Fotolar: Májilistiń baspasóz qyzmeti
Sóz basynda Májilis Spıkeri, «AMANAT» partııasynyń Tóraǵasy Erlan Qoshanov el Prezıdenti Qasym-Jomart Toqaevtyń tapsyrmasy boıynsha arnaıy memlekettik komıssııa qurylyp, barlyq qajetti kómek uıymdastyrylǵanyn atap ótti.
«Búgin baýyrlas Ázerbaıjan eliniń jolaýshylar ushaǵy Aqtaý mańynda apatqa ushyrady. Bul qaraly habar barshamyzdyń qabyrǵamyzdy qaıystyrdy. Jolaýshylar arasynda Ázerbaıjan, Qyrǵyzstan, Reseı jáne Qazaqstan azamattary bar. Osyǵan baılanysty, Májilis depýtattary qaza tapqan adamdardyń týystary men jaqyndaryna kóńil aıtady. Al zardap shekken azamattardyń tezirek saýyǵyp ketýin tileımiz. «AMANAT» partııasy aman qalǵandar men olardyń jaqyndaryna qoldaý kórsetedi. Qajet bolǵan jaǵdaıda donorlyq qan tapsyrý jumysyn uıymdastyrýǵa daıyn», dedi ol.
Májilistiń baspasóz qyzmetiniń málim etýinshe otyrys barysynda halyq qalaýlylary bıyl atqarylǵan jumysty qorytyndylady. Zań shyǵarý jumysynda depýtattar memlekettiń halyq aldyndaǵy áleýmettik mindettemelerin, onyń ishinde jalaqy men zeınetaqyny ındeksteý, járdemaqy mólsherin arttyrý, medısınalyq kómekti qamtamasyz etý jáne ózge de basymdyqtardy oryndaýǵa basa nazar aýdardy. Nashaqorlyq pen lýdomanııa sııaqty qoǵam dertimen kúresýdi kózdeıtin zańdar ázirlengenin erekshe atap ótken jón. Sońǵy úsh sessııada barlyǵy 247 zań jobasy qaraldy. Onyń 169-y maquldanyp, Senatqa jiberildi. Bul rette, atalǵan qujattardyń 59-yna «AMANAT» partııasy fraksııasynyń músheleri bastamashylyq etti. Sondaı-aq, depýtattar zań jobalaryna 3,5 myń ózgeris pen túzetý engizdi. Sonymen qatar, plenarlyq otyrystarda 460 depýtattyq saýal joldandy.
«Prezıdent Joldaýlarynda jáne onyń saılaýaldy baǵdarlamasynda qamtylǵan mindetterdi zańnamalyq turǵydan qamtamasyz etý boıynsha úlken jumys atqaryldy. Memleket basshysy Qasym-Jomart Toqaev jýyrda ótken barlyq deńgeıdegi depýtattar forýmynda «AMANAT» partııasynyń qyzmetine joǵary baǵa berdi. Jyl basynda Premer-Mınıstrdiń kandıdatýrasyn bekitý rásiminde de Májiliske arnaıy rıza ekenin bildirdi. Bul jetistikter – depýtattardyń qajyrly eńbeginiń nátıjesi. «AMANAT» fraksııasy – Májilistegi negizgi saıası kúsh. Biz bılik pen halyq arasyndaǵy kópirmiz. Azamattardyń senim údesinen shyǵyp, osy baǵyttaǵy jumysty jalǵastyrý mańyzdy», dedi Erlan Qoshanov.
«AMANAT» partııasynyń Tóraǵasy máslıhat depýtattarymen jáne aýyl ákimderimen júıeli jáne dáıekti birlesken jumys júrgizýdiń mańyzyna toqtaldy. Sebebi olardyń basym kópshiligi – partııa ókilderi. Májilis janyndaǵy zań shyǵarý jumysyna tartylatyn máslıhat depýtattarynyń belsendiligin arttyrý mańyzdy. Sondaı-aq, aýyl ákimderiniń jumysyn kúsheıtý úshin «AMANAT» fraksııasy birqatar usynys ázirledi.
Jıyn sońynda Májilis Spıkeri parlamentshilerdiń aldaǵy ýaqytta óńirlerge jasaıtyn sapary kezinde depýtattarǵa júkteletin birqatar mindetti aıqyndap berdi. Keler jyly qańtarda depýtattardyń saılaýshylarmen dástúrli kezdesýleri bastalady. Sapar barysynda májilismender óndiristik jáne áleýmettik nysandardy aralap, eńbek ujymdarymen júzdesedi. Sondaı-aq azamattardy jeke máseleleri boıynsha qabyldaý ótkizedi. Erlan Qoshanov azamattarmen kezdesýler jergilikti jerlerdegi naqty máselelerdi talqylaı otyryp, ashyq pikirtalas formatynda ótýge tıis ekenin erekshe atap ótti.
