Sýretterdi túsirgen – avtor
Aıtty-aıtpady, qaýip týraly eskertý, shekteýlerge qaramastan jolǵa shyǵyp ketetin júrgizýshiler az emes. Sondyqtan da ǵoı, О́skemen-Altaı baǵytyndaǵy qaýipti jolda kóshkin júrip, qyryq shaqty kólik keptelip qalǵan. Áıteýir, jolaýshylar aman.
– Qardyń shamadan tys jaýyp, kóshkin júrý qaýpi týraly eskertýlerge qaramastan, oblys turǵyndary alys saparlarǵa shyǵyp, joldyń kúrdeli ýchaskelerinde bógelip qalǵan, – dep habarlaıdy ShQO PD baspasóz hatshysy Gúlnur Túsipova.
Polısııa qyzmetkerleri jergilikti bılikpen birlesip, týyndaǵan qıyn jaǵdaıda jolaýshylar men júrgizýshilerge jedel kómek kórsetti. Jylyný pýnkteri ashylyp, jolaýshylar sonda jetkizildi. Oqıǵa ornynda arnaıy kómekke muqtaj jandar úshin medısınalyq brıgadalar kezekshiligi qurylǵan.
Jolaýshylar kún raıy jaqsaryp, tasjol ashylǵan soń ǵana baǵyttaryn jalǵastyrdy. Aıta ketý kerek, boran-shashyndy kúnderi shekteýlerdiń bolyp turýy ábden múmkin. Tek, soǵan qulaq asý kerek. Áıtpese, qoldanylatyn jaza da bar. Ol týraly quqyq qorǵaý organdary júrgizýshiler esine jıi salyp júr.
– «Osınov» asýy men Altaı jáne Serebrıansk sııaqty jaqyn jerdegi eldi mekenderde 30 tósektik orynmen jabdyqtalǵan jylytý pýnktteri jumys istep tur. Ol jerde tamaq ázirleýge kerekti qural-jabdyqtyń bári bar. Aýyzsýmen de qamtylǵan. Ishi jyly, jaıly. Jolda qalǵan jolaýshylar sany kóbeıgen jaǵdaıda qosymsha taǵy 10 tósektik orynǵa da esepteýge bolady, – dedi Altaı aýdany polısııa bólimi bastyǵynyń mindetin atqarýshy Denıs Erımbesov.
Jylytý pýnktinde jasalǵan jaǵdaı týraly Reseıdiń sonaý Novosıbırski qalasynan kele jatqan jolaýshy da aıtyp, tańdandy. Qyzmetkerler qonaq kútkendeı kútip aldy desedi.
– Aýylǵa, ata-anama qaraı jolǵa shyqqanmyn. Aldyn ala kóshkin júrý qaýpine baılanysty jol jabyq degen habarlama alǵanymmen, ótip úlgeretin shyǵarmyz dedik. Alaıda bizdi polısııa qyzmetkerleri toqtatyp, joldyń ashylǵanyn kútý kerektigin aıtty. Sóıtip, jylytý beketine ornalastyq, – deıdi Sergeı Semenov.
Jylytý beketi jumys istep turǵanymen, tabıǵattyń tylsym kúshin de esten shyǵarmaǵan abzal. Borandy kúni beketke jetip jyǵylatynyńyzǵa eshqandaı kepildik joq. Iаǵnı arnaıy mamandardyń eskertýlerin eskerip, shekteýlerge qulaq asqan jón. Ol degen – sizdiń qaýipsizdigińiz.
Shyǵys Qazaqstan oblysy
