Foto: Vedomstvo
Sý resýrstary jáne ırrıgasııa mınıstrliginiń baspasóz qyzmetiniń málim etýinshe atalǵan vedomstvo men Fransııa damý agenttigi (AFD) jáne Fransııanyń geologııalyq jáne taý-ken bıýrosy (BRGM) yntymaqtastyq týraly úshjaqty kelisimge qol qoıdy. Mınıstrlik tarapynan kelisimge qol qoıý rásimine birinshi vıse-mınıstr Bolat Beknııaz qatysty. Qujattyń negizgi maqsaty – Balqash kólin saqtaý baǵytynda yntymaqtastyqty damytý.
Kelisim Sý resýrstary jáne ırrıgasııa mınıstrligine Balqash kóliniń sý resýrstaryn basqarýdy damytýǵa 1,35 mln eýro kóleminde grant bólýdi kózdeıdi. Fransýz tarapy kól basseınine aýqymdy zertteý júrgizedi, onyń nátıjesi boıynsha 2040 jylǵa deıin uzaq merzimdi bas jospar ázirlenedi. Qujatta sý aıdynynyń ishki sýlaryn saqtaý is-sharalary jazylady.
Sonymen qatar mınıstrlik BRGM-men sý resýrstary týraly ózara túsinistik týraly Memorandýmǵa qol qoıdy. Qujat osy saladaǵy ekijaqty yntymaqtastyqty damytýdy kózdeıdi.
«AFD jáne BRGM-men úshjaqty kelisim Balqash kóli basseınindegi sýdy turaqty basqarýǵa jáne zertteýge baǵyttalǵan. Qujat sýdyń jaı-kúıin ólsheý, taldaý, klımattyq-antropogendik áserlerdi modeldeý, sondaı-aq 2040 jylǵa deıin sý balansyn boljaýdy qarastyrady. Jobanyń maqsattarynyń biri – Balqash kóliniń deńgeıin turaqtandyrý úshin Qapshaǵaı sý qoımasynyń jumys tártibin ońtaılandyrý. Zertteý nátıjesi boıynsha ózenderdi tazartý, topyraqtyń tozýyn jáne sýdyń lastanýyn boldyrmaý, balyq sharýashylyǵy men ekologııalyq týrızmdi damytý, sondaı-aq kóldi qorǵaý úshin normatıvtik-quqyqtyq baza qurý jónindegi is-sharalar júrgiziledi», dedi sala mınıstri Nurjan Nurjigitov.
