Foto: Sport jáne dene shynyqtyrý isteri komıteti
Jarystyń sońǵy kúni Qazaqstannyń jas shahmatshylary 10 medal jeńip aldy onyń 2-i – altyn (Elnaz Qalıahmet pen Danııal Sápenov).
«Osy jyl shahmat súıer qaýymdy jaǵymdy jańalyqtarymen qýantýdy jalǵastyryp jatyr. Bizde rekordtyq medal sany bar, onyń kópshiligin jap-jas balalar jeńip aldy. Jastar arasyndaǵy rapıd jáne blıs boıynsha álem chempıonatynda da osyndaı nátıjege qol jetip, sportshylarymyzdy maqtan tutýymyzǵa jańa sebep paıda boldy. Bizdiń qorjynymyzda 10 medal bar. Shahmatshylardy, olardyń jattyqtyrýshylary men ata-analaryn osynaý tamasha nátıjemen quttyqtaımyn. Bul úlken sporttyq sapardyń basy ǵana ekenine kámil senemin»,dedi Qazaqstan shahmat federasııasynyń prezıdenti Tımýr Týrlov.
Aıta keteıik, U14–U18 jastar arasyndaǵy rapıd pen blıs boıynsha álem chempıonatyna 36 eldiń 320-ǵa jýyq jas shahmatshysy qatysqan. Qatysýshylardyń arasynda 1 grossmeıster (GM), 4 halyqaralyq sheber (IM), áıelder arasyndaǵy 1 halyqaralyq sheber (WIM), 37 FIDE sheberi (FM) jáne áıelder arasyndaǵy 16 FIDE sheberi (WFM) bar.
KazChess/Qazaqstan shahmat federasııasyna 16 jas shahmatshy ókildik etedi. Chempıonatty qabyldaýshy el (115) jáne onyń eýropalyq kórshileri ǵana – horvattar (33), polıaktar (22) men slovaktar (19) kóbirek qatysýshy jiberdi.
14–15 jeltoqsanda jarysqa qatysýshylar 15+10 rapıdte shveısarııalyq júıe boıynsha 11 týr oınap, júldegerlerdi anyqtady. Qazaqstan shahmatshylary 3 kúmis jáne 3 qola medal jeńip aldy.
