Baýyrmaldyq belgisi

Buǵan Qazaqstan halqy Assambleıasy tóraǵasynyń orynbasary – Prezıdent Ákimshiligi Qazaqstan halqy Assambleıasy hatshylyǵynyń meńgerýshisi Marat Ázilhanov, Shymkent qalasy ákiminiń orynbasary Sársen Quranbek, Dúnıe­júzilik ahysqa túrikteri odaǵy­nyń prezıdenti Zııatdın Kasanov, Túr­kııa Respýblıkasynyń Almaty qala­syndaǵy Bas konsýly Mýderrısogly Evren, «Shymkent qalalyq «Ahysqa» túrik etnomádenı ortalyǵy» qoǵamdyq bir­lestiginiń tóraǵasy, Túrkııa Respýb­lıkasynyń Qazaqstandaǵy qurmetti konsýly Latıpsha Asanovtar qatysty.

Is-shara barysynda qonaqtar Dos­tyq úıi aldyndaǵy «Qazaq eline myń alǵys» monýmentine gúl shoqtaryn qoıdy. Sodan soń ahysqa túrikteri týraly derekter qamtylǵan aqparattyq stendter men qolóner kórmesin tamashalady. Kelýshiler nazaryna KSRO-nyń solaqaı saıasatynan zardap shekken baýyrlas halyq jaıynda arnaıy beınerolık usynyldy.

Qazaqstan halqy Assambleıasy hatshy­lyǵynyń meńgerýshisi M.Ázilhanov sóz alyp, týys halyqtyń qazaq úshin eń ja­­qyn aǵaıynyna aınalǵanyn aıtyp berdi.

«Qazaqstandaǵy etnostar arasynda ahysqa túrikteriniń orny erekshe. 80 jyl boıy qazaqtyń kıeli jerinde ómir súrip, ortaq qundylyqtardy bólise otyryp, tarıhymyzdy birge jazyp jatyrmyz. Osy ýaqyt ishin­de biz qıyndyq pen qýanyshty bóli­sip, dostyǵymyz­dy kúsheıte tústik. 80 jyldyq tarıh – baýyrmaldyqtyń, tózimdilik pen ortaq bolashaqqa degen senimniń jarqyn belgisi», dedi ol.

Al Shymkent qalasy ákiminiń orynbasary Sársen Quranbek shahar basshysy Ǵabıt Syzdyqbekovtiń yqylasyn jetkizip, 1944 jyly bolǵan oqıǵany sanada qaıta jańǵyrtty.

«Alǵash ahysqa túrikteri Qazaqstanǵa qonystanǵanda el basyna kún týǵan, er etigimen sý keshken, at aýyzdyǵymen sý ishken qıyn-qystaý zaman boldy. Stalındik saıasat kóptegen ult ókilin Qazaqstanǵa jer aýdartty. Árıne, olar órkendesin-óssin, kógerip-kóktesin dep oılamaǵany aıdan anyq. Degenmen túbi bir túrki jurtyna qazaq halqy shama-sharqy kelgenshe qolushyn sozdy. Barlyǵy birlesip, búgingi beıbitshilik zamanǵa aman-esen jetti. Qazaqstannyń damýyna ahysqa túrikteriniń qosqan úlesi bar. Olar qazaq halqyna degen rızashylyǵyn bildirdi. Biz de osynsha jyl bizben birge bolǵandaryńyzǵa, ortaq elimizdiń, memleketimizdiń gúl­denýine, órkendeýine qosqan súbeli úlesterińizge alǵys aıtamyz», dedi qala ákiminiń orynbasary.

Is-sharaǵa arnaıy kelgen qurmetti qonaqtar lebizin bildirip, jurt­tyń ys­tyq yqylasyna bólendi. Bir­qa­tar bel­sen­di azamatqa Qazaqstan halqy Assam­bleıasynyń «Alǵys» tósbelgi­si men Shym­kent qalasy ákiminiń Alǵyshaty ta­bys­taldy. Merekelik is-shara kon­sert­tik qoıylymmen jalǵasyn tapty.

Búginde elimizdiń úshinshi megapolısi – Shymkent qalasynda 7 myńǵa jýyq túrik etnosynyń ókili turady. Qala­lyq Qazaqstan halqy Assambleıa­sy janyndaǵy «Shymkent qalalyq «Ahys­qa» túrik etnomádenı ortalyǵy» qoǵam­dyq birlestigi qashan da ıgi bas­tama­larǵa qoldaý bildirip, qoǵamdyq ke­li­sim men jalpyulttyq birlikti nyǵaı­tý jolynda qyzmet etip keledi.

ShYMKENT