Foto: Úkimettiń baspasóz qyzmeti
Aıta keteıik, 1969 jyly salynǵan orta mekteptiń eski ǵımaratynda 140-tan astam bala bilim alyp jatyr. 55 jyldan beri bilim oshaǵy eshqandaı kúrdeli jóndeý kórmegen. Qazirgi ýaqytta mektep apatty jaǵdaıda atap aıtqanda, sý jáne káriz qubyrlary tozǵan, jylý júıesi zaqymdanǵan. Jalpy, ǵımarattyń fızıkalyq tozý deńgeıi 40%-dy quraıdy.
«Jańa mektep 200 orynǵa eseptelgen, 30 oryndyq shaǵyn daıyndyq ortalyǵy bolady. Rýdnıchnyı aýylynda barlyǵy 1 myńnan asa adam turady, onyń 241-i mektepke deıingi jáne mektep jasyndaǵy balalar. Bilim berý nysanynyń qurylysy oryn tapshylyǵy máselesin sheshýge septigin tıgizip, balalardyń zamanaýı talaptarǵa saı bilim alýyna qajetti qolaıly jaǵdaı jasaıdy», delingen habarlamada.
Buǵan deıin Úkimet Petropavlda balabaqsha, Atyraý oblysyndaǵy Jamansor aýylynda jáne Ulytaý oblysynyń Myńadyr stansasynda mektep, Astanada tirek-qımyl apparaty buzylǵan balalarǵa arnalǵan ońaltý ortalyǵy, Aqtóbe qalasynda erekshe balalarǵa arnalǵan arnaıy balabaqsha, Aqmola oblysynyń Zerendi aýylynda sport keshenin salýǵa, Rıdder qalasynda kópsalaly aýrýhana kesheniniń qurylysyn aıaqtaýǵa jáne basqa da jobalardy júzege asyrýǵa qarjy bólgen bolatyn.
