«Kezdesýdi qorytyndylaı kele, qala damýynyń negizgi baǵyttaryna toqtalaıyn. Birinshisi - qalanyń qaýipsizdigi. Ol úshin qoǵamdyq tártipti qamtamasyz etýde ornatylatyn kamera sany 585-ke, jol qaýipsizdigi úshin «Sergek» kamerasynyń sany 136-ǵa jetkiziledi. Ekinshisi - qala turǵyndaryn turǵyn úımen, jylýmen, elektrmen, sýmen, gazben, sapaly jolmen qamtamasyz etý, sondaı-aq aýrýhana, mektep, mádenıet jáne sport obektilerin salý, sol arqyly qolaıly qala qurý. Úshinshisi - ádemi ári jasyl qala. Bul aýla men vorkaýt alańdaryn, saıabaqtardy, skverlerdi abattandyrý, kóshelerdi jaryqtandyrý, kóp qabatty úılerdiń qasbetteri men shatyrlaryn jóndeý. Ekonomıkany júıeli damytýdyń osyndaı sharalarynyń barlyǵy birinshi kezekte Prezıdenttiń tapsyrmalaryna sáıkes halyqtyń ómir súrý sapasyn jaqsartýǵa baǵyttalǵan», dep atap ótti B. Isabaev.
11 aıdyń qorytyndysy boıynsha Taldyqorǵannyń áleýmettik-ekonomıkalyq damý nátıjelerine egjeı-tegjeıli toqtalyp, oblys ortalyǵyn kórkeıtýdiń aldaǵy josparlary jaıly aıtqan óńir basshysy turǵyndardy tolǵandyrǵan suraqtarǵa jaýap berdi.
Úsh saǵattyq kezdesý barysynda oblys ákimine 60-qa jýyq suraq qoıyldy. Qalalyqtar negizinen turǵyn úı-kommýnaldyq sala, áleýmettik jáne jol ınfraqurylymyn damytý, qaýipsizdikti qamtamasyz etý, ıaǵnı jańa 9-shy shaǵyn aýdanda polısııanyń tirek pýnktin ornatý, sol sııaqty shaǵyn jáne orta bızneske, omarta sharýashylyǵyna qoldaý kórsetý, jańa shaǵyn aýdandarda aty joq kóshelerge ataý berý, qala syrtynda kóterme saýda bazaryn qurý, qoǵamdyq kóliktiń jumysy jáne basqa da máselelerdi kóterdi. Qalada erekshe qajettiligi bar balalardy ońaltýǵa jasalǵan jaǵdaılar úshin alǵys bildirgen turǵyndar da boldy.
Kezdesý qorytyndysynda suraqtardyń bárine jaýap berildi, turǵyndardyń óz suraýlaryn jazbasha túrde joldaýyna da múmkindik jasaldy. Jıynda birqatar ózekti máseleler boıynsha jaýapty tulǵalarǵa tapsyrma berildi.
Atap ótsek, oblys ákiminiń qalalyqtarmen ótken jylǵy kezdesýinde turǵyndar kótergen 36 máseleniń 26-sy qazirgi ýaqytta sheshildi. Qalǵan 10 suraq boıynsha jumystar atqarylyp jatyr.
