Sýret: akorda.kz
Prezıdent aıtqandaı, ótken jyl elimiz úshin aıryqsha mańyzdy jyl boldy. Barlyq óńirde ábden tozyǵy jetken ınjenerlik-kommýnaldyq ınfraqurylymdy jańǵyrtýǵa baǵyttalǵan aýqymdy jumystar júrgizilgenine kýágermiz. 18 mıllıon sharshy metr turǵynjaı paıdalanýǵa berilip, 7 myń shaqyrym avtokólik joly salynyp, jóndelgeni – sonyń aıǵaǵy. Shalǵaıdaǵy talaı eldi mekenniń de joly túzelip, aýyldaǵy aǵaıynnyń eńsesi kóterile tústi. Ekonomıkada Memleket basshysy alǵa qoıǵan mańyzdy mindet – qaıta óńdeý sektoryn qarqyndy damytýǵa kúsh salynyp, onyń ónerkásiptegi úlesi óndirý salasynyń deńgeıine jýyqtaǵany kóńil súıintedi. Keıbir «sáýegeılerdiń» byltyr qurǵaqshylyqtyń saldarynan egin shyqpaıdy degen boljamy jalǵan bolyp shyqty. 27 mln tonnaǵa jýyq, ıaǵnı keıingi on jyl ishindegi rekordtyq kólemde astyq jınaldy. Prezıdenttiń áleýmettik bastamalary da tabysty iske asyrylyp jatyr. «Ulttyq qor – balalarǵa» baǵdarlamasy aıasynda alǵashqy tólem jasaldy. Jyldaǵydaı zeınetaqy men járdemaqy ındekstelip, stýdentterdiń shákirtaqysy men azamattyq sala qyzmetkerleriniń jalaqysy kóbeıtildi. «Jaıly mektep» jobasy boıynsha boı kótergen jańa mektepter kóz qýantady. Jurt narazylyǵyn týdyryp kelgen «legıonerlerge» bıýdjet qarjysyn shashýdy tyıý jóninde Úkimetke tıisti tapsyrma berilip, buqaralyq sportty, ásirese balalar sportyn damytýǵa basa mán berilip otyr.
Elimiz úshin ótken jyldyń eń qıyn synaǵy alapat sý tasqyny boldy. Sol synnan memleket tarapynan qabyldanǵan jedel de pármendi sharalardyń jáne halqymyzdyń yntymaq-birliginiń arqasynda abyroımen óttik. Zardap shekken barlyq otbasyǵa qomaqty áleýmettik kómek kórsetilip, jańa baspana berildi. Turǵyndar ǵana emes, qarǵyn sýdan bıznesine nuqsan kelgen kásipkerlerdiń shyǵyny da óteldi. Memleket basshysynyń arnaıy Úndeýine ún qosqan iri bıznes ókilderi tasqyn saldaryn joıýǵa aıtarlyqtaı úles qosqany da – jadymyzda saqtalǵan jaqsylyq belgisi.
Suhbat el ishinde aıtylyp, áleýmettik jeliler men messendjerler arqyly taratylyp, halqymyzdy eleńdetip qana qoımaı, alańdatyp ta otyrǵan ártúrli áńgimeler men joramaldarǵa shynaıy jaýap berilgenimen de mańyzdy boldy.
О́tken jyldyń qarasha aıynan bastap teńgeniń dollarǵa shaqqandaǵy baǵamy 500-den asyp ketkeni jurtshylyqty alańdatyp otyr. Osy jónindegi saýalǵa oraı Memleket basshysy: «Bizdiń valıýta baǵamyn qoldan ustap turý tájirıbesinen bas tartqanymyzǵa biraz ýaqyt boldy. Naryq faktorlaryna baılanysty erkin baǵam qalyptastyrý jolyn tańdadyq. Men teńgeni kúsheıtý úshin elimizdiń altyn-valıýta qoryn bosqa ysyrap etý orynsyz dep sanaımyn. Naryqqa qatysy bar keıbir qurylymdar teńge baǵamyn basqarýǵa qolaıly etý týraly usynystar aıtyp júr. Ulttyq bank pen Úkimet onyń bárin muqııat qarastyryp jatyr. Máseleni zerdelegen soń bul baǵyttaǵy ustanymymyzdy ózgertý qajet pe degen saýaldyń jaýaby belgili bolady. Basty maqsat – ekonomıkanyń turaqtylyǵy men tıimdiligin qamtamasyz etý, naqty sektordy qarqyndy damytý, eńbek ónimdiligin arttyrý jáne turaqty jumys oryndaryn kóptep ashý», dedi.
Bul rette ótken jyldyń sońynda Ulttyq ekonomıka mınıstri laýazymyna óńirde de, ortalyqta da jaýapty qyzmetter atqarǵan, Eýrazııalyq Ekonomıkalyq komıssııanyń Básekelestikti qorǵaý jáne damytý mınıstri bolǵan tájirıbeli maman Serik Jumanǵarınniń taǵaıyndalǵandyǵy bekerden-beker emes. Keıingi jyldary basqa da mınıstrlikterge óńirde jaýapty qyzmetter atqarǵan azamattar kele bastaǵany málim. Osy oń úrdis aldaǵy ýaqytta júıeli jalǵasyn taýyp, Úkimettiń jumysyna tyń serpin beretini belgili bolyp otyr.
Túıindeı aıtqanda, Memleket basshysynyń «Ana tili» gazetine bergen suhbaty kóńilimizdegi keı kúmándi seıiltip, elimizdiń erteńine degen senimimizdi nyǵaıta tústi.
