Foto: depositphotos.com
Istiń mán-jaıyn Aqmola oblystyq sotynyń baspasóz qyzmeti habarlady. Oblystyq aýrýhanalardyń biriniń esepshisi 1S Býhgalterlik baǵdarlamasyndaǵy derekterdi ózgertip, aýrýhana qyzmetkerleriniń jalaqysy men basqa da tólemderin joǵarylatyp jibergen. Aýrýhananyń bas esepshisi men bas dárigeri elektrondyq sıfrlyq qoltańba kiltteri bar qujattarǵa tekserýsiz qol qoıǵan.
«Osylaısha, D. qyzmet babyn paıdalanyp, óziniń jáne basqa adamdardyń shottaryna somalardy zańsyz eseptep, keıinnen olardy aýdarym arqyly nemese qolma-qol aqshamen ózine qaıtarýdy talap etip otyrǵan (Qylmystyq kodeksiniń 190-baby 3-bóliginiń 1-tarmaǵy). 2020-2022 jyldary aralyǵynda D.-niń qylmystyq áreketterimen Densaýlyq saqtaý basqarmasyna 10 mln teńgege jýyq materıaldyq zalal keltirildi», delingen habarlamada.
Sottalýshynyń kinási aýdıtorlyq eseppen, kýágerler men aýrýhana qyzmetkerleriniń aıǵaqtarymen, olardyń shottaryna túsken artyq tólemdermen dáleldengen. Jaza taǵaıyndaýda sot D.-da kishkentaı balanyń bolýyn jeńildetetin mán-jaı retinde, aýyrlatatyn mán-jaılardyń bolmaýyn eskergen.
Alqanyń qaýlysymen D.-ǵa qatysty úkim ózgerissiz qaldyrylǵan.
«Sot úkimimen D.-niń múlki (urlyq jasaý kezeńinde satyp alynǵan avtokólik) tárkilenip, 3 jyl 8 aıǵa bas bostandyǵynan jáne materıaldyq-jaýapty laýazymdardy atqarý quqyǵynan aıyryldy.Bas bostandyǵynan aıyrý bóligindegi jazanyń oryndalýy D.-niń balasy 14 jasqa tolǵanǵa deıin 4 jylǵa keıinge qaldyryldy», delingen sot habarlamasynda.
