Jaıly mektepterdiń ashylý saltanatyna oblys ákimi Qumar Aqsaqalov, «Samruk-Kazyna Construction» AQ basqarma tóraǵasynyń birinshi orynbasary Ǵabıt Malǵazdarov, bilim salasynyń basshylary, ata-analar men oqýshylar qatysty.
«Bereke» shaǵyn aýdanynda jıyrma myńǵa jýyq halyq turady. Balalardyń sapaly bilim alýyna jan-jaqty jaǵdaı jasalyp, bilim ordasy arnaıy qurylǵylarmen jabdyqtaldy. Uly aǵartýshy, ǵalymdar mekeni Tobyl-Torǵaı jerinde uly jobalardyń ári qaraı jalǵasatynyna senimdimiz. Sapaly bilim jáne óskeleń urpaqty tárbıeleý elimizdiń basty qundylyqtary. Prezıdent saıasatynyń arqasynda elimizde sapaly bilim alý úshin qolaıly jaǵdaı jasalyp, ótken jyly 1200 oryndyq eki mektep salyndy. Bıyl tórt jarym myń oryndy qamtıtyn jeti mekteptiń qurylysy aıaqtalady. Osyndaı mańyzdy áleýmettik nysandardyń nátıjesinde oblystaǵy oqý oryndarynyń tapshylyǵy birtindep sheshilip keledi. Oblystyń bilim salasy kóptegen jetistikke jetti. О́ńirimiz respýblıkalyq pándik olımpıadadan úshinshi orynda, halyqaralyq baıqaýlarda aldyńǵy qatardamyz. Bul jerde osy qabiletterińizdi odan ári shyńdap, úlken armandarǵa jol ashylǵaly tur», dedi ákim.
«Bereke» shaǵyn aýdanynyń turǵyny Ermek Qalqaeva jańa mektepke eki birdeı nemeresin jetektep ákelipti. Kezinde Naýyrzym aýdanynda, keıin Qostanaıda muǵalimdik qyzmet atqarǵan ardager ustaz balaǵa óz ana tilinde bilim berýdiń mańyzdy ekenin jaqsy biledi.
«Jańa mektep bizge unady. Ulttyq sıpatta tárbıe, bilim beredi ári ózimizge jaıly. Janymyzda ornalasqan. Ishi jaryq, bólmeleri keń, jaqsy jabdyqtalǵan. Balalardyń sapaly bilim alýyna jaǵdaı jasalǵan. Sanaly tárbıe alyp shyǵatynyna senemiz. О́zim de ustaz bolǵanmyn. Qyryq jylǵa jýyq ýaqyt matematıka páninen sabaq berdim. Áli mektepten ketken joqpyn. Nemerelerimdi oqytamyn. Segiz nemerem bar. Qazirgi baǵdarlamada burynǵydan aıyrmashylyq kóp. Jańasha úıretýge, jańasha tárbıeleýge tyrysamyz. Ár ata-ananyń armany – balalarynyń bilim alyp úlken azamat bolǵany», deıdi ardager ustaz.
Buǵan deıin orys-qazaq synyptary aralas mektepterde oqyp kelgen birsypyra bala endi taza qazaq tilinde bilim beretin osy mektepke qabyldanatyn bolady. «Bereke» shaǵyn aýdanynyń turǵyny Dámir Ahtııamov ta balalaryn úı irgesinde ashylǵan jańa mektepke berip jatyr.
«Bul mektep osy jerdegi turǵyndar úshin jaıly dep oılaımyn. Osynyń aldynda qyzymyz №27 mektepte oqyp edi. Ol bizge alys. Al jańa mektep janymyzda tur ári ishi jaryq, keń, oqýǵa saı zamanaýı úlgide jabdyqtalǵan. Eń bastysy, úıge jaqyn, bala da sharshamaıdy, biz de ýaqyt únemdeımiz. Buryn ekinshi balam Abaı mektebinde oqydy. Keıde sabaǵyna jalǵyz jiberýge týra keledi. Sondaı kezderde joldyń arǵy betine qalaı ótti eken dep alańdap otyratynbyz. Qazir mektebimiz úıge tıip tur. Sondyqtan Prezıdentimizdiń bastamasymen salynǵan jaıly mektepter balaǵa ǵana emes, ata-analarǵa da asa qolaıly», deıdi turǵyn.
Jańa shaǵyn aýdandardaǵy jaıly mektepterdiń qurylysyna respýblıka bıýdjetinen 14 mlrd teńge qarjy bólingen. Oblystyq bilim basqarmasynyń málimetinshe, bıyl óńirde 4,5 myń bala bilim alatyn taǵy 7 mektep salynady.
Qostanaı oblysy
