Ǵalymdardyń aıtýynsha, sımptomdar paıda bolmaı turyp, 1-2 kún buryn aǵzada ózgeris bastalady. Algorıtm osy aýytqýlardy baıqap, paıdalanýshyǵa demalyp, erterek emdelýge nemese dárigerge qaralýǵa múmkindik beredi. Bul fýnksııa qazir «Oura Labs» baǵdarlamasynyń beta-nusqasynda tekserilip jatyr.
Baqylaýshy robot-ıt
«VisionLabs» pen «Jańa ónimder zerthanasy» ıntellektýaldy vıdeo sarapshysy bar robot-ıt jasap shyǵardy. Tehnologııa qurylys alańdaryndaǵy qaýipsizdikti arttyryp, jazataıym oqıǵalar sanyn azaıtady.
Robot «VisionLabs LUNA» júıesi arqyly qaýipsizdik erejeleri buzylǵanyn anyqtaı alady. Sondaı-aq qurylys alańyndaǵy adamdardyń kaska men keýdeshe kıgen-kımegenin tekseredi. Bógde adamdar bar-joǵyn baqylaıdy. Robot-ıt lıdar, spýtnıktik pozısııalaý júıesi, sý men shańnan qorǵaý quraldarymen jabdyqtalǵan. Ol baǵdar boıynsha ózdiginen nemese operatordyń basqarýymen qozǵalady. Barlyq synaqtan sátti ótken robot-ıtti qoımalarda, ónerkásip oryndarynda, medısınalyq klasterlerde paıdalanýǵa bolady.
Alsgeımerdi emdeıtin dári
«Filamon Limited» kompanııasy jańa «ALPHA-003» preparatyn shyǵardy.
Bul dári qabynýǵa qarsy áser kórsetip, mı jasýshalarynyń qurylymdaryn saqtaı otyryp, jazylýy qıyn aýrýlardyń asqynýyn toqtata alady. Preparat mıkrotútikshelerdi qorǵaýǵa baǵyttalǵan ári mıdyń gematoensefaldyq tosqaýylynan ótip, qabynýdy basady. Ǵalymdar klınıkalyq zertteýlerdi 2026 jyly bastamaq. Ǵalymdar buǵan deıin alsgeımer aýrýy este saqtaý qabiletiniń nasharlaýyna ákeletinin anyqtaǵan.
