Foto: ashyq derekkóz
Prezıdent Qasym-Jomart Toqaev Ázerbaıjannyń Azal kompanııasyna tıesili ushaqtyń apatqa ushyraýynan zardap shekken adamdardy qutqarý kezinde erlik, kásibılik jáne azamattyq jaýapkershilik tanytqany úshin bir top qazaqstandyqty memlekettik nagradalarmen marapattady.
Olardyń arasynda TJM ókilderi, medısına mamandary, polıseıler, «Mańǵystaý óńirlik elektrotoraptyq kompanııasy» aksıonerlik qoǵamynyń jumysshylary jáne Aqtaý áýejaıynyń qyzmetkerleri bar.
Memleket basshysynyń Jarlyǵymen Mańǵystaý oblysy polısııa departamentiniń krımınalısi Aıbek Álibaev Baýyrjan Momyshuly atyndaǵy II dárejeli «Aıbyn» ordenimen, Mańǵystaý oblysy Tótenshe jaǵdaılar departamenti Basqudyq aýyly №12 órt sóndirý bóliminiń komandıri Seribolat Ońǵar, Mańǵystaý oblysy Tótenshe jaǵdaılar departamenti avarııalyq-qutqarý jumystary jáne órt sóndirý qyzmetiniń №12 órt sóndirý bólimshesiniń órt sóndirýshisi-qutqarýshysy Oljas Baıtóre, Qorǵanys mınıstrligi 30153 áskerı bólimshesiniń alys jetekti radıomarker pýnktiniń bólim bastyǵy (aýysym bastyǵy) Nurlan Botaǵarın, Mańǵystaý oblysy Tótenshe jaǵdaılar departamenti avarııalyq-qutqarý jumystary jáne órt sóndirý qyzmetiniń №1 mamandyrylǵan órt sóndirý bólimshesiniń aǵa órt sóndirýshisi-qutqarýshysy Marlen Sarkenov Raqymjan Qoshqarbaev atyndaǵy III dárejeli «Aıbyn» ordenimen, Mańǵystaý oblystyq kópsalaly aýrýhanasynyń ortalyq meńgerýshisi Baqytjan Qoıbekov pen Aqtaý halyqaralyq áýejaıy medısınalyq pýnktiniń meńgerýshisi Irına Kochergına «Qurmet» ordenimen marapattaldy.
«Erligi úshin» medalimen Mańǵystaý oblystyq jedel jáne shuǵyl medısınalyq járdem stansııasynyń feldsheri Tımýr Qısaev, QR Tótenshe jaǵdaılar mınıstrligi Apattar medısınasy ortalyǵynyń Mańǵystaý oblysy boıynsha fılıalynyń dárigeri Ospan Orazbekov, «Qazaeronavıgasııa» RMK Aqtaý fılıalyndaǵy «Vyshka» dıspetcherlik pýnktiniń dıspetcheri Iаroslav Tolstıkov, «Mańǵystaý óńirlik elektrotoraptyq kompanııasy» AQ Aqtaý elektr jeliler aýdanynyń sheberi Nuraly Shopanov, QR Tótenshe jaǵdaılar mınıstrligi Apattar medısınasy ortalyǵynyń Mańǵystaý oblysy boıynsha fılıalynyń júrgizýshi-sanıtary Qojabek Allabergenov, Mańǵystaý oblysy Tótenshe jaǵdaılar departamenti «Jedel qutqarý jasaǵynyń» qutqarýshysy Manas Bagıtov, «Qazavıaqutqarý» AQ ekinshi ushqyshy Álisher Estemes, «Qazavıaqutqarý» AQ áýe kemesiniń komandıri Ashat Qudabaev, QR Tótenshe jaǵdaılar mınıstrligi Apattar medısınasy ortalyǵynyń Mańǵystaý oblysy boıynsha fılıalynyń feldsheri Zamanbek Qubaıdýllaev marapattaldy. Aqtaý halyqaralyq áýejaıynyń qyzmet bastyǵynyń orynbasary Bekbolat Jumaǵulov, QR Ádilet mınıstrligi «Sot saraptamalary ortalyǵy» Mańǵystaý oblysy boıynsha fılıalynyń mamany Eldar Orazalıev, QR Tótenshe jaǵdaılar mınıstrligi Apattar medısınasy ortalyǵynyń Mańǵystaý oblysy boıynsha fılıalynyń psıhologi Jan Esen «Eren eńbegi úshin» medaliniń ıegeri atandy.
Sonymen qatar 51 adamǵa Prezıdenttiń Alǵysy jarııalandy.
