǵımaraty aldyna qoıylǵan óner týyndysynyń avtory – Sýretshiler odaǵynyń múshesi Erǵalı Bekeshev.
Eskertkish keshen tot baspaıtyn asyl metaldan jasalǵan. Músindik kompozısııaǵa Oral qalasyndaǵy «Altyn Alma» kompanııalar tobynyń dırektory Aleksandr Elkın demeýshilik etipti.
Oral qalasynyń kórkine kórik qosqan jańa týyndynyń ashylý saltanatyna fılarmonııa dırektory Baýyrjan Halıolla, kúıshi Ermek Qazıev, «Baıtaq» jasyldar partııasynyń Batys Qazaqstan oblysy fılıalynyń tóraǵasy Baqytjan Mushtanov, kompozısııalyq músin avtory Erǵalı Bekeshev qatysyp, sóz sóıledi.
– Búgin erekshe sát, aıtýly kún bolyp tur. О́ıtkeni Qadyr aǵamyzdyń naqylǵa aınalǵan «Naǵyz qazaq qazaq emes, naǵyz qazaq – dombyra» degen sózi bárimizge tanys qoı. Endeshe, dombyraǵa qoıylǵan eskertkish – ultymyzǵa, ult ónerine kórsetilgen qurmet! – dedi Aq Jaıyq óńirinde júrgen halyq dombyrashylarynyń búgingi kózi tiri qarııasy Ermek Qazıev.
Batys Qazaqstan oblysy
