«Otandyq shıkizat óńdeý, ónimder men qyzmetter óndirý jáne olardy satý salasynda jumys isteıtin kásiporyndardyń eń ózekti máselesiniń biri – gaz ben kommýnaldyq qyzmetterdiń joǵary tarıfteri bolyp otyr. Sońǵy jyldary tabıǵı gaz tarıfteri únemi ósý tendensııasyna ıe bolyp, ótken eki jylda gaz baǵasy 200%-dan astam kóterildi, bul óz kezeginde kishi jáne orta taraptaǵy kásiporyndardyń qarjylyq júktemesin aıtarlyqtaı arttyrdy», dep atap ótti Amangeldi Nuǵmanov.
Senator bekitilgen tarıfteý júıesi júktemeni ádiletsiz bólýge alyp keletinin aıtty. Onyń pikirinshe, ýaqtyly shara qabyldanbasa, kásiporyndardyń óndiris qarqynynyń tómendeý qaýpi bar, bul óńirlerdegi áleýmettik-ekonomıkalyq jaǵdaıǵa teris áser etedi. Senator Nuǵmanov osy problemalardy sheshý úshin shaǵyn jáne orta ónerkásiptik kásiporyndarǵa arnalǵan gaz ben elektr energııasynyń tarıf saıasatyn qaıta qaraýdy usyndy.
«Shymkent qalasynda qoldanylǵan tájirıbe tolyq dáleldendi, onda ındýstrıaldy jáne arnaıy ekonomıkalyq aımaqtyń rezıdentteri kommýnaldyq qyzmetter tarıfterin qaıta qaraý arqyly jeńildik aldy. Bul elektr energııasynyń tarıfin tómendetýge múmkindik berdi. Qoldanylǵan tájirıbe óziniń tıimdiligin kórsetti jáne ony jalpy elimiz boıynsha otandyq óndiristi damytý maqsatynda qoldaný qajet. Atalǵan sharalar kásipkerlerdiń jumys tıimdiligin arttyryp, ónimdilikti saqtaýǵa, básekege qabilettilikti qamtamasyz etýge jáne jumys oryndaryn saqtaýǵa múmkindik beredi. Sonymen qatar, bolashaq ınvestısııalar úshin tartymdy klımat qalyptastyrady», dedi Amangeldi Nuǵmanov.
