Sóıtip, 7-synyp oqýshysy elimizdiń namysyn qorǵap, jeńis tuǵyrynan kórindi. Ulan-Batyrdaǵy halyqaralyq týrnırde alty qarsylasyn bet qaratpaı, altyn alǵan Jaınanyń toǵyzqumalaqpen aınalysyp júrgenine bes jyldan asqan.
«Jarys joǵary deńgeıde ótti. Maǵan qatty unady. Júldeli bolyp, jeńis tuǵyrynan kóringende, erekshe áser aldym. Biz áýeli elimizdegi respýblıkalyq chempıonatqa qatysyp, sodan iriktelip Mońǵolııa jerine bardyq. Ulttyq sportqa kishkene bolsa da úlesimdi qosqanym – men úshin úlken maqtanysh», deıdi J.Alpysqyzy.
Qýyrshaqtaı qyzdyń qaryshty qadamy Tobyl-Torǵaı óńirine oń áser berdi. Turmanovtar otbasymen oblys ákimi Qumar Aqsaqalov arnaıy jolyqty. Jas sportshyny jeke quttyqtap, ata-anasyna alǵysyn bildirdi. Sonymen qatar, Jaınaǵa bir mıllıon teńge tartý etti.
«Jaına qyzymyzdyń jeńisi týraly estigende qatty qýandyq. Úlken eńbek pen talaptyń nátıjesi ekenin birden baıqaýǵa bolady. Osylaı kún saıyn júıeli túrde úzdiksiz daıyndalý jaqsy qorytyndy shyǵaratynyn Jaına dáleldedi. Osy rette jeńimpaz qyzdy tárbıelegen ata-anasyna da zor alǵysymdy aıtqym keledi» deıdi oblys ákimi Q.Aqsaqalov.
Torǵaı óńirinen ulttyq sport boıynsha birneshe sheber shyqqan. Olardyń esimi el aýzynda. Ulttyq oıyndy ulyqtaǵan aǵa býyn aýdanda toǵyzqumalaqtyń damýyna erekshe jaǵdaı jasaǵan.
«Torǵaı topyraǵy – talaı sport sańlaqtaryn túletken qasıetti meken. Ásirese toǵyzqumalaq sporty boıynsha Ábdibek Aıtmaǵanbetov, Sultanbek Maǵaýov, Edires Qystaýbaev, Erkin Álmaǵanbetov syndy maıtalman sheberlerdi erekshe aıtýǵa bolady. Olar ulttyq oıyndy jas urpaqqa nasıhattap, onyń damýyna erekshe úles qosty. Búginde olardyń izbasary retinde Jaına Alpysqyzyn aıtýǵa bolady», dedi Jankeldın aýdandyq bilim bóliminiń ádiskeri Qazbek Aımaqov.
Beıbit NURMUHANOV,
jýrnalıst
Qostanaı oblysy,
Jankeldın aýdany
