Astana sportshylary aksııaǵa qatysty

Sportshylar qystyń aıazdy kúnderine qa­ramastan shyrt uı­qyda jatqan elden áldeqaıda erte oıanyp, qala tazalyǵyna jumylatyn jumysshylarǵa degen iltıpatyn, alǵysyn osylaı bildirýdi uıǵarypty. «Taza Qazaqstan» ekologııalyq aksııa­sy aıasynda uıymdastyrylǵan is-sharaǵa úles qosýdy oılaǵan sportshylar tańsáriden qala­daǵy Emender alleıasyna jıyldy. Alleıanyń qa­ryn kúrep, muzyn oıyp, tur­ǵyn­darǵa jaıly jaǵdaı jasaýdyń qamymen júrgen tazalyq­shylar da sol mańnan tabyldy. Jumysshylarǵa shaı, baýyr­saq usynǵan sportshylar tazalyqshylar áldenip, jylynyp alǵansha sol mańnyń qaryn kúredi. Qytymyr qystyń aıazyna, kóktemniń jańbyryna, jazdyń aptap ystyǵyna, kúzdiń daýyldy kúnderine qaramaı, qala tazalyǵyn saqtaýǵa jár­demdesetin eńbekqor jan­dar­ǵa maqtaý-madaq jaýdyrdy. Elishilik, jahandyq jarys­tar­da atoı salyp júrgen oǵlan­­darmen áńgimelesken meke­me ju­mysshylary kún­delikti qaýyrt tirshilikten bir sát damyldap, sergip qal­dy. Sportshylar jaǵy bolsa ta­zalyqshylardyń aq adal eń­begin kózben kórip, az-maz jár­demdesken soń, jumysshylarǵa degen syı-qurmeti burynǵydan da arta túskenin jasyrmady.

Emender alleıasyna kelgen sportshylardyń arasynda dzıýdo, grek-rım, djıý-djıtsý syndy ózge de sport túrlerinen biraz belesti baǵyndyryp úl­gergen Maqsat Saılaý, Mereı Máýlitqanov, Aıbek Aıtbekov, Mádı Amangeldi, Nurjan Ba­tyrbekov, Nurbek Talbýdın, Nur­sultan Dúısenqulov, Narı­man Seken syndy myqtylar boldy. Mánerlep syrǵanaýshy Zere Sarbalına men Aıza Mambekova da kóptiń ortasynan tabyldy. Ekologııalyq aksııa jaıynda pikir aıtqan Astana qalasynyń MMA boıynsha aǵa jattyqtyrýshysy Nurlan Qarabalın qala tur­ǵyndaryn tazalyq saqtaýǵa, qala tazalyǵyna jaýapty ju­mysshylardyń eńbegin baǵalaýǵa shaqyrdy.

«Búgin biz «Taza Qazaqstan» ekologııalyq aksııasy aıasynda qala tazalyǵyna az-kem bol­sa da óz úlesimizdi qos­yp, ta­za­lyq­shylarǵa qol­daý kór­setýge shyqtyq. Shyn má­nin­de kommýnaldyq qyzmet­ker­lerdiń eńbegi úlken. Biraq biz árqaısymyz kúndelikti tir­shiliktiń qamymen júrgende olardy elep-eskere bermeımiz. Biz búgin qala tazalyǵyna qural-saımandaryn saılap, tań atpaı kóshe tazalaýǵa shyǵatyn azamattardyń jumysyn kózben kórip, ózimiz de qolǵa kúrek aldyq. Bul sharýa ásirese, aıazdy kúnderi adamdy ábigerge sa­lady eken. Qalanyń sýyǵy óz aldyna, aıazdy jel betti qa­ryǵanda tynysty taryltyp jiberedi. Biz qala tazalyǵyn saqtaýǵa atsalysqan jandardy qurmetteımiz. Qurmettegen soń, ekologııalyq aksııaǵa jıyldyq. Turǵyndardyń kóringen jerge kúl-qoqys tastamaı, tazalyq saqtaýy – qala tazalyǵyna jaýapty mamandardyń eńbegin qurmettegeni dep túsinemiz. Sondyqtan qala turǵyndaryn tazalyq saqtaýǵa shaqyramyz. Qala tazalyǵyna kommýnaldyq qyzmetkerler ǵana emes, qala turǵyndary da janashyr bolsa eken deımiz», deıdi Nurlan Qarabalın.

Bıyl «Taza Qazaqstan» eko­logııalyq aksııasy aıasynda Astana qalasynyń ǵana emes, elimizdiń barlyq aımaǵyndaǵy turǵyndar óziniń qalasyn, aýy­lyn, aýlasyn kúl-qoqystan ta­zalaýǵa shyqqanyn aqparat qu­raldarynda jarııalap, kór­setilip jatyr. Munyń mán-mańyzy «Tazalyq taza jerde emes, tazalyq saqtaǵan jerde bo­lady» degen biraýyz sózben ún­desedi.