Qazaqstan sportshylary derbes delegasııa retinde jazǵy Olımpıada oıyndaryna segizinshi márte qatysty. Tórtjyldyqtyń basty básekesi bizdiń el quramasynyń 1 altyn, 3 kúmis, 3 qola ıelenip, jalpy komandalyq esepte 43-orynǵa turaqtaýymen este qaldy.
Bul jolǵy jazǵy Olımpıada oıyndarynyń ereksheligi resmı ashylý saltanaty sport nysanynda emes, Sena ózeniniń ústinde ótýi boldy. Baıraqty dodaǵa sporttyń 25 túrinen 92 lısenzııany ıelengen 80 sportshy qatysty.
Jetistigimiz – jeti júlde
Jarystyń alǵashqy kúni Eldos Smetov 60 kelide altynnan alqa taǵyp, eńsemizdi bıikke kóterdi. Osylaısha ol táýelsiz Qazaqstan tarıhynda dzıýdodan Olımpıada chempıony atanǵan tuńǵysh qazaq sportshysy atandy. Dzıýdodan 66 keli salmaq dárejesinde beldesken Ǵusman Qyrǵyzbaevtyń qola júldesi de altynǵa bergisiz. 60 kelide segiz jyl kúresken Qyrǵyzbaevtyń buıyrmaǵan Olımpıada joldamasy 66 kelide qolyna tústi.
Kórkem gımnastıkadan tarıhı kúmis medaldi enshilegen Narıman Qurbanovtyń jeńisin erekshe atap ótken jón bolar. Narıman at ústindegi jattyǵýdy eń birinshi bolyp oryndap, 15.433 upaı aldy. Ol bazalyq qıyndyǵy 6.7-ge teń jattyǵýdy sátti oryndap shyqty. Bul jetistik Qazaqstan tarıhyndaǵy sporttyq gımnastıkadaǵy tuńǵysh medal boldy.
Aleksandra Le Parıjdegi Olımpıada oıyndarynda Islam Satpaevpen birge pnevmatıkalyq vıntovkadan 10 metr qashyqtyqqa aralas juptyq nysanadan kózdeý saıysynda qola medal jeńip aldy. Qola júlde úshin Qazaqstan men Germanııa komandasy arasyndaǵy tartys 17-5 esebimen aıaqtalǵan edi.
Erkin kúresten beldesken myqtylar kóp, solardyń arasyna synalap kirip qana qoımaı, ekinshi úzdik bolý ekiniń biriniń qolynan kele bermeıdi. Parıj kileminde Demeý Jadyraev álemniń eki dúrkin chempıony Aqjol Mahmutovty (Qyrǵyzstan) jeńip, altynǵa jete almaı, kúmisti qorjynǵa saldy.
Aıta keteıik, sporttyq órmeleýden Ámir Maımuratov irikteý kezeńinde 4,89 sekýndtyq nátıjemen Olımpıada rekordyn jańartqan edi.
Osylaısha ulttyq qurama olımpıada oıyndarynda 1 altyn, 3 kúmis, 3 qola júldemen komandalyq esepte 43-orynǵa taban tiredi. Barlyǵy 126 medal (40 altyn, 44 kúmis, 42 qola) jınaǵan AQSh quramasy top bastasa, altynynyń sany AQSh-pen birdeı, kúmisi men qolasy az Qytaı (27 kúmis, 24 qola) ekinshi oryn ıelendi. Azııalyq jáne bir el – Japonııa (20, 12, 13) 45 medalmen úzdik úshtikti túıindedi.
Bıyl Qazaqstan quramasy úshin Parıjdegi XVII Paralımpıada oıyndarynda mportshylar toǵyz medal alyp, Tokıodaǵy úzdik kórsetkishin jańartty.
Paýerlıftıngten 54 keli salmaqta synǵa túsken sportshymyz Davıd Degtıarev 188 keli kóterip altyn medaldi jeńip aldy. Degtıarev el tarıhyndaǵy eki dúrkin paralımpıada chempıony bolǵan alǵashqy sportshy atandy.
Sonymen qatar, Paralımpıadalyq dzıýdodan 48 keli salmaqta Aqmaral Naýatbek chempıon atandy. Aqmaral Naýatbekten bólek Erǵalı Shameı kúmis; al Daıana Fedosova, Zarına Raıfova jáne Jurqamyrza Shúkirbekov qola medaldi qorjynǵa saldy. Odan bólek nysana kózdeýden Erkin Ǵabbasov, júzýden Nurdáýlet Jumaǵalı kúmis alsa, jeńil atletıkadan Dastan Muqashbekov qola medal enshiledi.
2024 jylǵy paralımpıada oıyndaryna 9 sport túrinen 33 lısenzııa alǵan Qazaqstan quramasy Parıjge 44 sportshy alyp bardy.
Osylaısha, Qazaqstannyń paralımpıada quramasy Parıjdegi jarysty rekordpen aıaqtady.
