Byltyr Aqtóbe oblysynda Oqý-aǵartý mınıstrliginiń, «Qazaqstan halqyna» qoǵamdyq qorynyń jáne Bilimdi turaqty damytý qoldaýymen sıfrlyq tehnologııalardy paıdalana otyryp, aýyl mektepteriniń áleýetin arttyrý jónindegi joba tabysty iske asty. Jobaǵa 12 tirek, 134 shaǵyn jınaqty mekteppen birge 11 myńnan astam bi lim alýshy men 3,5 myńǵa jýyq pedagog qatysty. Oǵan qatysqan mektep basshylary men muǵalimder sıfrlyq quzyrettilik pen kásibı damýǵa baǵyttalǵan arnaıy kýrstardan ótti. Shaǵyn jınaqty mektepterdiń tehnıkalyq múmkindigine qaraı oqytýdyń 4 úlgisi ázirlenip engizildi.
«Joba aıasynda tirek mektepteriniń materıaldyq-tehnıkalyq bazasy tolyǵymen jańartylyp, shaǵyn jınaqty mektepter pándik jáne sıfrlyq kabınettermen jabdyqtaldy. Mektepter jyldamdyǵy joǵary ınternetpen qamtamasyz etildi», dedi Ǵ. Beısembaev.
Aıtalyq, joba sheńberinde «Qazaqstan halqyna» qoǵamdyq qory barlyǵy 134 shaǵyn jınaqty mektepti zamanaýı qural-jabdyqpen, sonyń ishinde onlaın-oqytý jáne ǵylymı qyzmetke arnalǵan kabınettermen jaraqtandyrýǵa 1,8 mlrd teńgeden astam qarjy bólgen.
Búginde elimizdegi barlyq mekteptiń 70 paıyzdan astamy (5 245) aýyldyq jerde, onyń jarymy shaǵyn jınaqty mektep sanatyna jatady (2 564 mektep). Bir jaǵynan shaǵyn jınaqty mektepterdegi bilim sapasyna bilikti mamandardyń jetispeýshiligi ǵana emes, buǵan eskirgen materıaldyq-tehnıkalyq bazasy da áser etedi.
«Qazaqstan halqyna» qoǵamdyq qorynyń basqarma tóraǵasy Bolat Jámishev qor qurylǵannan bastap bilim salasyndaǵy qaıyrymdylyq jobalardy qoldaýǵa erekshe mán berilgenin jetkizdi.
«Ýákiletti organdarmen jaǵdaıdy birlesip zerdeleý, seriktes qorlarymyzben talqylaý «Qazaqstan halqyna» qory sheshýge qatysa alatyn ózekti máselelerdiń biri – aýylda bilimdi damytý ekenin kórsetti. Sondyqtan bizdiń qaıyrymdylyq jobamyz «Bilim berýdi turaqty damytý qory» QQ, «Nazarbaev zııatkerlik mektepteri» DBBU, óńirlik ákimdikterimen jáne basqa seriktestermen iske asyrǵan «Aýyldyq jerlerde tirek mektepterdiń áleýetin damytý» eldik bastamasy boldy. 2022 jyldan bergi eki kezeńde qor elimizdiń 17 óńirinde 135 tirek mektepti jaraqtandyrýǵa 33.5 mlrd teńge jumsady. Kelesi jyly biz taǵy 56 mektepti qamtı otyryp, jobany aıaqtaımyz», dedi ol.
B.Jámishevtiń aıtýynsha, «Aqtóbe oblysynyń shaǵyn jınaqty aýyl mektepteriniń áleýetin damytý» jobasy «Aýyldyq jerdegi tirek mektepteriniń áleýetin damytý» jobasynyń jalǵasy bolmaq. Sonymen qatar atalǵan qor osyndaı mektepter sany kóp Qostanaı, Aqmola jáne Soltústik Qazaqstan oblystaryna da jobany engizýge qoldaý kórsetedi.
Máselen, bıyl jobaǵa Aqmola, Qostanaı, Pavlodar, Batys Qazaqstan jáne Soltústik Qazaqstan oblystaryndaǵy 10 tirek jáne 30 shaǵyn jınaqty mektep tartylyp otyr. Al 2025 jyldyń qańtarynan bastap bul jobaǵa 17 óńirdiń 192 tirek jáne 759 shaǵyn jınaqty mektebi qatysady. Al úshinshi kezeńde osy jobaǵa qalǵan shaǵyn jınaqty mektepterdiń barlyǵy qamtylady.
