Joldy tapsyrý saltanatyna «QazAvtoJol» Ulttyq kompanııasy» aksıonerlik qoǵamy basqarmasynyń tóraǵasy Darhan Imanashev, oblys ákiminiń birinshi orynbasary Azamat Taıjanov, Balqash qalasynyń ákimi Sapar Sataev pen joldy salǵan merdiger kompanııanyń qyzmetkerleri qatysty.
Saltanatty rásimde alǵashqy bolyp quttyqtaýyn jetkizgen «QazAvtoJol» Ulttyq kompanııasy» aksıonerlik qoǵamy Basqarmasynyń tóraǵasy Darhan Imanashev «Qaraǵandy-Balqash» kúre jolynyń tórt jolaǵy tolyǵymen ashylǵandyǵyn aıtyp, jolaýshylarǵa aq jolyn tiledi.
– Qaraǵandy qalasynan Balqash qalasyna deıingi aralyqta jańa asfalt tóselip, tórt jolaqty jol tolyǵymen ashyldy. Jol qozǵalysy qaýipsizdigin qamtamasyz etý úshin tosqaýyl qorshaýlary da talapqa saı tolyǵymen ornatyldy. «Qaraǵandy-Balqash» kúre jolynyń jalpy uzyndyǵy – 363 shaqyrym. Kúre jol I sanatqa ıe jáne tórt jolaqtan turady. Avtobanǵa 4 mln tonnadaı asfaltbeton tóselipti. Onyń 610 myń tonnasyn bıyl. Qaıta qurý jumystary aıasynda 11 kópir, aýyl sharýashylyǵy tehnıkasy ótetin 32 jol ótkeli, kólik aıryǵy jáne temirjol ótkeliniń qurylysy tolyǵymen aıaqtaldy. Jalpy «Ortalyq-Ońtústik» dálizine jatatyn respýblıkalyq mańyzy bar «Astana-Almaty» kúre jolynyń uzyndyǵy – 946 shaqyrym. 4 jolaqty sapaly joldyń ashylýy jol apatynyń oryn alýyn toqtatady. Kelesi jyldan bastap, aqyly jol júıesi iske qosylady, – dedi D.Serikuly.
Jolaýshylar úshin 18 demalys beketi, 24 aıaldama, 1452 jaryq baǵany ornatyldy. Qazirgi ýaqytta bul baǵytpen kúnine jobamen 18 myń kólik qatynaıdy. Jazda 25 myń kólikke deıin júrip ótedi.
Bizdiń jap-jańa kúrejol elimizdiń soltústigi men ońtústigin ǵana baılanystyryp otyrǵan joq. Reseı, Qytaı, Qyrǵyzstan men О́zbekstan arasyndaǵy mańyzdy tranzıttik baǵyttardyń biri. Endi sáıkesinshe elimizdiń kólik áleýeti artyp, jolaýshy tasymalynyń qaýipsizdigi azaıyp, Balqash kólindegi týrızm túleıdi.
– Bul joldy bizdiń Qaraǵandy úshin ǵana emes, barlyq elimizge mańyzdy jol dep aıtýǵa bolady. Kópten kútken «Qaraǵandy-Balqash» arasyndaǵy jol toraby paıdalanýǵa berilip otyr. Joldyń jaqsarýy elimizdiń ekonomıkasynyń odan ári ósýine úlesin qosady. Osy jyl oblys boıynsha 1032 shaqyrym jol jóndeýden ótti. Osy joldardyń barlyǵy eldiń ıgiligine tapsyryldy. Osy oraıda «Qaraǵandy-Balqash» jol torabyna úlken úlesin qosqan «QazAvtoJol» Ulttyq kompanııasy» aksıonerlik qoǵamy basqarmasynyń tóraǵasy Darhan Serikuly bastaǵan ujymǵa, merdiger kompanııaǵa alǵys bildiremin, – dedi aımaq basshysynyń birinshi orynbasary A.Taıjanov.
Balqash qalalyq ardagerler keńesiniń tóraǵasy Taıtóleý Jumanov aq batasymen mártebeli meımandar birjaqty júrý jolynyń belgisin saltanatty túrde ashty. Endi Almaty baǵytyna bet alǵan jolaýshylar Balqashqa kirip, baǵdarshamǵa toqtap, kepteliste kidirmeıdi. Dál osy tustan aınalyp ótedi.
Ulttyq kompanııanyń basshysy 288 shaqyrymdy alyp jatqan 4 jolaqty «Balqash-Býrylbaıtal» joly aldaǵy 10 kún ishinde ashylatyndyǵyn jetkizdi. Munymen qosa Úkimet eldegi 5 myń shaqyrym avtojoldy jańǵyrtýǵa Qazaqstannyń damý bankinen 1 mlrd dollarǵa jýyq nesıe alǵandyǵy, qarjy «QazAvtoJol» UK» AQ-ǵa tıisti kelisim sheńberinde bólinetindigin de aıta ótti. Bul jumysty 2024-2027 jyldar aralyǵynda iske asyrý josparlanyp otyrǵan kórinedi.
Budan bólek Ulttyq kompanııa Qaraǵandy-Aıagóz-Tarbaǵataı-Boǵaz, Aqshataý-Aǵadyr-Ortaý, Qyzylorda-Pavlodar-Ýspenka-RF shekarasy jáne Bastaý-Aqtaý-Temirtaý sekildi respýblıkalyq avtojoldardyń ortasha jóndeý (123 shaqyrym) jumystaryn aıaqtapty.
Kompanııanyń keler jyly uzyndyǵy 513 shaqyrymdy quraıtyn «Qaraǵandy-Jezqazǵan» avtojolyn qaıta jańartý boıynsha jumys josparlarynda bar eken. Jobanyń barlyq kezeńinde sapany baqylaýdy kúsheıtý úshin ERSM mehanızmi qoldanylatyn bolady. Qurylys jumystary 2026 jylǵa josparlanǵan.
Munymen qosa, jalpy uzyndyǵy 412 shaqyrymdy quraıtyn «Jezqazǵan-Qyzylorda» avtojolynyń qaıta jańartý jumystary jalǵasyp jatyr. Bıyl Qyzylorda oblysy boıynsha negizgi jumystar aıaqtalyp, 150 shaqyrym kólik qozǵalysyna berilgen. Jol qurylysyn tolyǵymen kelesi jyly aıaqtaımyz deıdi. Al Ulytaý oblysyna qarasty shaqyrymdy kúrdeli jóndeýden ótkizý úshin daıyndyq jumystary bastalypty. Atap aıtsaq, tehnıkalardy mobılızasııalaý men óndiris bazalaryn qurý boıynsha.
«QazAvtoJol» ulttyq kompanııasy elimizdiń kólik ınfraqurylymynyń damýy men qaýipsiz jol qozǵalysyn nyǵaıtý úshin aýqymdy ınfraqurylymdyq jobalardy júzege asyryp otyr.
Qaraǵandy oblysy
