Byltyr ǵana jumysyn bastaǵan «Jomart jan» respýblıkalyq ortalyǵy «Mektepke jol», «Júrekten júrekke», «Meıirim» jáne «Qamqor» qaıyrymdylyq jobalaryn sátti júzege asyrǵan. Byltyr kóktemgi sý tasqyny tusynda belsendiler 1 700 tonnadan asa eń qajetti taýarlardy tasymaldap, qaıyrymdylyqqa 800 mln teńgeden asa qarajat jınaǵan. Osylaısha túrli áleýmettik jobalar men muqtaj jandarǵa jalpy somasy 1 mlrd 300 mln teńge kóleminde kómek kórsetilgen. Dostyq úıinde uıymdastyrylǵan is-sharada ortalyqtyń endigi baǵyt-baǵdary aıqyndaldy.
– Negizgi maqsat – halyqtyń áleýmettik osal toptaryna járdem berý, muqtaj jandardy jarylqaý, jalpy qaıyrymdylyq qyzmetin dáripteý. Bıyl da bul úrdisten jańylmaı, ıgi isterdi jalǵastyramyz. Áleýmettik ınfraqurylymdy jaqsartý baǵytynda da birqatar jumys josparlanyp otyr. О́ńirlerde sport alańdaryn damytý, jastar ortalyqtaryn qurýǵa basa mán beriledi. Onyń ústine QHA-nyń 30 jyldyǵyna oraı ótkiziletin is-sharalarǵa belsendi atsalysamyz. Buǵan qosa Memleket basshysy Qasym-Jomart Toqaev bekitken Jumysshy mamandyqtar jylynda qoǵamda jumysshylardyń mártebesin kóterýge, adal eńbek, kásibılik sekildi qasıetterdi óskeleń urpaqqa nasıhattaýǵa úles qosamyz. Sonymen qatar Naýryz meıramyn, Jeńistiń 80 jyldyǵyn toılaýǵa erekshe kóńil bólinedi, – dedi «Jomart jan» respýblıkalyq ortalyǵynyń basshysy Evgenıı Bolgert.
Basqosýǵa Senat depýtaty Zakırjan Kýzıev, Mádenıet jáne aqparat vıse-mınıstri Evgenıı Kochetov, Mádenıet jáne aqparat mınıstrligi Etnosaralyq qatynastardy damytý komıtetiniń tóraǵasy Ǵalym Shoıkın, QHA «Jomart jan» óńirlik ortalyqtarynyń tóraǵalary, etnomádenı birlestikter men qoǵamdyq qurylymdardyń músheleri qatysty.
– Qazaqstan halqy Assambleıasynyń 30 jyldyǵy qarsańynda el Úkimeti aýqymdy is-sharalar josparyn bekitti. Bul – 150-den asa iri is-sharalar men 5 myńǵa jýyq túrli bastamalardy qamtıdy. Onyń árqaısysy meıirimdilik, qaıyrymdylyq, turaqtylyq, birlik qundylyqtaryn nasıhattaýǵa baǵyttalady. Merekeniń mereıin kóterýde qaıyrymdylyq naýqandar, Assambleıanyń 24-sessııasy, keńeıtilgen otyrystar, sondaı-aq ǵylymı-tájirıbelik konferensııalar men forýmdar ótkiziledi. Assambleıa óz qyzmetin Parıjdegi IýNESKO-nyń shtab-páterinde tanystyrýdy josparlap otyr. Taǵy bir aıta keterligi, «Birlik» bı ansambliniń gastroldik sapary uıymdastyrylady, – dedi E.Kochetov.
Al talqylaýǵa Zoom platformasy arqyly qatysqan oblystyq «Jomart jan» ortalyqtarynyń, QHA etnomádenı birlestikteri men qoǵamdyq qurylymdarynyń tóraǵalary bul mereıtoı tek mereke emes, etnosaralyq kelisimdi odan ári nyǵaıtýǵa serpin beretinin basa aıtty.
