Bul týraly qalamgerdiń uly Edige Maǵaýın Facebook-tegi paraqshasynda jazdy.
«Arystan ákem fánıden baqıǵa attanyp ketti, AQSh-tyń Merılend shtatyndaǵy úıinde, bala-shaǵasynyń ortasynda, 2025 jylǵy qańtardyń 9-y, jergilikti ýaqyt boıynsha saǵat 19:55–te (Qazaqstan ýaqyty boıynsha qańtardyń 10-y, saǵat tańǵy 5:55)», dep jazdy ol.
Aıta keteıik, Muhtar Maǵaýın - tarıhshy, jazýshy, qazaqtyń aýyz ádebıetin zertteýshi ǵalym. Fılologııa ǵylymdarynyń doktory, Qazaq KSR Memlekettik syılyǵynyń laýreaty (1984), Qazaqstannyń halyq jazýshysy (1996).
Muhtar Muqanuly Maǵaýın 1940 jyly 2 aqpanda sol kezdegi Semeı oblysynyń Shubartaý aýdanynda týǵan. 1962 jyly Qazaq memlekettik ýnıversıtetiniń fılologııa fakýltetin, 1965 jyly aspırantýrasyn bitirgen.
«Qazaq ádebıeti» gazetiniń bólim meńgerýshisi, «Jazýshy» baspasynda bas redaktordyń orynbasary, Qazaq KSR Ǵylym akademııasynyń M.Áýezov atyndaǵy Ádebıet jáne óner ınstıtýtynda aǵa ǵylymı qyzmetker bolyp jumys istegen.
Máskeýde M.Gorkıı atyndaǵy Ádebıet ınstıtýtynda qazaq folklory men qazaq ádebıeti tarıhy boıynsha arnaıy leksııalyq kýrstar júrgizgen.
1984-86 jyldary «Jazýshy» baspasynyń bas redaktory, 1988-2006 jyldary «Juldyz» jýrnalynyń bas redaktory bolǵan.
Baspasóz betinde alǵash ret 1959 jyly kóringen. 60-jyldary negizinen ádebıet zertteýshisi retinde tanylǵan. Shyǵarmalary orys tiline aýdarylǵan, shetel tilderinde basylǵan. Fılologııa ǵylymynyń kandıdaty (1967) degen ǵylymı ataǵy bar. Qazaqstan Jazýshylar odaǵy Basqarmasynyń hatshysy bolyp qyzmet atqarǵan.
«Alasapyran» tarıhı roman-dılogııasy úshin Qazaq KSR-iniń Abaı atyndaǵy memlekettik syılyǵyn alǵan. Qazaqstannyń Halyq jazýshysy (1984) ataǵynyń, Túrkııanyń halyqaralyq «Túrik dúnıesine qyzmet» syılyǵynyń ıegeri (1997), «Tarlan» syılyǵynyń laýreaty (2002), Qazaqstannyń Qurmetti jazýshysy (2019) bolǵan.
2006 jyldyń jeltoqsanynda Qazaqstannan Cheh Respýblıkasyna qonystanǵan. Sodan beri Chehııa, AQSh, Túrkııa elderinde turyp, shyǵarmashylyqpen, ǵylymı zertteýlermen aınalysqan.
