Jasandy ıntellekt fotoıllıýstrasııasy, gov.kz
QR Bala quqyqtary jónindegi ýákilmen birlesip jasalǵan baılanys ortalyǵy otbasy, áıelder men balalardyń quqyqtaryn qorǵaýda quqyqtyq, uıymdastyrýshylyq jáne psıhologııalyq kómek kórsetedi.
Endi «111» nómirine qońyraý shalý múmkindiginen basqa, balalar men olardyń ata-analary QR-kodtar arqyly suraý jibere alady. Olar barlyq bilim berý uıymdarynda, balalar úshin qoljetimdi oryndarda, sondaı-aq avtobýs aıaldamalarynda ornalasqan.
«Buryn balalar baılanys ortalyǵyna telefon arqyly ǵana habarlasa alatyn, al endi olardyń QR-kodtar arqyly suraý jiberý múmkindigi bar. Bul qoldaýǵa júginý prosesin aıtarlyqtaı jeńildetedi, ony neǵurlym yńǵaıly jáne qoljetimdi etedi. QR-kodtar qajetti aqparat pen kómekti jyldam jáne anonımdi alýǵa múmkindik beredi, bul balalardyń saýaldary men máselelerine jedel den qoıýǵa múmkindik beredi», dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Byltyrǵy qorytyndy boıynsha «111» baılanys ortalyǵyna balalardan 1000-ǵa jýyq ótinish kelip túsken. Olarǵa anyqtamalyq aqparat berilip, psıhologııalyq qoldaý kórsetilip, memlekettik organdarmen yntymaqtastyqta ýaqytyly kómek uıymdastyrylǵan.
Esterińizge salaıyq, 2024 jyldyń shildesinde Memleket basshysy qabyldaǵan áıelderdiń quqyqtary men balalardyń qaýipsizdigin qamtamasyz etý máseleleri jónindegi zań sheńberinde «111» baılanys ortalyǵynyń qyzmeti bekitilgen bolatyn.
