«Jyl volonteri» baıqaýy Memleket basshysy Qasym-Jomart Toqaevtyń bastamasymen 2020 jyldan beri ótkizilip keledi. Bul syılyq qoǵamdyq paıdaly bastamalardy damytýǵa eleýli úles qosqan volonterlerdi yntalandyrýǵa jáne eriktilik qozǵalysqa jańa qatysýshylardy tartýǵa baǵyttalǵan.
– Volonter degen túsinik bizdiń asar uǵymmen ushtasady. Jyl volonterin anyqtaýdaǵy maqsat – esepsiz, esil ýaqyttaryn jumsaǵan qaıyrymdy jandarǵa degen alǵys nıeti. Oǵan qosa olardy kóp aldyna shyǵaryp tanystyrý, jyl boıyna jasaǵan eńbekterin nasıhattaý, sáıkesinshe, qoǵamda meıirimdilik, qaıyrymdylyq qundylyqtarynyń ornyǵýyna yqpal etý. Menińshe, baıqaý áleýmettik mańyzy bar mindetterdi belsendi túrde sheship, volonterlik mádenıetti damytatyn otandyq jáne halyqaralyq volonterler men volonterlik uıymdardyń eńbegin, qoǵamnyń ilgerileýine qosqan úlesin moıyndaý alańyna aınaldy. Ári bıylǵy jobalar men bastamalar eriktilik qyzmettegi janqııarlyq pen tıimdiliktiń úlgisi boldy, – dedi Ulttyq volonterler front-ofısiniń jetekshisi Aıbek Dosymbetov.
Halyqaralyq volonterler kúnin merekeleý aıasynda elimizde volonterlik jáne qaıyrymdylyq mádenıetin damytýǵa baǵyttalǵan «Igi ister marafony» jobasynyń jeńimpazdary belgili boldy.
Jalpy, «Igi ister marafony» jobasy 2024 jyldyń 9 shildesinen 1 jeltoqsanyna deıin respýblıkanyń ár óńirin qamtyp, birliktiń kúshin, ıgiliktiń úlgisin kórsetti. Marafon barysynda 7 myńnan astam ıgi is jasaldy. Al qatysýshylar sany 50 myńǵa jýyqtady.
Bastama bes aptadan turatyn ıgi isterdi qamtydy. Atap aıtqanda, «Ekologııa», «Inklıýzııa», janýarlardy qorǵaý, qarttar men jastar kúnine arnalǵan meıirim aptalyǵy.
Joba aıasynda 3 200-ge jýyq aǵash egildi, 240 tonna qoqys, plastıka, makalatýra jınaldy, 1000-nan asa úısiz qalǵan janýarlarǵa kómek kórsetildi. 6000 otbasyna, múmkindigi shekteýli azamattarǵa, jalǵyzilikti qarttarǵa azyq-túlik, turmystyq hımııa, dári-dármek úlestirilip, aýlany tazalap, otyn jaryp kómek kórsetildi. Osyndaı qaıyrymdy iste shet qalmaı, qol ushyn sozǵandar arasynan «Eń meıirimdi aımaq», «Eń meıirimdi ujym», «Eń meıirimdi oqý orny», «Eń meıirimdi aýyl», «Eń belsendi medıa» atalymynda úzdikter anyqtalyp, 20 jeńimpaz marapattaldy.
Sondaı-aq mereke aıasynda Astanada «Volunteer FEST-2024» festıvali ótti. Munda da ekologııa, medısına, áleýmettik kómek, ınklıýzııa syndy salalarda jumys isteıtin 70-ten astam eriktiler uıymy marapattaldy. Ásirese tabıǵatty qorǵaýǵa atsalysqandarǵa, halyqtyń osal toptaryn qoldaǵandarǵa, tótenshe jaǵdaılar kezinde tosylmaı jedel áreket etken jandarǵa, múmkindigi shekteýli azamattarǵa kómekteskenderge, qoǵamda temirdeı tártiptiń saqtalýyna úles qosqandarǵa, el saýlyǵyna alańdaǵandarǵa, janýarlarǵa qamqorlyq etkenderge erekshe qurmet kórsetildi.
Qaıyrymdy iste kóptiń alǵysyn arqalaǵandardyń biri – «Meıirimdi jandar» qozǵalysy. Eriktiler toby bes jyldan beri kópbalaly analarǵa, erekshe balalary bar otbasylaryna jáne halyqtyń áleýmettik osal toptaryna járdem berip keledi. Olardyń kúsh-jigeri tek kómek berýmen shektelmeı, elde volonterler qataryn arttyrýǵa da sep bolyp júr. Iаǵnı kómekke, qoldaýǵa ıe bolǵandardyń kópshiligi qazir «Meıirimdi jandarmen» birge eriktilikpen aınalysady.
– Siz úlken ózgeriske sebep bolǵan kezde, sizdiń mindetińiz óz elińizdi jaqsartý jáne qıyn jaǵdaıǵa tap bolǵandarǵa kómektesý ekenin túsinesiz. Bizdiń maqsatymyz bir – muqtaj jandarǵa qoldaý kórsetý jáne janashyr azamattardyń jańa býynyn tárbıeleý, – dedi «Meıirimdi jandar» eriktiler qozǵalysynyń jetekshisi Dınara Ydyrysova.
Festıvalǵa myńdaǵan qatysýshy jınaldy, olardyń arasynda tanymal qoǵam qaıratkerleri, blogerler men estrada juldyzdary boldy. Qonaqtar eriktilerdiń jumysymen tanystyratyn fotokórmeni tamashalady. Is-shara «Taza Qazaqstan» aksııasy aıasynda «Astana jastary» jastar resýrstyq ortalyǵy men elordalyq Jastar saıasaty máseleleri basqarmasynyń uıytqy bolýymen uıymdastyryldy.
– Bizdiń eriktiler joǵalǵan adamdardy izdeýge, múmkindigi shekteýli jandarǵa kómektesýge, ekologııalyq jaǵdaıdy jaqsartýǵa belsendi qatysady. Bıyl elimizde jastar men kúmis eriktilerge, ıaǵnı qoǵamǵa kómektesýge belsendi qatysatyn egde jastaǵy adamdarǵa erekshe nazar aýdaryldy. Búginde Astanada 6000-nan astam adamdy qamtıtyn 70-ke jýyq uıym jumys isteıdi. Biz olardy nagradalarmen ǵana emes, baǵaly syılyqtarmen, kezdesýlermen jáne keri baılanyspen de qoldaýǵa tyrysamyz, – dedi Astana qalasy Jastar saıasaty máseleleri basqarmasynyń basshysy Samat Ibraev.
