Sýret: aimak.com.kz
Máselen, kásipker Vıacheslav Orlovtyń aıtýynsha, ıeligindegi jer teliminiń ústinen bóget salynǵan. Qazir onyń ıeligindegi jer ekige bólinip tur. Ol 2022 jyldyń qazan aıynda Mahambet aýdanyndaǵy Beıbarys aýylynan 2,7 gektar jer telimin jeke ıeligine alǵan eken. Maqsaty – qus fabrıkasyn ashý. Jańa nysannyń qurylysyn júrgizý maqsatynda byltyr jyl basynda jer telimin qorshaýdy bastaǵan. Jer telimine transformatorlyq qosalqy stansa ornatqan.
Mahambet aýdanynda sý tasqynynan qorǵaný úshin uzyndyǵy 105 kılometr bóget soǵylǵan. Al kásipkerdiń ıeligindegi jer telimi arqyly salynǵan bógettiń uzyndyǵy – 225, tabany – 12, bıiktigi – 2,5 metr.
«Maǵan jer telimine bóget salý týraly eshkim habarlaǵan joq. Men bóget salýǵa ruqsatymdy bergen joqpyn. Bógetke qoldanylǵan topyraq úıindisinen jer telimin qorshaýǵa qaǵylǵan 38 beton baǵanasy búlindi. Qazir ıeligimdegi jer telimi ekige bólingendikten, bıznes josparymdy bastaı almaı otyrmyn», deıdi V.Orlov.
Kásipkerdiń aıtýyna qaraǵanda, osy máseleni oń sheshý úshin birneshe ákimdikke júgingenimen, másele áli tolyq sheshimin tappaı otyr. Naqtylaı aıtqanda, Beıbarys aýyldyq okrýginiń, Mahambet aýdandyq, Atyraý qalalyq ákimdigine hat jazǵan.
«Ákimdikterden tushymdy jaýap almadym. Olar tek hatymdy bir-birine joldap otyr. Amalym taýsylǵan soń Atyraý oblysynyń kásipkerler palatasyna júgindim», dep málimdedi V.Orlov.
Mahambet aýdandyq jer qatynastary bóliminiń basshysy Aqylbek Sálıevtiń málimetine súıensek, sý tasqyny saldarynan zardap shekken kásipkerlerdiń tizimi jasaqtalǵan. Shaǵym bildirgen kásipkerdiń jer telimi arqyly salynǵan bóget Atyraý qalalyq ákimdigi tapsyrysymen júrgizilgen.
«Bizdiń aýdannan sý tasqyny kezinde shamamen 105 kásipkerlik sýbektisi zardap shekti. Qazir olarǵa ótemaqy tóleý jumysy júrgizilip jatyr. Zardap shekken kásipkerlerdiń tiziminde Vıacheslav Orlov joq. О́ıtkeni bizdiń balansqa onyń jer telimi arqyly ótetin bóget alynbaǵan», deıdi A.Sálıev.
Kásipkerler quqyqtaryn qorǵaý jónindegi ýákildiń Atyraý oblysy boıynsha sektor meńgerýshisi, oblystyq kásipkerler palatasy dırektorynyń orynbasary Sársenbaı Joldybaevtyń pikirinshe, iste kásipkerdiń quqyǵyn buzý deregi bar. Túıtkildi oń sheshýdiń joly qandaı?
«Qoldanystaǵy zańnamaǵa sáıkes túıtkildi máseleni sheshýdiń eki tetigi bar. Birinshisi – kásipkerge ótemaqy tóleý, ekinshisi – aýmaǵy men quny jaǵynan uqsas basqa jer telimin berý. Osyǵan baılanysty tıisti organdarǵa usynystar jiberildi. Eger olardyń jaýaby men máseleni sheshý turǵysyndaǵy usynysy kásipkerdi qanaǵattandyrmasa, onyń múddesin sotta qorǵaýǵa daıynbyz», dedi S.Joldybaev.
Atyraý oblysy
