Foto: qazaqculture.com
Aıta keteıik, ANAU-MYNAU kórmesi ár eldiń túkpir-túkpirinen keskindeme jáne grafıka salasynda jumys isteıtin 35 talantty sýretshilerdiń basyn qosty. Olardyń shyǵarmashylyq izdenisteri zamanaýı otandyq ónerdiń biregeı tulǵasyn qalyptastyrady.
«Endi bul jerde eki jyl saıyn bıennal ótkizip, jas sýretshilerge ózderin kórsetýge múmkindik beremiz. Biz kórmege 8 aı daıyndaldyq. Tujyrymdamany tańdap, ótinimderdi qabyldadyq. Irikteý kezinde janrǵa da, tehnıkaǵa da shekteý qoıylǵan joq, óıtkeni árkimniń óz kórkem tili bar. Shyǵarmanyń ıdeıasyna jáne oryndalý sapasyna kóbirek nazar aýdardyq. Nátıjesinde úzdikterdi iriktep aldyq jáne olarmen baıqaýǵa qatysýshy retinde emes, sýretshi retinde jumys isteýge nıettimiz», dedi «Kulanshi» zamanaýı óner ortalyǵynyń kýratorlyq keńesiniń tóraıymy Leıla Mahat.
Jastar óneriniń birinshi bıennalesi sýretshilerdi qoldaýdaǵy mańyzdy qadam. Bul jerde álem jas sheberlerdiń kózimen alýan túrli shyǵarmalarda beınelengen. Sonyń biri jas sýretshi Arýzat Tilep óz ótinishimen ájesi Úmittiń portretin usynǵan.
«О́kinishke oraı, men ájemdi ómirde kórmedim. Biraq bári meniń oǵan uqsaıtynymdy aıtady. Ájemniń beınesinen shabyttanyp, osy sýretti oǵan arnaýdy jón kórdim. Men ártúrli materıaldardy qoldandym: gıps jáne mata. Taǵy bir týyndym «Nazar» da osynda qoıylǵan. Eki kartına da buryn esh jerde kórsetilmegen. «Nazar» shyǵarmasynda tabıǵatqa degen súıispenshiligimdi bildirdim. Men Qostanaı oblysynyń týmasymyn. Birde aǵashtardaǵy kesilgen butaqtardyń kózge uqsaıtynyn baıqadym. Aǵashtar bizge qarap turǵandaı boldy. Osy oı meni shabyttandyrdy», deıdi Arýzat Tilep.
Portret janry bıennalede sonymen qatar Iаroslava Tıshenkonyń týyndylary usynylǵan. Avtor óziniń tańdalǵan jumystarymen qazirgi Qazaqstannyń kelbetin kórsetkisi kelgen. Sýretshiniń aıtýynsha, qazir kórmelerde qarapaıym adamdardyń portretteri sırek kezdesedi.
«Osy eki portret arqyly qyzmet kórsetý salasynyń adamdaryna: kóshe sypyrýshylarǵa, trolleıbýs júrgizýshilerine jáne elene bermeıtin mamandyq ıeleriniń bárine qurmet kórsetkim keledi. Jumys formasy adamdy tulǵasyzdandyrady, biraq onyń artynda ádette qıyn taǵdyr, basynan ótkergen jol jatyr», dedi Iаroslava Tıshenko.
Sonymen qatar kórmede sýretshi Evgenııa Grekına kompıýterlik algorıtmderdiń tiri adamnyń oılaýyna qalaı áser etetini týraly óz oılaryn bildiretin abstraksııany usynǵan.
Al, Sibir sýretshisi Marııa Volynskıh Qazaqstanǵa eki jyl buryn kóship kelgen. Onyń kartınasy kelýshilerdi sibirlik Gılead folklorlyq tobymen tanystyrǵan.
Sýretshi Murat Ismuhan bıennale kelýshilerin qys mezgilinde kóktemgi shabytpen jylytýdy jón kórgen. Ol baıqaýǵa birden bes jumysyn usynǵan. Nátıjesinde, «Kóktem» kartınasy irikteýden ótip, biraq ol jeke kolleksııaǵa satylyp ketkeni belgili boldy.
Jalpy, kórmedegi árbir kartınada belgili bir maǵynalyq mazmun bar. Jas avtorlardyń shyǵarmalarynan beıneleý óneri arqyly ózin tanytýǵa degen umtylys seziledi.
