URPAQ BERER ESIMIŃIZ – ATAQAZAQ

Qos palataly Parlamentimizdiń Elbasy bıik ataǵyn zańdastyrýǵa qulshynysyn qýana quptaǵandar­dyń biri edim. Demek, bul ataý halqymyzdyń erteden kókeıinde júrgendiginiń aıǵaǵy edi. Al osy halqyńyzdyń shyn kóńilinen shyqqan yqylasy men qurmetin qabyldaýdan bas tartqanyńyz, qur­metti Nursultan Ábishuly, Sizdiń qarapaıymdylyǵyńyzdyń jarqyn kórinisi bolsa kerek. Aýyl qazaǵynyń otbasynda tárbıelenip, salt-dástúrdi berik ustap ósken ul ǵana osylaı isteı alady. Biraq bizdiń uǵymymyzda Siz báribir Ult kóshbasshysy bolyp qalyptasyp úlgergen bolatynsyz. Endi halqy­myzdyń ystyq yqylasyna saı, Konstıtýsııalyq zańdy gazetterden kórip, qýana quptap otyrmyn. Qazaq eliniń qazirgi bastan ke­ship jatqan ómiri asa kúrdeli oqı­ǵa­larǵa toly. Táýelsizdikke ıe bol­ǵan kezdiń alǵashqy jyldarynyń ishinde-aq tańqalarlyq tabystarǵa qol jetkizip, álemdegi eń joǵary damyǵan órkenıetti elderdiń naza­ryn ózine aýdara bilse, bul, árıne, Nursultan Ábishuly Sizdiń kóregen saıasatyńyzdyń jemisi. Qazaq­stan­nyń kópetnosty halqynyń zor se­nimine ıe bolyp, dáıekti reforma­tor, bolashaqty boljaǵysh bıik be­deldi saıasatker ekenińizdi kórsete bildińiz. Men sonaý 1991 jylǵy Pre­zı­dent saılaýynan keıin, qurmetti Nur-Aǵa, Siz ant qabyldaǵan Joǵar­ǵy Keńestiń saltanatty sessııasyna Mańǵystaý halqynyń ókiliniń biri retinde qatysqanymdy maqtan etemin. Ol meniń ómirimdegi eń umytylmaıtyn tarıhı sátterdiń biregeıi bolyp esepteledi. Táýelsiz Qazaq eliniń Tuńǵysh Prezıdentin taqqa otyrǵyzý rásimi maǵan sar­qyl­maıtyn shabyt berdi. Eldi ny­ǵaıtýǵa qarlyǵashtyń qanatymen sý sepkenindeı bolsa da jyrymmen óz úlesimdi qosýym kerek dep túsindim. Sondyqtan da “Qazaqstan-2030” strategııalyq baǵdarlamasyn ha­lyq­qa keńinen túsindiretin jalyn­dy pýblısıstıkalar men kórkem­digi joǵary “Barys minez halyq­pyz”, Kaspıı qaırańyn ıgerý ınvestısııasy týraly “Kaspııdiń túbi – altyn túp” toptama óleńde­rin jáne birneshe nasıhattyq maqalalar jazdym. “Qarashúńgil – qarakózim tuńǵıyq” atty Qazaqstan munaıynyń 100 jyldyǵyna arnal­ǵan kitabyma “Ataqazaq” atty bólim engizdim. О́zińiz qaıta qurǵan Mańǵystaý oblysyna táýelsiz elimizdiń Tuń­ǵysh Prezıdenti retinde 1994 jyl­dyń jazynda kelgenińizde qýanysh­ta shek joq bolatyn. Sol kezdegi qushaq jaıyp qarsy alǵan mań­ǵys­taýlyqtar yqylasyn aına-qatesiz berýge umtylǵan eki óleńimniń birin – “Ataqazaq”, ekinshisin “Aqboz at mingen Elbasy” dep ataǵan edim. Tam­shaly atty Mańǵystaý tabı­ǵaty­nyń kórikti jerinde aqboz atqa mingen boıda darhan dala tósinde quıǵytyp shaba jónelgenińiz áli kóz aldymyzda. Al sol táýelsiz­di­gi­mizdiń alǵashqy jyldarynda ja­zylǵan “Ataqazaq” óleńindegi oı-tu­jyrymdarymnyń qazir dál kel­genine ári tańdanamyn, ári qýa­namyn. Aıtýar О́TEGENOV,  aqyn, eńbek ardageri. AQTAÝ. ATAQAZAQ Bir shyńyraý jáne onda jalǵyz qaýǵa. Qutym bolǵan tússe de sansyz daýǵa. Árqashanda qamqor bop qol sozasyz, 360 áýlıeli Mańǵystaýǵa... Álemdi kósemdikpen uıyttyńyz, Qaıda da qoshemet mol súıikti Ulǵa, Tanyttyńyz Qazaq degen halyq baryn, Ǵasyrda dara týǵan bıik Tulǵa. Qoǵamdaǵy taldaısyz ár izdi Siz, El aldynda uǵynyp paryzdy Siz. Qazaq ultyn topannan saqtap qalý, Jolyn biler Nuh paıǵambar tárizdisiz... Az kórgen joq ómirden atam azap, Bastalady endi ómir óte ǵajap. Jasaı bersin Nursultan Nazarbaev, Urpaq berer esimi – Ataqazaq!!! EL MÚDDESI BÁRINEN BIIK Men jergilikti televızııada jumys istep júrgende Táýelsiz elimizdiń Tuńǵysh Prezıdenti Nursultan Nazarbaevpen birneshe ret kezdesip, suhbat alǵan edim. Sol 90-shy jyldardyń kúrmeýi qıyn kezeńinde-aq Memleket basshysy sarabdal saıasatker ekenin dúıim elge qapysyz tanyta bildi. Qazaqstandy kemel damý jolyna bastap, tyǵyryqtan alyp shyǵatynyna berik sengen jandardyń biri men edim. Búgin aqsaqal jasyna jetip otyrsam da, Elbasynyń árbir áreketi, is-qımyly kóz aldymda. Shúkirshilik deıik, álemdik arenadaǵy saıası kemel kóshbasshy ekenine bárimizdiń kózimiz jetti. Tórtkúl dúnıege tanylmaq túgili durys el basqara almaı otyrǵan talaı basshyny kórip júr­gen joqpyz ba? Búginde Qazaq elin álem tanıdy, sana­sady, qurmet tutady. Munyń ózi árbir qazaqstandyq úshin zor mártebe, úlken maqtanysh bolsa kerek. Bir sózben aıtqanda, Elbasynyń ataq-abyroıy men zor bedelin bárimiz arqa tutamyz. Osyndaıda basshy qalaı bolsa, qosshy solaı” degen ataly sóz oıǵa oralady. Tarıh úshin qas-qaǵym qysqa ǵana ýaqytta Qazaqstan úlken damý jolynan ótip, ekonomıkalyq tabystarǵa jetti. Qaı salany alsaq ta, ilgerileý bar. Álemdik qarjy daǵdarysyna da moıymaı qıyn kezeńnen aman-saý óte bildik. Halyqtyń ál-aýqaty artyp, turmysy jaqsara tústi. Elimiz dúnıejúzilik kartadan óz ornyn taýyp, básekege qabiletti elý eldiń qatarynan oryn alýǵa bet túzedi. Eýropadaǵy qaýipsizdik jáne yntymaqtastyq uıymyna tóraǵalyq etý mártebemizdi odan saıyn asqaqtata tústi. Bir sózben aıtqanda, az ǵana jyldar ishinde halyqaralyq deńgeıde moıyndalyp, irgeli elderdiń ózi sanasatyn dárejege jetýimizdiń syry kemel tulǵa, suńǵyla saıasatker N.Nazarbaevtyń esimimen tyǵyz baılanysty. “Qarasha qalasa, han túıesin soıady” demekshi, úsh joǵary laýazym ıeleriniń qol qoıýlarymen Qazaqstan Respýblıkasy Tuńǵysh Prezıdentiniń – Elbasynyń óki­lettigin keńeıtýge qatysty zańnamalyq aktilerdiń qoldanysqa enýin birden-bir durys sheshim dep sanaı­myn. Elimizdiń kemel keleshegin oılasaq, órkenıetti memleket quramyz desek, Qazaqstan Respýblıkasy Tuńǵysh Prezıdenti – Elbasynyń mártebesi men ókilettigin arttyrýdan utarymyz kóp. О́ıtkeni, bárimiz Qazaqstan memlekettiliginiń bastaýynda turǵan jáne demokratııalyq, quqyqtyq memleket retinde elimizdi damytýǵa orasan úles qosqan Nursultan Ábishulynyń týra joldan adastyrmaıtynyna shúbásiz senemiz. Mútáláp QANǴOJIN, aqyn, Qazaqstan Jazýshylar odaǵynyń múshesi, Soltústik Qazaqstan oblysynyń qurmetti azamaty.