Saladın buǵan deıin kólikterge GPS treker ornatatyn kompanııada basshylyq qyzmette bolǵan. Biraq jany aýyldy ańsaǵan soń, bir-aq kúnde artynyp-tartynyp aýylǵa kóship barǵan. Balalyq shaǵy Nura aýdanynda ótipti. Áke-sheshesi qarapaıym eńbek adamdary bolǵan. Sharýanyń bárin kórip ósken Saladınge qoradaǵy jumys qorqynyshty emes. Eńbekpen erte shyńdalǵan onyń aýylǵa kóshýdegi maqsat-muraty áride jatyr.
Qazir jas fermer qoıdyń edilbaı men gıssar tuqymyn ósirip otyr. Aýylǵa kóship kelgen betinde Qostanaıdaǵy belgili «Qazaqqoı ortalyǵy» sharýashylyǵynan 30 bas saýlyq ákelipti. Byltyr Túrkistannan 50 gıssar qoıy men asyltuqymdy gıssar qoshqaryn satyp alypty. Qazirdiń ózinde olardyń qozylary ájeptáýir salmaqty.
Bitimi bólek gıssar tuqymy qoshqarynyń baǵasy áleýmettik jelini dúrildetip tur. Mundaı qoshqardyń boıy 1 metrden asyp, salmaǵy 190-200 kelige deıin barady. Etti ári maıly, quıryqty, dúnıejúzindegi barlyq qoı tuqymynyń ishinde eń irisi. Tez ósip, salmaqty da tez jınaıdy. Etiniń de dámi erekshe kórinedi. Osynyń bárin ábden zerttegen fermer taǵy da 100 qoı alamyn dep otyr. Gıssar qoıynyń otany Tájikstanǵa jol tartamyn deıdi. Asyl tuqymdy qoshqar ákelip, seleksııalyq jumysty jańǵyrtyp, qoı tuqymyn asyldandyrmaqshy.
– Asyltuqymdy eki qoshqarym bar. Kútimine asa jaýapkershilikpen qaraımyn. Ýaq malda kezdesetin ishek qurt, brýsellez, qotyr sekildi túrli aýrýdyń aldyn alamyz. Ol úshin arnaıy ekpe salǵyzamyz. Úsh-tórt aı saıyn analız alyp otyramyz. Aryqtyń, jasandy kóldiń sýyn ishpeıdi. Qudyqtyń tushy sýyn beremiz. Kúnde qosymsha arpa beremiz, – deıdi S.Iýzbegov.
Kóktemnen bastap, qoshqarlaryn sata bastaıdy. Qazirden alǵysy keletinder kóp. Saladınniń áleýmettik jelisi arqyly kórip, bilip qyzyǵýshylyq tanytqan jurt tuqymyn alýǵa asyǵyp júr. Aýylǵa kelgen meımandar Saladınniń qorasyna soǵady. О́ıtkeni iri qoshqarlaryn qyzyqtaıdy. Sonymen qatar Qostanaıdan sútti «Sımmental» tuqymynan 10 sıyr ákelý de josparynda bar.
Aýyldyń jurty keń ǵoı. Elge úı qosyldy dep qushaǵyn ashyp, kómek qolyn sozady. Solardyń biri – kórshisi Qýanysh Maratuly. Ol aýyldyń veterınar dárigeri. Saladınge kóp kómegin tıgizedi. Ekeýi tonnyń ishki baýyndaı aralasyp ketken. Qýanysh óziniń bilgenimen bólisedi. Qoıyn egip beredi. Basqa da sharýalaryna tik turady. Aýyldyń baqtashysy Aqjol Saǵadıev te qoly altyn jigit. Qorasynyń, úıiniń qurylysyna qolkómegin aıaǵan emes. Jańa kóship kelgen Saladınge alǵash bolyp erýlik bergen de – ekeýi. Atqa minip, ań qýady. Mal soıyp, et músheleýge deıin úıretip qoıypty.
Bıyl Úkimettiń kómegine júginip, jeńildetilgen nesıe rásimdemekshi. Sol arqyly traktor, shóp shabatyn tehnıka alǵysy keledi. Bári de qysqy azyǵyn qamdaýdyń áreketi.
Sharýasyna tastaı Saladın súr boıdaq. Aýyldyń qyzyn alyp, shańyraq kótergisi keledi. Ol kúnniń de aýyly alys emestigin jáne sezdirdi. Sol sebepti, kúni-túni qazaqsha úırenip júr. Sóıtip, Saladın qoı ǵana emes, oı da baǵyp júr.
Qaraǵandy oblysy,
Buqar jyraý aýdany,
Aqbel aýyly
