Sýretterdi túsirgen – Erlan OMAR, «EQ»
«Gazet oqý úrdisi úzilmeýge tıis...»
«Qazaq gazetteri» JShS bas dırektory, akademık Dıhan Qamzabekuly jıyndy ashyp, «Zaman. Zerde. Zııaly» atty baıandamasynda qazirgideı qıyn kezeńde, Prezıdent Qasym-Jomart Toqaev dál baǵamdaǵandaı, toı toılaıtyn emes, oı oılaıtyn kezeń kelgenin, «sol oı – zaman amaly men elshil is-áreket, tarıh hám júrip ótken jol zerdesi men tájirıbesi, zııalylar qaǵıdaty men jaýapkershiligi bolýǵa tıis» ekenin aıtty.
«Birinshi siz ben bizge buıyrǵan gazetten, jurtty aǵartatyn kitap pen qalamnan bastaıyq. Áleýmettanýshylardyń esebinshe, qazir halyqtyń gazet-jýrnal oqıtyn bóligi – 14–17 paıyz ǵana. Sonyń ishinde erteńgi ultqa jaýapty 25–34 jastaǵy azamattardyń merzimdi basylym oqýy 13 paıyzdan aspaıdy eken. Bul zaman úrdisi, ıaǵnı arǵy jaǵynda kitap, klassıka oqýǵa baspaldaqtyń shamasyn tuspaldaıdy. Eger búgingi kóp sheneýnik, biraz azamat oılap júrgendeı, «gazet zamany ketti» degenge peıil bersek, saýatsyz muǵalim, saýatsyz oqýshy qataryn kóbeıte beremiz. Ras, zamana qalpyn eskerip, gazettiń ınternet nusqasyn, sondaı-aq áleýmettik jelidegi BAQ formatyn jalǵastyrarymyz sózsiz. Biraq Batys pen Shyǵystyń órkenıetti elderine áli de azyq bolyp otyrǵan dástúrli klassıkalyq formatty jetildirý basym baǵyt bolyp qalýǵa tıis», dep atap ótti D.Qamzabekuly.
Sonymen qatar bas dırektor tarıhı zerde «Ushqynnan» «Egemenge» deıin túrli ataý alǵan gazetimizdiń Alash basylymdarymen sabaqtastyǵyn kórsetetinin tilge tıek etti. Eldi el etý jolynda eńbek etken tarıhı tulǵalardy, qıyn da kúrdeli kezeńdegi oqıǵalardy halyqqa, búgingi býynǵa shynaıylyq, tarıhılyq, jan-jaqty qaraý turǵysynan jetkizý qajet ekenin atap ótti.
«Qazirgi «Egemen» bastaǵan barsha ult gazeti – zııalylardyń aqyl-oı, syndarly usynys, salıqaly pikirtalas alańy. «Zııa» – nur, jaryq degen maǵynany beredi. Ulttyń da, dástúrdiń de, ımandylyqtyń da jaryq, jarqyn oıy gazet tujyrymdamasynyń mazmunyn quraıdy. Dál osy kúnderi biz úshin senim mańyzdy! Bıyl Jýrnalıster kúnine oraı Memleket basshysy Qasym-Jomart Kemeluly: «Shyn máninde, gazet shyǵarý men gazet oqý úrdisi eshqashan úzilmeýge tıis. Osy sabaqtastyqty saqtap qalý kerek. Bul – órkenıetti elderdiń barlyǵynda qalyptasqan dástúr» dep bárimizdi jigerlendiretin oı aıtty. Búgingi forýmnyń bir maqsaty – osy oıdy salalandyrý», dedi D.Qamzabekuly.
Prezıdentimiz ult baspasózi men ult múddesi árdaıym ózektes bolatynyn aıtyp keledi. Ǵasyrdan asa tarıhy bar «Egemen Qazaqstan» qaı kezde de eldik muratqa taban tireıdi. Forýmda senator Nurtóre Júsip jetkizgen Senat tóraǵasy Máýlen Áshimbaevtyń quttyqtaýynda osylaı delingen.
«S.Sádýaqasuly, J.Aımaýytuly, M.Áýezov, B.Maılın, S.Seıfýllın, T.Rysqulov, O.Jandosov, Ǵ.Músirepov sııaqty tuǵyrly tulǵalar qalyptastyrǵan bul dástúr S.Baıjanov, B.Qydyrbekuly, Sh.Murtaza, Á.Kekilbaev, N.Orazalın, Ý.Qalıjan, S.Abdrahmanov, E.Smaıyl, E.Qydyr, D.Qydyráli sekildi qaıratker qalamgerler tusynda da laıyqty jalǵasyn tapty. Sondyqtan táýelsizdikti nyǵaıtý, halyqtyń áleýetin arttyrý jáne ulttyq rýhanııatty dáripteý jolynda «Egemen» men egemendikterdiń alar orny erekshe. Qazirgi tańda bas basylym qazaqtyń dúnıetanymyn keńeıtýge, tarıhy men qundylyqtaryn dáripteýge, ádebıeti men mádenıetin, bilimi men ǵylymyn damytýǵa jáne eldiń bereke-birligin saqtaýǵa úlken úles qosyp keledi», delingen Senat tóraǵasynyń quttyqtaýynda.
Sonymen qatar forým barysynda Májilis tóraǵasy Erlan Qoshanovtyń quttyqtaýyn Májilis depýtaty Janarbek Áshimjan, Premer-mınıstr Oljas Bektenovtiń quttyqtaýyn Úkimet baspasóz qyzmetiniń jetekshisi Maqsat Tólegenov, Mádenıet jáne aqparat mınıstri Aıda Balaevanyń quttyqtaýyn vıse-mınıstr Qanat Ysqaqov, Astana qalasynyń ákimi Jeńis Qasymbektiń quttyqtaýyn qala ákiminiń orynbasary Eset Baıken jetkizdi.
«Bul gazette qazaqtyń qanshama býyn talantty jýrnalısteri eńbek etip qalyptasty, qalamdaryn ushtap, sheberlikterin shyńdady. Dáýirdiń tynysyn, qoǵamnyń únin halyqqa shynaıy jetkizdi. Sizder sol uly tulǵalar qalyptastyrǵan dástúrdi laıyqty jalǵastyryp, qazaq baspasóziniń týyn odan ári bıiktettińizder. Búgingi qazaq rýhanııatynyń qarashańyraǵyna aınalǵan ult basylymy «Egemen Qazaqstan» memlekettik múdde men eldik muratqa adaldyq tanytyp, rýhanı qundylyqtardy dáriptep keledi», delingen Májilis tóraǵasy E.Qoshanovtyń quttyqtaýynda.
Premer-mınıstr O.Bektenov ǵasyrdan asa ýaqyt boıy Alash jurtymen birge jasap, abyz basylymǵa aınalǵan «Egemenniń» orny árdaıym bıik ekenin, bútin birneshe dáýirdiń shejiresin boıyna búkken el gazeti otandyq baspasózdi jańa sapalyq deńgeıge kóterip qana qoımaı, tutas ult taǵdyry talqyǵa túsken syndarly sátterde memleket múddesin qorǵaýǵa qyzmet etkenin aıtady. «Qaı jaǵynan alyp qarasaq ta, «Egemen Qazaqstan» qazaq baspasóziniń qarashańyraǵy, egemendiktiń etalony deýge ábden bolady», deıdi ol.
Ataýy ózgergenmen, zaty ózgergen joq
Jıynda sóz alǵan Mádenıet jáne aqparat vıse-mınıstri Q.Ysqaqov gazet ujymy keńes zamanynyń ózinde ana tilimiz ben ulttyq sanamyzdy saqtaýǵa, tól tarıhymyz ben mádenıetimizdi nasıhattaýǵa, eldigimizdi nyǵaıtýǵa ólsheýsiz úles qosqanyn, osy jyldar ishinde gazettiń ataýy ózgergenimen, zaty ózgermegenin, ıaǵnı qalaı atalsa da, eldiktiń bıik minberi mindetin abyroımen atqaryp kele jatqanyn aıtty.
«Keıingi jyldary gazet zamanaýı jańǵyrý úderisin júzege asyryp, ishki mazmuny men syrtqy kelbetin sapalyq turǵydan ózgertti. Basylymmen qatar gazettiń egemen.kz saıty da qaıta jańǵyrtylyp, mýltımedıalyq múmkindikterin keńeıte tústi. Búginde oqyrmandarynyń sany 30 myńǵa jetti. Jalpy, gazette júzge tarta adam jumyspen qamtylyp, jemisti de nátıjeli eńbek etip keledi. Tájirıbeli tilshiler men bilikti basshylardan quralǵan ujym ár saladaǵy jańalyqtardy, máselelerdi sapaly ári saıası salmaqpen oqyrmannyń nazaryna jetkizip keledi. Sonymen qatar memlekettik organdardyń qyzmeti týraly resmı aqparatty, normatıvtik-quqyqtyq aktilerdi, sondaı-aq ishki jáne syrtqy saıası máseleler boıynsha ýákiletti memlekettik organdardyń aqparattaryn jarııalaýda gazettiń ózindik orny, ustanymy qalyptasqan», dedi vıse-mınıstr.
О́z sózinen keıin Q.Ysqaqov gazettiń 105 jyldyǵyna oraı jemisti eńbegimen kózge túsken birqatar basylym qyzmetkerine marapat tapsyrdy. Atap aıtqanda, «Eńbek ardageri» medalimen «Egemen Qazaqstan» gazetiniń qyzmetkeri Káribaı Musyrman, Mádenıet jáne aqparat mınıstrliginiń «Aqparat salasynyń úzdigi» tósbelgisimen «Egemen Qazaqstan» gazeti Menshikti tilshiler jelisiniń úılestirýshisi Dına Dáýit, gazet tilshileri Nurbaı Jolshybaıuly men Elvıra Bókenbaeva, gazettiń Qostanaı oblysyndaǵy menshikti tilshisi Nurqanat Qulabaev, Mádenıet jáne aqparat mınıstrliginiń Qurmet gramotasymen gazettiń aǵa tilshisi Aınash Esalı men tilshisi Qýanysh Nurdanbekuly, bet qattaýshysy Nazym Matenova, Mádenıet jáne aqparat mınıstriniń Alǵys hatymen gazettiń aǵa tilshisi Eskendir Zulqarnaı, korrektory Janar Nurmaǵambetova, Shyǵys Qazaqstan oblysyndaǵy menshikti tilshi Mereı Qaınaruly marapattaldy.
«Egemenniń» erkindik kelbeti
Forýmnyń «Bedel sóz» bóliminde belgili memleket jáne qoǵam qaıratkeri, 1991 jyly táýelsiz elimizdiń tuńǵysh Baspasóz jáne buqaralyq aqparat mınıstri bolǵan Qýanysh Sultanov «Táýelsizdiktiń eleń-alańyndaǵy «Egemen Qazaqstan» taqyrybynda sóz sóıledi. Ol 90-jyldardyń basynda azattyq alǵan shaqtan «Egemen Qazaqstan» gazeti de halyq úni bolyp shabyttanyp, búkil qazaq baspasóziniń kósh bastaýshysy bolyp sóılegenin eske aldy. Eldiń joǵyn joqtap, yntymaǵyna, birligine, jasampazdyǵyna shaqyryp jumyldyrǵanyn, ásirese ulttyq tarıhymyzdyń, taǵdyrymyzdyń aqtańdaq betterin, ult qaıratkerlerine jasalǵan saıası qýǵyn-súrgin, asharshylyq sekildi jabyq taqyryptardy jarııalaýdaǵy «Egemenniń» eńbegi ólsheýsiz ekenin tilge tıek etti.
Tarıhtan syr shertken memleket qaıratkeri: «Táýelsizdigimizdiń alǵashqy jyldary ómirge kelgen jańa BAQ-tar 1991 jyldyń 31 tamyzynda qurylǵan Baspasóz jáne buqaralyq aqparat quraldary mınıstrliginde tirkeletin. Ol kezde áli zań jazyp úlgermedik. 1992 jyly zań qabyldanǵannan keıin bul mindet Ádilet mınıstrligine tapsyryldy. Mine, sol jyly bir jylda tirkelgen jeke táýelsiz basylymdar men radıo, telearnalar sany 200-den asyp ketti. Bul qoǵamdyq belsendilikti kórsetetin sandar edi. Bizdiń negizgi ustanymymyz – BAQ-pen, jýrnalıster qaýymymen áriptestik, shyǵarmashylyq qarym-qatynas ornatý, qalyptastyrý boldy. 1992 jyly qazan aıynda mınıstrliktiń bastamashylyǵymen, IýNESKO-men birlesip, táýelsiz jýrnalısterdiń halyqaralyq úsh kúndik semınar-konferensııasyn ótkizýimiz de eleýli oqıǵa boldy. Sol konferensııaǵa 80 memleketten 200-ge jýyq táýelsiz jýrnalıst, baspagerler, televızııa qyzmetkerleri qatynasyp, ózara tájirıbe almasty. Osyndaı is-sharalardyń barlyǵynda da «Egemen Qazaqstan» gazeti kósh bastap, sóz bastap, halyq sózin kóterip júrdi», dep eske aldy.
«Basylymnyń» ár belesi – eldiktiń belesi
Forým jumysyna qatysqan «Egemen Qazaqstan» respýblıkalyq gazeti» aksıonerlik qoǵamynyń 2000–2016 jyldardaǵy prezıdenti, Memlekettik syılyqtyń laýreaty Saýytbek Abdrahmanov «Egemenniń» ár belesi eldiktiń belesi ekenin, óziniń el gazeti aldynda qaryzdar ekenin, ýnıversıtetti jańa bitirgen shaqta birden bas basylymnyń Ádebıet jáne óner bólimine qabyldaný arqyly qabilet-qarymy ashylyp, eńbek joly sátti bastalǵanyn jetkizdi.
«Alǵashqyda osy gazette 12 jyl jumys istep, keıin memlekettik qyzmetke aýystym. Ǵasyrlar toǵysynda, 2000 jyly bas basylymǵa qaıta oralyp, tutas 16 jyl ómirim osynda ótti. Sol jyldardaǵy kúnder men túnder úshin, bizge gazet basshylyǵyna kórsetken kómegi úshin «Egemenniń» ár qyzmetkerine, ár ardagerine, búginde jumys istep júrgen árbir qyzmetkerine shyn júrekten razylyǵymdy bildiremin. О́ıtkeni gazet jumysy – ujymnyń kúshimen, uıymshyldyqtyń arqasynda ǵana atqarylatyn sharýa. Sondyqtan biz sol jyldarda aýyz toltyryp aıtarlyq úlken tabysqa jettik. 2000 jyly 38 myń taralymnan bastap, 2016 jyly 212 myń taralymǵa jetti. Gazet qyzmetkerleriniń arasynda baspanasyz qalǵan birde-bir adam joq bolatyn. Úı alyp bere almaǵandarǵa jataqhana salyp berdik. Bul da bizdiń qanaǵat sezimmen aıtatyn jaǵdaıymyz», dedi ol.
S.Abdrahmanov sóziniń sońynda gazet oqý memlekettik másele ekenine, oǵan memlekettik deńgeıde kóńil bólinýi qajettigine toqtaldy. Digital áleminiń qarqynyna qaramastan, dástúrli aqparat quraldarynyń shetke ysyrylýyna jol bermeý kerektigin, «Egemen Qazaqstan» sekildi eldik ustanymdy tý qylǵan basylymdarǵa memlekettik qoldaý qajet ekenin shegelep aıtty.
«Altyn sandyqtyń ústinde qazaq nege jalańbut otyr?»
Gazettiń 1996–1998 jyldardaǵy bas redaktory Ýálıhan Qalıjan forým barysynda ózi qyzmet etken jyldarda bolǵan eleýli oqıǵalarǵa toqtaldy. Onyń aıtýynsha, eń aldymen Reseı tarapynan júrgizilip jatqan «Qazaqta memleket bolmaǵan» deıtin ıdeologııalyq ekspansııaǵa toıtarys berý qolǵa alynypty.
«Oǵan birde-ekili saıasatker, ne qoǵam qaıratkeri maqalasymen toıtarys berý múmkin be? Sondyqtan Qazaq memleketiniń tarıhyn zerdelep, jazý mindetin moınymyzǵa aldyq. Mámbet Qoıgeldi, Talas Omarbekov, Kamal Burqanov, Bereket Káribaev, Búrkitbaı Aıaǵan syndy ultjandy tarıhshylardy jınap, keńes ótkizdik. Ultymyzdyń tarıhyn túgendeý jospary jasaldy. Kezeń-kezeńmen olardy gazetke jarııalaý kestesi bekitildi. Gazettiń mardymsyz qalamaqysyn azyrqanbaı, olar bir jarym jyl boıy tarıhymyzdy túgendedi. Bet-bet materıaldar berildi. Osylaısha, biz ulttyq tarıhymyz arqyly jas urpaq tárbıeleýge mán berdik. Osy materıaldar arqyly jas patrıottar, gazet oqyrmandary saıası opponentterge tolyqqandy jaýap bere alatyn memleketshil rýhty boıyna jınady. «Egemen Qazaqstan» kitaphanasy aıasynda sol maqalalardy jınaqtap, kitap etip jarııalasa durys bolar edi», dep oı tastady ol.
Jýrnalıst úshin qapylysta, standartty emes jaǵdaıda ózgeshe sheshim qabyldaı alatyn ıntýısııa, ıaǵnı túısik kerek ekenin aıtqan ardager jýrnalıst sol jyldary urpaq jalǵastyǵyn eskerip, qazaqtyń ataqty jazýshysy Sherhan Murtazany ózine keńesshilik qyzmetke shaqyrǵanyn, sondaı-aq qazaqtyń taǵy bir qaıratker jazýshysy, pýblısıst Kamal Smaıyl men Sherhan Murtaza arasynda gazet betinde hat jazysý uıymdastyrylǵanyn tilge tıek etti.
«Birde Kamekeń «HHI ǵasyr – Qazaqstan ǵasyry» degen úlken bir bettik maqala alyp keldi. Ol elimizdiń qazba baılyqtarǵa baı, jer astynda Mendeleev kestesindegi elementterdiń bári bar ekenin aıta otyryp, bolashaqta Qazaqstan álemdegi baı memleketterdiń qataryna qosylady dep saraptama jazǵan eken. Bir oı sap ete tústi. Osy maqalaǵa Sheraǵań qalaı qaraıdy? Oqyrmandy tartý ári gazettiń taralymyn ósirý úshin eki alyptyń hattaryn uıymdastyrsa qalaı bolar edi? Sheraǵańdy shaqyryp, maqalany qolyna berdim. Tańerteń «Egemen Qazaqstan»-da Kamal Smaıyldyń maqalasy jarq etip shyqty. Tús áletinde Sheraǵań keldi. Kámekeń dosynyń maqalasyn oqyp, jaýap jazypty. Keremet! Muny memleketimizdiń bas gazetinde qalaı jarııalaýǵa bolady? Biraq maqala qoǵamdyq oıdy qozǵaǵan, halyqtyń kókeıinde júrgen máselelerdi kóteredi. Respýblıka boıynsha ártúrli deńgeıdegi tolqýlar júrip jatqan. Basty másele Qazaqstan baılyǵy qazaqqa nege jetpeıdi? Nartáýekel! Maqala jarııalandy. Mazmundap aıtsam, sonyń ishinde mynandaı másele aıtyldy: «Kamal dos! Aıtqanyńnyń bári ras. Qazaqstan – Mendeleev kestesindegi bar baılyqtyń ıesi. Biraq sol altyn sandyqtyń ústinde qazaq nege jalańbut otyr?» Qoǵamdyq pikir dúr ete tústi. Jurt gazetti qoldan-qolǵa ala oqydy. Qoldary jetpegender redaksııaǵa keldi», dep, basylym bedeline sholý jasady.
Qazaq baspasóziniń murajaıy kerek
Senator, tanymal medıa-qaıratker Nurtóre Júsip alǵash ret resmı til «Egemen Qazaqstan» gazeti arqyly qalyptasqanyn atap ótip, ult baspasóziniń qazirgi jaǵdaıyna toqtaldy.
«Jalpy resmı tildi, uǵymdardy, termınderdi qalyptastyrýda, zańdar qabyldanbaı turǵanda «Egemen Qazaqstan» kóp sharýa atqardy. Barlyq quryltaıshylyq qujattar, jarǵylar «Egemen Qazaqstan»-nan bastaldy. Sodan keıin baryp zań tiline qaraı aýysty. Qanshama sózdi ulttyń uǵymyna saı etip shyǵardy», dep atap ótti N.Júsip.
Sondaı-aq medıa-qaıratkerdiń aıtýynsha, qazir oqyrman úshin kúres júrip jatyr. «Bul degenimiz til úshin, táýelsizdik úshin kúres, – dedi ol. – Biz qazir oqyrmandy baspasózge jazdyrtýdyń ǵasyrlar boıy qalyptasqan júıesin buzyp otyrmyz. Endi «Baldyrǵandy» oqıtyn bala bolmaıdy, «Ulandy» oqıtyn bala azaıady, jalpy baspasózdi oqıtyndar azaıady. Til, táýelsizdik úshin kúres dep otyrǵanymyz osynda. О́ıtkeni ult uıaly telefonǵa telmirip, búkil sana, kóz maıy osynda sarylatyn boldy. Toǵyz jasynda bala tili shyqpaıtyn jaǵdaıǵa keldik. Sóıleı almaıdy, oıyn jetkize almaıdy. Telefonǵa telmirgen soń, kózi kórmeıtin ultqa aınalaıyn dep otyrmyz. Olar gazet, kitap oqymaǵannan keıin kemel adam bolýdyń ornyna kembaǵal adamdy tárbıeleıtin jaǵdaıǵa jetip otyrmyz. Memleket ultty kitap oqýǵa yntalandyryp, oqıtyn ult jobasyn jasap, «Bir el, bir kitap» jobasy qolǵa alyndy, onyń ishinde balalar ádebıetine kóńil bólinip, úlken jumys jasalyp jatyr, biraq balanyń tárbıesine árbir ata-ana óte saýatty, jaýapty bolý kerek».
Al senator Darhan Qydyráli aqparattyq syn-qaterler men zamanaýı medıa máselesin sóz etti.
«Jańa medıa paıda bolysymen álemde gazet redaksııalary jabylyp, transformasııaǵa ushyrady. Osy kezde biz gazettiń saıtyn jeke redaksııa qylyp shyǵardyq, oqyrman sany myńnan 100 myńǵa jetti. Resmı gazet úshin kúndelikti oqyrmannyń 100 myńǵa jetýi úlken kórsetkish dep aıtýǵa bolady. YouTube kanalyn ashtyq, sport taqyrybynda baǵdarlamalar, suhbat shyǵardyq, jańalyqtar boldy. Sonymen qatar «Ertegiler elinde», «Balalarǵa bazarlyq» sııaqty baǵdarlamalar balalarǵa paıdaly boldy. Jalpy, áleýmettik jelimen álemde eshqandaı gazet básekege túse almaı qaldy. Ne isteý kerek? Osy oraıda gazet jýrnalıstik zertteý, taldaý, saraptaý, qundylyǵyn jolǵaltpaıtyn, eskirmeıtin materıaldar berýge den qoıdy. Sarapshylar klýbyn qurýǵa tyrystyq, ekonomıkalyq, áleýmettik saraptamalyq materıaldar shyǵardyq, bul óz nátıjesin berdi. Gazetti sýbsıdııalaý máselesi de qolǵa alyndy», dedi 2016–2022 jyldary «Egemen Qazaqstan» AQ basqarma tóraǵasy qyzmetin atqarǵan D.Qydyráli.
«Astana aqshamy» gazetiniń bas redaktory Erkin Qydyr qazaq baspasóziniń murajaıyn ashý qajet ekenin aıtyp, kezinde ózi bas redaktory, basqarma tóraǵasy qyzmetterin atqarǵan «Egemenniń» mektebine toqtaldy.
«Egemenniń» mektebi – eń aldymen redaktorlar mektebi. Sapar Baıjanov, Balǵabek Qydyrbekuly, Sherhan Murtaza, Saýytbek Abdrahmanovtyń redaktorlyǵynyń ózi – bir mektep. Máselen, bizde bir jaqsy dástúr bar edi, úlken aıtýly merekelerde arnaıy nómir shyǵaratyn. Ony aldyn ala josparlaıdy, keremet, súısinip oqıtyn nómir bolatyn. Mine, «Egemenniń» mektebi degende osy eske túsedi. «Egemenniń» qara shańyraǵynan úırenetin qanshama nárse bar, osylardyń barlyǵy zerttelýi kerek. Redaktorlar mektebi, jýrnalıstik sheberlik mektebi, bezendirý mektebi bar, osylardyń barlyǵy – bir-bir taqyryp», dedi E.Qydyr.
Mádenı-ıntellektýaldyq forým aıasynda «Egemen Qazaqstan» gazetiniń avtorlary, Memlekettik syılyqtyń laýreaty, opera ánshisi Kenjeǵalı Myrjyqbaı, Qazaqstannyń eńbek sińirgen qaıratkeri, kúıshi, sazger Janǵalı Júzbaı, tanymal dástúrli ánshi Erlan Rysqalı án-jyrdan shashý shashty.
Seriktestik basshysy D.Qamzabekuly gazet jýrnalısteri ózderiniń kúndelikti qyzmetimen qosa, shyǵarmashylyqpen de turaqty aınalysatynyna, buǵan jyl saıyn jaryq kórip jatqan kitaptary dálel ekenine toqtaldy.
Máselen, taıaýda birqatar qalamgerlerimizdiń týyndylary jaryq kórgenin aıta ketken jón. Dıhan Qamzabekulynyń «Araına», Ǵabıt Músireptiń «Toǵyzynshy terrıtorııa», Talǵat Batyrhannyń «Bozjaınaq bolmys», Abaı Aımaǵambettiń «Bilte shamnyń jaryǵy», Baqytbek Qadyrdyń «Májýsıler», Batyrhan Sársenhannyń «Belgisiz japyraq jaıly» atty kitaptary oqyrmanǵa jol tartty.
Forým sońy erkin pikir almasý formatyna ulasyp, belgili qoǵam qaıratkerleri, ǵalymdar, ardager jýrnalıster, t.b. sóz alyp, óz oılaryn ortaǵa saldy.
Eskendir ZULQARNAI,
Gúlnar JOLJAN
«Egemen Qazaqstan»
