Sýret: 365info.kz
Májilis depýtaty, «Amanat» partııasy fraksııasynyń múshesi Natalıa Dementeva Aqmola oblysynda saparmen júr. Halyqpen kezdesýin ol Arshaly aýdany Anar aýylyndaǵy Anarkól bógetiniń kóktemgi sý tasqynyna daıyndyǵyn baqylaýdan bastady. О́ıtkeni ótken ǵasyrdyń ortasynda salynǵan aýyl men kól arasyndaǵy uzyndyǵy 1 300 metrdi quraıtyn bóget ábden eskirgen. Onyń ústine aýyl turǵyndaryn tasqyn sýdan qorǵaýǵa qaýqarsyz edi. Osyǵan baılanysty byltyr qaıta jańǵyrtý jumysy bastalyp, búginge deıin aınalma kanaldyń bir bóligi tazartylypty. Bóget qabyrǵasy nyǵaıtylyp, 6 metrge deıin keńeıtilgen.
«Memleket basshysy Qasym-Jomart Toqaev jýyrda «Ana tili» gazetine bergen suhbatynda atap ótkendeı, byltyr joıqyn sý tasqyny boldy. Zardap shekkender qatarynda Arshaly aýdany da bar. Sondyqtan aldaǵy kóktemge daıyn bolýymyz kerek. Májiliste jańa Sý kodeksiniń jobasy qaralyp jatyr. Memleket 2030 jylǵa deıin 40-tan asa jańa sý qoımasyn salý jáne el aýmaǵynda jumys istep turǵan 37 sý qoımasyn jóndeý baǵytynda jumys júrgizip jatyr», dedi N.Dementeva.
Al Batys Qazaqstan oblysyna jumys sapary barysynda Májilis depýtaty, Jalpyulttyq sosıal-demokratııalyq partııasy fraksııasynyń tóraǵasy Ashat Raqymjanov «Jaıyqteploenergo» AQ jylý elektr ortalyǵynyń ujymymen kezdesti. Búginde shahardy jylý jáne ystyq sýmen qamtamasyz etip otyrǵan mekemeniń 88 paıyzy tozǵan. Sondyqtan rekonstrýksııa jumystary júrgizilip jatyr. Mysaly, birinshi týrbo agregatty aýystyrý bes jyl buryn bastalyp, 2025 jyldyń naýryz aıynda iske qosý josparlanǵan.
«Mundaǵy ózekti másele – jabdyqtardyń qymbattyǵy. Deldaldar arqyly satyp alatyn bolǵandyqtan, tarıfke de áser etýi múmkin. Jumysshylardyń aıtýynsha, ortasha jalaqy 200 myń teńgeniń aınalasynda, saldarynan jastardyń munda jumys isteýge degen qyzyǵýshylyǵy tómen», dedi A.Raqymjanov.
Májilis depýtattary Juldyz Súleımenova men Qazybek Álishev Aqtóbe oblysyndaǵy aǵaıynmen júzdesip, «Amanat» partııasynyń saılaýaldy baǵdarlamasy aıasynda salynǵan balalar fýtbol akademııasyn kórip qaıtty. Áńgime barysynda májilismender Memleket basshysy Qasym-Jomart Toqaev Joldaýynda depýtattarǵa sport salasyndaǵy zańnamany jańartýdy tapsyrǵanyn eske saldy. Prezıdent óz sózinde bul túzetýlerdiń jańa chempıondar býynyn daıyndaýǵa negiz bolatynyn erekshe atap ótken edi. Byltyr qarasha aıynda Májilis depýtattary dene shynyqtyrý jáne sport máseleleri týraly zań jobasyn alǵashqy oqylymda maquldaǵan.
О́z kezeginde Májilis depýtaty Gúldara Nýrýmova Baızaq aýdany Qyzyl Juldyz aýylyndaǵy jańa dárigerlik ambýlatorııanyń jumysymen tanysty. Munda 3 dáriger, 13 orta medısına qyzmetkeri jáne bir psıholog jumys isteıdi. Atalǵan ambýlatorııa aýyldaǵy 5 myńǵa jýyq turǵynǵa qyzmet kórsetedi.
«Memleket densaýlyq saqtaý salasyna únemi erekshe kóńil bóledi. Bıyl dárigerlerdi qorǵaýǵa, olardyń mártebesin kóterýge baǵyttalǵan sapaly jańa zań kúshine endi. Birqatar áleýmettik kepildik engizilip, quqyqtyq qorǵaý kúsheıtildi. Atap aıtqanda, mektepke deıingi uıymdarda medısına qyzmetkerleriniń balalaryna birinshi kezekte oryn beriledi, basy artyq esep berý máselesi qysqartylady, dárigerlerdiń kásibı jaýapkershiligi saqtandyrylady jáne basqa da ózgerister bar», dedi depýtat.
Petropavl qalasyndaǵy bógetti qalpyna keltirý jumystary da Májilis depýtattarynyń nazarynan tys qalmady. Byltyrǵy alapat sý tasqyny Soltústik Qazaqstan halqyn biraz ábigerge salǵan edi. Osyny eskerip, teriskeılikter bıyl aldyn ala qamdanyp jatyr. Depýtat Erkebulan Mámbetov pen Dmıtrıı Koloda óńirge sapary barysynda Oıqala shaǵyn aýdanyndaǵy 1960 jyly paıdalanýǵa berilgen bógettiń jaı-kúıimen tanysty. Qazirgi tańda nysanǵa 205 myń tonna ınertti materıal jetkizilgen. Bógetti beton plıtalarymen nyǵaıtý júrgizilip jatyr. Jobanyń jalpy quny 851 mln teńgeni quraıdy.
Budan ózge aımaqtarda da Májilis depýtattary óndiristik jáne áleýmettik nysandardy aralap, eńbek ujymdarynda kezdesýler ótkizip, azamattardy jeke máseleleri boıynsha qabyldaýdy jalǵastyrady. Sonymen qatar olar saılaýshylarǵa qabyldanǵan zańnamalyq ózgerister týraly aqparat berip, máselelerin tyńdaıdy.
