Aqynnyń kindik qany tamǵan mekende osyǵan deıin bıýsti men jekelegen eskertkishteri elimen oıshyldyń mereıtoılary qarsańynda qaýyshqan edi. Al bul kompozısııada músinshi Shákárimniń oıly beınesin oń qolyna kitap, sol qolyna taspıq ustatý arqyly beınelegen. Eskertkish avtory – osyǵan deıin Abaıdyń, Qunanbaıdyń jáne basqa da tarıhı tulǵalardyń keskin-kelbetin kelistirgen – jergilikti músinshi Nurbol Qalıev. Erekshe maǵyna ústegen óner týyndysy tarıhı qalanyń Shákárim dańǵyly men Qabanbaı batyr kóshesiniń qıylysyna qoıyldy.
Atalǵan eskertkishtiń saltanatty ashylý rásimine Prezıdent Qasym-Jomart Toqaev quttyqtaý hat joldady. Hatty saltanatty is-sharada oblys ákimi Nurlan Uranhaev oqyp berdi.
«Barshańyzdy qazaq rýhanııatynyń altyn besigi – Semeı tórindegi Shákárim Qudaıberdiuly eskertkishiniń ashylýymen quttyqtaımyn!
Shákárim Qudaıberdiuly – tól órkenıetimizdiń órisin keńeıtýge ólsheýsiz úles qosqan kemeńger tulǵa.
Ǵulama oıshyl ulaǵaty mol shyǵarmalar jazyp, uly Abaıdyń sara jolyn jalǵady. Álem ádebıetiniń jaýhar týyndylaryn ana tilimizde sóıletti. Sol arqyly ult dúnıetanymyn baıytýǵa zor eńbek sińirdi.
Shákárim Qudaıberdiuly qazaq halqynyń ǵana emes túbi bir túrki jurtynyń tarıhyn jańǵyrtyp, aǵartýshylyq salasynda óshpes iz qaldyrdy. Eýropa men Shyǵys elderiniń ilimin tereń zerttep, ulttyq fılosofııanyń irgetasyn qalaýǵa atsalysty.
Kórnekti aqynnyń aq júrek, taza aqyl, adal eńbek sııaqty asyl qasıetterdi keńinen dáriptegen teńdessiz murasy áli talaı urpaqqa ónege bolary sózsiz.
Sáýlet óneriniń týyndysy el ıgiligine aınalsyn» delingen Memleket basshysy joldaǵan hatta.
Shákárim Qudaıberdiuly – HIH ǵasyrdyń sońy men ótken ǵasyrdyń basynda qazaq rýhanııatynyń qambasyn baıytqan aıtýly sóz zergerleriniń biri. Abaıdyń tálimi men taǵylymyn tereń uǵynǵan ol arnaıy Hakim amanatyn oryndap, qajylyq sapar shegýmen birge Eýropa elderin aralap, qazaqtyń túp tarıhyn tasqa basqan. Adamzat balasy úshin eń qasterli uǵym ar ilimin alǵa tartyp, óziniń ǵumyrlyq fılosofııasymen tanylǵan sóz ıesi. Onyń asa baı ári san qyrly mol ádebı murasy – qazaq halqynyń ǵana emes, barsha túrki jáne Shyǵys mádenıeti úshin, jalpy adam balasy úshin eń qasterli dúnıeler.
Abaı oblysy
