Jas órender arasynan Nurasyl Qýandyq 26 kg salmaq dárejesinde qarsylas shaq keltirmedi. Ol óziniń alǵashqy týrnırinde-aq chempıon atanyp, bapkerlerin razy etti. Nurasyl Jáleluly «Jaýynger» sport klýbynda jattyǵady. Bapkeri – kásipqoı boksshy, bokstan sport sheberi Nurslan Sabyrov. Baldyrǵan boksshy fınaldyq syndaǵy qarsylasyn jyldam ári joıqyn soqqylarymen birden eseńgiretip tastady. Onyń bapkeri ekinshi raýndta jekpe-jekti toqtatty.
«Týrnır joǵary deńgeıde ótti. Nurasyldyń klýbqa aýysqanyna jarty jyl boldy. Jattyǵýdan qalmaıdy. Rıngte ózin jaqsy ustaıdy. Biz aıtqan taktıkany búgin sheber oryndap, top jardy. Talmaı eńbektenip, osy betinen taımasa alar asýy áli alda. Onyń solaqaı ekenin atap ótý kerek. Sol qolynyń soqqylary joıqyn. О́te shapshań qımyldaıdy. Nurasyldan basqa klýbymyzdyń taǵy eki tárbıelenýshisi chempıon atansa, beseýi ekinshi, ekeýi úshinshi orynǵa ıe boldy», deıdi bapker N.Sabyrov.
Týrnırdi uıymdastyrýshy tarap «Úzdik boksshy», «Jeńiske degen yntasy úshin», «Úzdik tehnıkasy úshin», «Eń kishi qatysýshy» atalymdary boıynsha syılyqtar taǵaıyndaǵan eken. Nurasyl óziniń eshkimge uqsamaıtyn bokstasý tásilimen «Úzdik tehnıkasy úshin» atalymyn jeńip aldy.
«Boksqa 4-5 jasymnan qyzyǵa bastadym. Buǵan deıin júzý, akrobatıka, kıkboks, MMA, ýshý-sanda, fýtbol syndy sport túrlerine qatystym. Keıin 11 jasymda ákem GGG sport keshenine aparyp, jattyqtyrýshy Erjan Músápirovtiń tárbıesine berdi. Onda jarty jyldaı daıyndalyp, «Jaýynger» klýbyna aýystym. Alǵashqy jarysymda chempıon bolǵanyma qýanyshtymyn. Bapkerim Nurslan aǵaıǵa raqmetimdi aıtamyn», deıdi Nurasyl.
Qaraǵandy oblysy
